• دعاء أبو الضياء
• 12:00 صباحًا - 24 ديسمبر 2012
• نقد آخر لنفس المستخدم

أعشق كلينت ايستوود كمخرج قبل عشقه كممثل، فهو يمتلك أدوات لا يمتلكها أي مخرج من نفس جيله، لما بشوف أفلامه بحس إن هناك ريحة غريبة بافضل أشمها لوقت طويل أوي، ريحة بتخليني مستمتعة بأحداث الفيلم حتى لو كان دون المستوى، ويمكن فيلم Trouble with the Curve ماكنش من تأليف ولا إخراج إيستوود لكن تمثيله واتقانه لشخصية جوس خلتني أعيش معاها واشم نفس الريحة،

أولا بنصح كل عشاق الأفلام الرياضية انهم يتفرجوا على الفيلم؛ لأن أغلب مشاهده بتدور عن الرياضة خاصة إنها تمحورت في لعبة البيسبول المشهورة، وللأسف انا مش بحب نوعية الأفلام دي بس طبعا السبب الرئيسي اللي خلاني اشوفها هو إيستوود، وفكرني بفيلم Moneyball لبراد بيت، ومع إن ده المحور والتيمة الرئيسية للفيلم إلا إني أقدر أقول أن الفيلم بيحتوي على معاني اجتماعية كتير أوي زي معنى البنوة واللي قدرت (ايمي ادامز) تقدمها بشكل مفتوح وتبين ده من خلال علاقة الصداقة اللي جمعتها ببوالدها بالرغم من ظنها واعتقدها بأنه تركها طوال فترة طفولتها مع عمها وعدم اهتمامه بيها، وهكذا علاقة الأب بابنته، عامة الدراما الاجتماعية بيعشقها كتير أوي من الجمهور وليها مكانة خاصة يمكن عشان بتمس في أوقات كتير حياة الناس وفيلمTrouble with the Curve لمس فعلا أهم الحاجات دي.

كمان القصة الرومانسية والحب اللي جمع بين ميكي وجوني أقدر أقول إن راندى براون قدمه بطريقة غير مقحمة على الأحداث وكانت مناسبة جدا في الوقت اللي انفصلت فيه ميكي عن صديقها ظهر جوني وكان دعم ليها ووقف بجنبها في محنتها مع والدها،

الفيلم كتابة وتمثيل وإخراج مقدرش اقول عليهم أقل من إنهم يستحقوا تقدير جيد ويستحق إنك تشاهد الفيلم في الاجازة عشان تقدر تستمتع بكل اللي بيقدمه.

• 0 مفيد
• 0 غير مفيد