• دعاء أبو الضياء
• 12:00 صباحًا - 26 مايو 2013
• نقد آخر لنفس المستخدم

على نفس الوتيرة التي بدأت عام 2001 والتي قدمها المخرج Rob Cohen بفيلم The Fast and the Furious استكمل المخرج جاستين لين السلسلة مقدما فيلم Fast & Furious 6 واللي بشوف إنه أقوى أجزاء السلسلة أو أقدر أقول إنه قدم جرعة أكشن زيادة عن الأجزاء السابقة،

بداية الفيلم بيربطه خيط قوي بالجزء السابق Fast Five عام 2011 واللي حقق إيرادات وصلت تقريبا ل 200 مليون دولار، فبعد أن قرر دومنيك وبريان أن يتنحا جانبا عن العمليات الخطرة ويبدأن حياتهما من جديد يفاجان بالعميل لوك يطلب منهما المساعدة في التصدي لعدوهم اللدود شو اللي قدر إنه يكون فريق على نفس القوة والتميز لفريق دومينك،،، وبدون حرق الفيلم نقدر نقول إن المرة دي الأحداث مش هتتمحور حول سرقة بنك أو سباق سيارات أو تجارة مخدرات وإنما حول تهديد اﻷمن العام بأكمله،

الأسلوب الإخراجي واللي قدر جاستين لين إنه يقدمه ببراعة وحرفية من خلال مشاهد حركة وأكشن ومعارك بشكل مميز اعتمد فيها على مستوى تقني عالي ولقطات سريعة وحية وده ظهر اكتر في عمليات المونتاج القوية للقطات، وبجانب بارعة الإخراج ظهرت أيضا عبقرية المؤلف كريس مورجان في وضع أسباب منطقية لما يحدث خاصة خلق دافع قوي لعودة دومنيك وإصراره على الانتقام من شو بعد اكتشاف أن حببيته السابقة (لوتي) مازالت على قيد الحياة وده خلق جو واقعي نوعا ما للأحداث، ومن هنا هنلاحظ إن الفيلم ركز على عناصر معينة في تركبيته الدرامية زي فكرة الانتقام وتطوير عناصر أخرى زي خط تهديد الأمن العام،واعتقد إنه لابد الإشادة بالتصوير والكادرات الصعبة اللي ميزت أيضا الفيلم.

يمكن الاختلاف في هذا الجزء بيبدو في تحركات فريق دومنيك خاصة إنهم معروفين بالترتيب والتخطيط لكل عملية لكن المرة دي بيحاول كل واحد القبض على أفراد فريق شو والتخلص منهم وتسلميهم للعدالة وبيبقى الدافع اﻷول والأخير لدومنيك وهو إعادة لوتي

ومن أكتر الحاجات اللي لافتت نظري في هذا الجزء إنه تميز بحس فكاهي شديد والكثير من المشاهد الكوميدية اللي انفرد بتقديمها الممثل Ludacris وكمان هنشوف تناغم بين أبطال العمل وكإن بينهم كمياء مشتركة ظهرت أكتر في مشاهد المطاردات ، وأقدر أقول إن ماكنش في بطل أساسي للعمل بل إن الطاقم كله ظهر تعاونه وابداعه وأدائهم المتكامل وقدراتهم المهارية في جميع المشاهد

مع مشاهدة الفيلم في سينما آيماكس هتحس بالفرق الكبير أوي في مجسمات الصوت وهتظهر المؤثرات الصوتية بشكل جيد، خاصة إن إغلب مشاهد الفيلم بتعتمد على ده.

• 1 مفيد
• 0 غير مفيد