• دعاء أبو الضياء
• 12:00 صباحًا - 19 سبتمبر 2013
• نقد آخر لنفس المستخدم

كل علاقتي بفيلم (The Smurfs 2) مرتبطة بفترة الطفولة وخاصة يوم الجمعة بالليل مع عرض برنامج (ماما ليلى) اللي كانت بتعرض من خلاله حلقة من حلقات مسلسل السنافر، ويمكن ده السبب الرئيسي اللي خلاني اشوف فيلم the smurfs 2،

أنا للأسف معنديش أي فكرة عن ارتباط الجزء التاني بالجزء الأول، ﻹني مشوفتهوش، لكن أقدر أقول إني محتاجتش إني أعرف أي معلومات عنه ومن هنا مش هتحتاج انك تتفرج على الجزء الأول ولا تخاف إنك تتهوه بين الأحداث، فالقصة بسيطة بتدور حول مجموعة من السنافر بيحاولوا محاربة الشر المتمثل في الساحرة الشريرة (حارجاميل) اللي قدرت تبتكر تعويذة سحرية تستطيع من خلالها تحويل المخلوقات الصغيرة المسماه بالـ "خبثاء" إلى سنافر.

وبعيد عن القصة اللي ممكن تشوفها جميلة وبسيطة ذي ما ذكرت، وتنفع الأطفال يتفرجوا عليها وهما بيأكلوا أو بيغيروا الحفاظات؛ أقدر أقول إن تعبير ( :/ ) لازمني طول أحداث الفيلم، وللأسف مافيش أي حاجة قدرت تشدني ليه واضطريت استكمل مشاهدته وأنا مستعوضة ربنا في الساعة وتلت اللي ضاعوا مني، بس عامة الفيلم الفيلم بيقدم مغامرات حلوة وجديدة عن اللي اللي أنا شوفتها قبل 25 سنة تقريبا أو أكتر ، بالإضافة إلى تقديم فكرة جديدة وهي الجمع بين الشخصيات الكرتونية والممثلين الحقيقين، ونجاح المخرج (رجا جوسينل) في تنفيذ ده ببراعة من خلال المونتاج والمؤثرات البصرية. وبما إن الفيلم رسوم متحركة فالتحدث عن الأداء التمثيلي ملهوش أي معنى هنا، غير إني أقدر أقول إن شوفت محاولة من أبطال العمل التعامل مع الشخصيات الكرتونية وكإنها حقيقة،

أغنية "Ooh La La" اللي قدمتها برتني سيبرز في الفيلم كانت خفيفة ومقبولة ودي كانت حسنة تحسب للفيلم.

اعتقد إن الفيلم مقدمش أي جديد ليا غير إنه ذكرني بأيام المدرسة واجازة يوم الجمعة

• 2 مفيد
• 1 غير مفيد