• دعاء أبو الضياء
• 12:00 صباحًا - 13 مايو 2013
• نقد آخر لنفس المستخدم

بداية يلٌزمني التنويه عن إن النقد ده مش هيعجب ناس كتير من عشاق سلسلة Iron Man، وفي نفس الوقت لازم أأكد اني من أشد المعجبين بالسلسلة ذاتها، (يعني تناقض مافيش زيه) حتى إن من أسباب مشاهدتي لفيلم The Avengers ظهور شخصية الرجل الحديدي ضمن أحداث وشخصيات الفيلم، وإني انتظرت عرض الجزء الثالث في مصر، وتوقعت إنه هيحقق نجاح كبير،

ويمكن الفيلم حقق بالفعل نجاح جيد وإيرادات عالية بدأت ب تحقيق 174,144,585 دولار في أول اسبوع لعرضه بأمريكا، في الوقت اللي حقق فيه بمصر تقريبا 1,621,245 ج في أول اسبوعين عرض له واعتقد إن السبب ورا ده التقنية العالية والخدع السينمائية المستخدمة في تنفيذ العمل ليس أكثر واللي هتبان مع عرضه بخاصية 3D , IMAX؛ فلو بصيت للقصة نفسها والسيناريو اللي كتبه المؤلف (درو بيرس) اعتقد إني مش هلاقي أي جديد يختلف عن الأجزاء السابقة نفس الحكاية ونفس الخط الأساسي وأضيف لده كمان ضعف السيناريو نفسه واللي ظهرت نقاط ضعفه في الأسباب اللي دفعت بتوني ستارك لمحاربة عدوه ماندرين اللي قدر في البداية إنه يقضى على الرجل الحديدي...

الأداء التمثيلي للأبطال لا غبار عليه خاصة بطل العمل الممثل الأمريكي روبرت داوني جونيور واللي بيأكد في كل مشهد إنه البطل الأوحد والسبب الرئيسي بعد التقنية المستخدمة في نجاح هذا العمل، كمان الممثل (بن كنجسلى) اللي قدم شخصية الماندرين قدر بتنافس وذكاء في تقديم شخصية العدو اللدود، أما أداء كلا من (جونيث بالترو) والممثل الأسمر (دون شيدل) فكان أقل من العادي بمراحل خاصة انفعالات جونيث بعد تحولها وده اللي خلاني أأقف لثواني أفكر في الفيلم كله وازاي بعد اللي حصل كله تقدر "بير" إنها ترجع وتقاوم مرة أخرى!!!!

مقدرش اقول بصراحة ان الموسيقى التصويرية كانت سيئة لكن مش جديدة ويمكن في بعض المقاطع كنت بفتكر معها الجزء الأول من IRon Man وبعض مشاهد فيلم المنتقمون، لكن ممكن تكون معبرة عن الأحداث بشكل مقبول.

في النهاية اظن إن الجزء ده لازم يبقى النهاية الحتمية لسلسلة أجزاء الرجل الحديدي زي ماكان فيلم (The Dark Knight Rises) نهاية لثلاثية عظيمة للمخرج العظيم كريستوفر نولان.

• 3 مفيد
• 0 غير مفيد