• مى فتحى شمس الدين
• 12:00 صباحًا - 3 فبراير 2014
• نقد آخر لنفس المستخدم

تقييمى الشخصى 9/10

حطيت تقييمى للفيلم فى البداية لان الفيلم نفسه حطنى فى حيرة كبيرة جدا ياترى اكتفى بالتقييم دا وشوية كلمات بسيطة تحثكم على انكوا تشوفوا الفيلم ولا اكتب عنه بشكل مفصل ممكن يحرق الكثير من خطوط الفيلم قبل ما تشوفوه ولكن بعد ما شوفت الفيلم للمرة التالتة

قررت انى اكتب عنه بشئ من التفصيل ، وانا عارفة انى مهما كتبت فدا فيلم لازم يتشاف من اول دقيقة لآخر دقيقة بمنتهى التركيز وان شوية تفصاصيل مسبقى مش هاتفقدكوا استمتاعكوا بيه زى بقية الافلام الايرانية اللى شوفتها قبل كدا..الفيلم دا انسانى بالدرجة الأولى بيتناول كتير جدا من الخطوط اللى بتشكل المجتمع الايرانى بصفة خاصة ، والانسان بصفة عامة المخرج / اللى هو فى نفس الوقت المؤلف اختار انه يبدأ الفيلم بمشهد بيحدد العلاقة مابين الشخصيتين الرئيسيتين فى الفيلم ، نادر وسيمين ، وهم فى المحكمة بيحاولوا يلاقوا حل خارجى لمشكلة خاصة جدا ودا خلانى افكر كتير فى مدى انعزال كل واحد فيهم عن التانى واتساع الفجوة بينهم .

دا بيظهر على مدار الفيلم فى كتير من مواقف الشد والجذب مابين الزوجين ، سيمين مستنية جوزها ياخد خطوة ما ونادر عايزها تفهمه لوحدها فيه مشهد فى الفيلم كان عاجبنى جدا لما كانوا بيتجادلوا من خلال القزاز الموجود فى بيتهم . كل واحد واقف ورا لوح زجاجى ما وبكلم الآخر وكأنه عازل نفسه تماما عنه . من الخطوط المهمة جدا فى الفيلم بالرغم من انه اخد حيز مشهدين او تلاتة على الاكتر هو الدين . دا ظهر فى الماستر سين للخط دا لما الخادمة بتقع فى حيرة كبيرة جدا لانها مش عارفة مدى حرمانية انها تغير لشخص عجوز بتقوم على خدمته هدومه ف بتتصل بلجنة الفتوى قبل ماتعمل اى تصرف . انا شايفة ان دا بيسلط شوية الضوء على العلاقة مابين تأثير الدين والافراد ومستواهم الاجتماعى والتعليمى كمان .

ومابين عيلة نادر وعيلة الخادمة ممكن نقدر بسهولة نعمل مقارنة بين المستويات الاجتماعية فى المجتمع الايرانى واختلاف ردود فعل الافراد من المستويات المختلفة المواقف المشتركة مابينهم

من ضمن المواقف دى لما نادر وسيمين راحوا يزوروا الخامة فى المستشفى ، المفروض ان نادر كان بيتصرف تصرف حضارى وشهم من وجة نظره انه يروح يطمئن عليها ، لكن من وجهة نظر جوزها هو كدا شخص حقير ووقح كمان

كمان الموقف اللى نادر وزوج الخادمة بيقفوا قدام القاضى ، وطريقة عرض كل واحد فيهم لوجة نظره فى المشكلة اللى حصلت بينهم ، نادر بيتكلم بهدوء وبيقدر فى الآخر يقلب جزء من الموضوع لصالحه ، لمن الزوج انفعالى جدا لانه كل شوية بيكتشف قد ايه هو ضئيل ومش قادر يكسب تعاطف القاضى بسهولة دا غير طبعا احساس متراكم عنده بالمهانة والظلم بيخلوه ينفعل جدا ويتعرض لخسارة قضيته بالكامل

من المشاهد اللى خلتنى اعيط فعلا هو مشهد الزوجة وهى بتترجى القاضى انه يعفى عن جوزها ويغفر له انفعاله ، وبعدها بينضم لها نادر فى الطلب دا ، وهى بالغرم من حملها بتقطع سلالم وطرقات المحكمة هرولة مابين جوزها والقاضى . جالى احساس ان الحالة اللى هى فيها دى هى الحالة العامة لحياتها كلها . طريقة تربية نادر وسيمين لبنتهم تستحق التوقف والتأمل كتير جدا خصوصا فى المجتمع الايرانى ، وطريقة توريط كل منهم لبنتهم فى المشكلة اللى حصلت للعيلة كمان مهمة جدا لانه بتمس القضية الاساسية اللى انا شوفت ان الفيلم بيدور حواليها من اول مشهد لآخر مشهد ، وهى ضقية الصح والغلط من وجهة نظر كل شخص .وان التصرف الصح دا شئ نسبى بيختلف باختلاف نظرة الشخص للحياة لكن بيتأثر اكتر بالظروف اللى بيمر بيها ، ودا بيبان جدا فى وجهة نظر سيمين ونادر فى موضوع الانفصال فى الاول ، وبعدين فى طريقة تعامل كل منهم مع المشكلة اللى اتحطوا فيها ، وكمان طريقة تعامل الخادمة وجوزها مع نفس المشكلة . لما الفيلم خلص / للمرة التالتة..انا حقيقى ماقدرتش ابدا احدد مين اللى كان صح ومين اللى كان غلط من البداية . واكتشفت ان دا تعبير قوى جدا عن الحياة ، مش لازم نوصل للنتيجة قد ما مهم اننا نمشى الطريق صح على قد ما نقدر..لان مافيش حد كامل ومافيش حد هايمشى فى خط مستقيم طول الوقت

اعتقد انى هاكتفى بالنقط اللى قولتها فوق بالرغم من وجود المزيد اللى عايزة اتكلم فيه..لكن بعد ماتشوفوا الفيلم

عايزة اقول ان القصة محبوكة ومعقدة ودا سر جاذبيتها السيناريو كان رائع جدا الكادرات ممتازة والصورة والإضاءة رائعة التمثيل متقن من كل الكاست ماعرفش كتير فى تقنيات الاخراج وخلافه لكن اعتقد انه ادى مهمة ممتازة جدا

الفيلم فى رايى من احسن الافلام اللى شوفتها لحد دلوقت

ملاحظة اخيرة المرأة الايرانية من اكثر نساء العالم جمالا وجاذبية

• 5 مفيد
• 1 غير مفيد