• دعاء أبو الضياء
• 12:00 صباحًا - 19 اكتوبر 2013
• نقد آخر لنفس المستخدم

مازلت عند رأئي بإن عائلة السبكي مجرد تجار، يعني بيشوفوا أي سوق بيجيب ربح أكتر وبيدوروا فلوسهم فيه، وبالتالي أنا ضد أي مقاطعات لأفلام السبكي، أو الحملات الأخيرة اللي ظهرت ضده، ولما يقدم فيلم زي (عش البلبل) فمحدش يلوم عليه ﻹنه بطبيعة الحال هيشوف الناس عايزة إيه؟ وإيه المطلوب ويقدمه، إذاً في النهاية اللوم كله ع الجمهور وذوقه.

وأنا هنا مش هتكلم عن طموحات السبكي ولا خططه التجارية أو الفنية لو صح التعبير بإني اعتبره بيحاول يقدم نوع من الفن، وإنما هتلكم عن الفيلم نفسه اللي مش عارفة اكتب واقول عليه إيه بصراحة، غير إن المؤلف (سيد السبكي) زي كل فيلم بيقدمه جمع مجموعة من الراقصات والمغنيين الشعبيين وطلب من مؤلف الأغاني أنه يحط لكل واحد منهم أغنيتين تلاتة وربنا بقى يقدره على حشو كام مشهد بين كل أغنية والتانية، وكدا نبقى قدرنا نحط سيناريو وحوار فيلم ملهوش أي معنى زي فيلم (عش البلبل).

أما المخرج (حسام الجوهري) فربنا قدره على فعل الخير هو كمان، وقدر يجمع كل الأغاني والـ (هرك) اللي كتبه سيد السبكي في مشاهد غاية في الاسفاف والابتذال، واستفزاز الجمهور، وإيفهات مكررة من أفلام سابقة، مع شوية ضرب على القفا وأقلام على الوجه وكدا الفيلم انتهى.

طبعا مافيش حاجة هنا اسمها الأداء التمثيلي نتكلم عنه، إنما ممكن نتكلم عن الأداء الحركي والاستعراضي اللي قام به كل أبطال الفيلم بدء من سعد الصغير والراقصة دينا (كلاكيت تلات مرة) ومرورا بالمطربة الشعبية بوسي اللي معرفش دورها كان ايه بالظبط بالفيلم، وانتهاءَ بشخصية سكر اللي قدمتها المطربة (مي سليم) واللي اعتقد أنها قضت على أي رصيد لها لدى الجمهور بعد قبول مثل هذا العمل. وبصراحة كل منهم قام بدوره على أكمل وجه في الرقص والغنى.

مافيش تقييم للفيلم ممكن أذكره لان مافيش فيلم أصلا

و

• 8 مفيد
• 0 غير مفيد