• Mohamed Hatem
• 12:00 صباحًا - 26 يناير 2016
• نقد آخر لنفس المستخدم

نبدا بالتمثيل: ليوناردو بيثبت للمره المليون انه من اقوي الممثلين في تاريخ السينما. الفنان المبدع ده مبيقلش عشر كلمات علي بعض طول الساعتين و نصف، بيمثل بتعابير وجهه، اداءه فعلا روعه. قد ايه بنحس بألمه في رحلته، و قد ايه بيقدر يخلينا نحس ان احنا معاه في مشواره. استحق الجولدن جلوب و يستحق الاوسكار بكل تأكيد.

توم هاردي بيمثل شخصيه من احقر الشخصيات اللي انا شفتها في حياتي، للدرجه اللي تخليك تتمني موته من اول عشر دقايق في الفيلم، و كل شويه يفاجأنا بمدي حقارته، توم هاردي ادي الدور بكل عبقريه و سلاسه.. برافو. باقي الممثلين ادو ادوارهم حلو قوي لكن اكثر اتنين هنفضل فاكرينهم هما ديكابريو و هاردي. التصوير عبقري، شبه التكنيك اللي شفناه في بيرد مان. ستايل الفيلم الوثائقي(هاند هيلد و ستيدي كام)، الكاميرا ماشيه مع الممثلين و بتصور الاحداث كأنك فعلا موجود وسط الاحداث دي. الموسيقي روعه، موسيقي هاديه لكن ليها دور مهم جدا في الفيلم.

بالنسبه للediting: الفيلم مدته ساعتين و نصف، و احنا بنحس فعلا بالمده دي، مش معني كده ان الفيلم ممل، بس يمكن عشان مفيش احداث كثير بتحصل بعد اول ٤٠ دقيقه، مجرد ان احنا بنتابع رجل في رحله قاسيه. الفيلم روعه و من اقدر اقول ان احلي تجربه سينيمائيه ليا في حياتي لما شفت الفيلم ده في IMAX.

• 1 مفيد
• 0 غير مفيد