• Karim Medhat
• 08:34 صباحًا - 30 يونيو 2017
• نقد آخر لنفس المستخدم

فى البداية كدة احب نقول ان السقا اثبت وبجدارة انة بدون منافس فالاكشن وانة حتى لو عامل فيلم اكشن بس مفيهوش قصة هيعدى اى حد وهيبقا رقم واحد.

انا من الناس الى كانت متحمسة جدا جدا عشان اخش الفيلم دة خصوصاً بعد مشفت تمارين السقا واجتهاده عشان الفيلم دة بالاضافة لوجود امير كراره الى بعتبرة اكثر عنصر شدنى فالفيلم وكنت مستنى نزول الفيلم و واثق اوى فالشغل الى هيتعمل والحمد لله ظنى طلع فمحلة ودخلت الفيلم واتشديت من اول لقطة الى بعتبرها من اقوى اللقطات الاكشن الى اتعملت فالسنيما المصرية واتعمل فيها شغل حلو اوى .

الفيلم قصتة عادية نوعاً ما مش جديدة بس الاحداث والتمثيل وتوظيف كل ممثل فمكانة الصح دة الى بجد فعلاً خلى للقصة طعم ومحسسنيش انها فكرة عادية لان لاول مرة اشوف فيلم فى كمية الممثلين دول وكل واحد واخد حقة فالظهور.

ضيوف الشرف كل واحد متوظف فمكانة وسايب علامة فكل مشهد ظهر فية :

احمد فهمى بيومى فؤاد محمد عادل محمود الجندى باسم سمرة روجينا محمد فراج محمد شاهين محمود حجازى رغم ظهورهم فى مشهد واحد الا انهم سابو علامة فالفيلم ودة نادر جدا اما بيحصل فى فيلم عربى. بالنسبة للممثلين بقى :

احمد السقا : عالمى فأختياراتة كالعادة بغض النظر انى محستش بوجود عنصر الاكشن فى الفيلم اوى لان الفيلم غالب علية التشويق والمطاردات اكتر الا انة غير اسلوبة المعتاد والستايل الجديد عامل شغل.

امير كراره : بعد مسلسل كلبش مقدرش اقول عنه غير برافو عليه عشان قدر يخرج من الحتة الى اتحط فيها فالمسلسلات الى فاتت وقدر يثبت انه يقدر يعمل كذا دور مختلف وطول منتا بتتفرج ع فيلم هتبقى مستنى المشاهد الى بيظهر فيها وساب علامة عند الناس بالدور دة.

فتحى عبد الوهاب : اجمد حاجة فالفيلم بقى :D طول عمرى بقول عليه فنان من نوع خاص وبيقدر يعمل ادوار تشدك ويعلم معاك حتى لو هو مش البطل الاساسى .. هو محتاج بس يبعد عن جو البطولة الى بيهب معاه فجأة دة ويركز على شخصيات الى بيعملها مع وجود الحتة الكوميدى الى مش هتنساها خصوصا فالفيلم دة والى شاف الفيلم هيعرف قصدى :D.

غادل عادل : لا جديد.

احمد العوضى : النجم دة اتولد فالفيلم دة بغض النظر عن دورة الى مخدش حقة فية اوى فى مسلسل الحصان الاسود وعن ادوارة السابقة بس فعلا علق معايا فالفيلم دة وحسيت بوجودة كممثل وانفعالاتة الواقعية والكاركتر بتاعه فالفيلم اثبتوا وجود نجم تقيل جاى فالطريق . احمد زاهر : ضيف شرف بس ظهر فكذا مشهد ويعتبر من المحاورالاساسية فقضية الفيلم وعمل دور مزيج حلو اوى ما بين الشر والكوميديا .

مصطفى خاطر : نجم لسة بيظهر ومعنديش معلومات كافية عشان احكم عليه حالياً .

الخلاصة الفيلم يستحق انة يحصد الايرادات الى حققها ويستاهل يبقى رقم 1 مش عشان قصتة ولا حبكة الفيلم بس عشان الفيلم ككل ممتع ومفيهوش لحظة ملل بالاضافة ان كل ممثل خد الدور الصح وتوزيع الادوار كان ملوش حل ودة قليل اما بيحصل فى الافلام المصرية.

• 8 مفيد
• 4 غير مفيد