• الأمير أحمد رفعت
• 07:26 AM - 14 May 2021
• My Other Reviews

أنا مش هتكلم على أساس إني ناقد سينمائي أو تليفزيوني أنا هتكلم على أساس إني واحد من الجمهور المصري و العربي اللي شاف المسلسل دة؛ مبدئياً أنا كنت واحد من الناس اللي منتظرين عرض المسلسل دة بسب الضجة الجامدة اللي حصلت قبل رمضان عنه و بسبب البرومو بتاعه اللي أول ما نزل أتعمل عليه1000 ميمز على الفيس وعشان كده أنا شوفت الحلقة الأولى منه كل اللي فهمته أن في تار عظيم بين عساف الغريب و غفران الغريب اللي نافخين أهل البلد عشانه بسبب أسباب غير منطقية ومافهمتهاش وان عساف الغريب كان مسجون بقاله 20 سنه بعد ما كان واخد إعدام والحكم اتخفف وهنا بنلاقي أحمد السقا بلوك جديد وحالق رأسه زيرو و مربي شنبه وحاطط أسنان فضة في شكل غريب عمال يلحسها طول المسلسل زي اللي مركب جهاز تقويم وبنلاقي عينه بتطق شرار علشان ينتقم من غفران الغريب اللي كان السبب في سجنه، وبنلاقي إن عساف تزوج من جليلة (مي عمر) لما كان عندها 12 سنة (مع العلم إن إحنا في 2021 مش في 1940) لكن بنبلع الموضوع و الأغرب إننا بنلاقي أنه أنجب منها حمزة الغريب (أحمد مالك) اللي أمه كانت أكبر منه ب12 سنه بس لكن ما علينا وبنلاقي أمير كرارة ( غفران الغريب) بلوك غريب جداً لابس أسود طول المسلسل و حاطط كحل اسود بنلاقي كمية غير طبيعية من الحقد و الكره و الظلم و الدم و الخراب اللي بنلاقيهم في البلد دي بسبب صراع عساف مع غفران اللي بنكتشف أنه اتجوز جليلة بعد ما دخل عساف السجن و طلقها منه و نسب حمزة ليه و خلف من جليلة ولد تاني اسمه سليم(أحمد داش) ودة من أسباب كره عساف ليه. ما أكدبش عليكو أنا لما لقيت حشو رهييييب في أول حلقة قررت اني ما أتابعش المسلسل لكن لسوء حظي إني شدني آخر 7 حلقات من المسلسل لكن كنت بتابع أخباره على النت ولا سيما أشهر ميم في تاريخ الفيس بوك بتاع أحمد السقا و المقولة الأشهر في التليفزيون المصري لأمير كرارة (كتع كسح كسل) وبدأت أتابع المسلسل من أول ما كان حمزة و سليم بيتخانقو على فاطمة ، وطول 7 حلقات والقتل مش بيبطل ولاقينا طرق قتل بشعة جدا و أن الدم فجأة تحول لمية و كره و رعب و خوف و هلع و ضرب نار وانتقام و غفران قتل حمزة بطريقة بشعة مرعبة تخلو من الإنسانية و عساف قتل سليم بعد ما خطفو و غفران قتل علي (دياب) رمز العدل و القانون و عساف قتل أخوه بدم بارد و قتل حسيب ثم مات غفران و عساف بعدما تم القبض عليهم وتم الحكم عليهم بالإعدام شنقاً بعد أسطورة الرعب اللي كانو عاملينها في بلدهم و تظل مي عمر كالعادة. خلاص الحمد لله المسلسل خلص و أعصابي ارتاحت من التوتر اللي جالي من متابعتي لآخر 7 حلقات من المسلسل فأنا مش عارف لو كنت تابعته من أول رمضان كان ايه اللي هيحصلي؟ مش عارف لكن ما علينا. نيجي بقى لوحش رمضان 2021 محمد سامي قائد ملحمة نسل الأغراب اللي تولى كتابته و اخراجه؛ بصراحة أنا مش لاقي حاجة إيجابية واحدة في المسلسل دة علشان أمدح محمد سامي و كل اللي عندي هو إن الأوڤر و المبالغة الشديدة سواء في الأحداث أو في الملابس أو في طريقة الكلام أو شكل شخصيات العمل حولت المسلسل لأضحوكة ما يتعملش فيها حاجة غير أننا نحفل عليها لان أنا واحد من المشاهدين اللي وانا بتفرج على المسلسل ما بقتش عارف إحنا في سنه كام؟ أنا ليا أقارب في الصعيد وفي قرى الصعيد وبزورهم و يزورني وما بلاقيهمش لابسين عمم و جلاليب والستات مش لابسين خيمة و دهب و سيغة و كردان مغطيهم زي اللي في المسلسل دة غير ان أبطال العمل فشلو في نطق اللهجة الصعيدية صح. بصراحة أمير كرارة الناس حبته جداً بعد الإختيار السنة اللي فاتت و عمل شعبية كبيرة و كسب تعاطف الشعب المصري معاه لكن بعد دوره في المسلسل دة الناس كرهته جداً و خد دعاوي توقف الحال و شتائم دة غير أساسا أن ما فيش صعايدة دلوقتي بيجوزو عيالهم في سن 12 سنة ولا حتى بيحطو كحل اسود وماقالعش حاجة طول المسلسل غير العمة و الشال يلبسهم و يقلعهم ونطق اللهجة الصعيدية وحش منه جدا فأنا رأيي أن نسل الأغراب السنادي كان اختيار غير موفق منه. أحمد السقا ممثل جامد جدا و خسارة موهبة زي موهبته تتدفن في دور وحش مبالغ فيه زي دة وبردو أنا شايف أن نسل الأغراب السنادي كان اختيار غير موفق منه. مي عمر مش بتعرف تمثل بمليم و تمثيلها ما أقنعنيش في المسلسل دة وأنا دلوقتي إتأكدت أن هي دخلت الوسط الفني بالوساطة بسبب زوجها محمد سامي. فردوس عبد الحميد ممثلة قديرة و ثقيلة وليها وزنها في الوسط الفني مش عارف هي ليه ماسكة في محمد سامي و مش بتشتغل مع حد غيره مش عارف فأنا من رأيي انها لازم تبعد عن محمد سامي لأنه هيخليها تفقد شعبيتها و هي محتاجة مخرج شاطر يقدرها و يقدر تاريخها الفني الطويل الحافل والأدوار العظيمة الخالدة في أذهاننا. أحمد مالك و أحمد داش فشلو في المسلسل دة كأدوار صعيدية سواء في طريقة نطق اللهجة الصعيدية أو في اللبس أو في الأداء أو في طريقة كلام أحمد داش اللي مش فهمنا منها حاجة طول المسلسل لأن هم ممثلين شباب متعودين على النادي و على التجمع الخامس و حي الزمالك و الرفاهية ففشلو في إقناعنا بشخصياتهم في المسلسل دة ويمكن كمان عشان مي عمر أكبر من أحمد مالك 7 سنين بس و جاية في دور أمه في سقطة وحشة من محمد سامي و أحمد داش مي عمر أكبر منه ب12 سنه و جاية في دور أمه بردو. أما باقي الأبطال فأنا مش هعرف أقولهم عشان هم كثيير أوي ففي آخر نقدي للمسلسل دة أحب أقول إن العمل دة كان ممكن يبقى أجمل بكثير و ألطف بمراحل لو ما كانش فيه مبالغة في الأحداث و الشخصيات ولو كان اتكتب بطريقة أكثر احترافية و كان أداء الممثلين مقنع ولو ما كانش فيه كحل ولا أسنان فضة ولا كردان كبير ولا زواج في سن 12 سنة ولا تربية أسود في قصر غفران الغريب وبسبب دة كله وبسبب افتقار السيناريو للحبكة الدرامية الصحيحة اضطر محمد سامي أنه يضيف الحاجات المبالغ فيها دي اللي كانت السبب في أن المسلسل تحول لمجزرة دموية بين وحوش مش بين عائلات بني آدمين من الصعيد.

• 4 helpful
• 1 not helpful