• Ebrahim Ashraf
• 01:02 مساءً - 23 اغسطس 2018
• نقد آخر لنفس المستخدم

(أظلم الأوقات في تاريخ الأمم هي الأوقات التي يؤمن فيها الانسان بأن الشر هو الطريق الوحيد للخير)

((تراب الماس))

افتتحاية مقبولة للفيلم، كانت هتبقي عظيمة لو كان في مشاهد لحوارات"حنفي الزهار" مع الجوهرجي " لييتو" عن جارتهم الست "حلاوة" بس 'احمد مراد' اكتفي إنه يفرجنا في البداية علي رتوش بسيطة من قضيّة (ناصر ونجيب).

أنتقال رائع من المخرج المتميّز "مروان حامد" الي فتره أحداث الفيلم و شرح كافي لحدوتة "حسين الزهار" لكن أهدر وقت طويل في وصف تفاصيل عادية وممكن تبان غير مهمة علي حساب وصف مثلًا تفاصيل دقيقة لجرائمة مش مجرد أسماء ناس ماتت وخلاص أو توضيح علاقتة مع زوجتة وأنها سابتهم لما عرفت إنه قاتل رغم أنها لو موجودة كان دورها فرق كتير جدًا في دراما الفيلم.

'ياسر' صديق 'طه' في الرواية كان هو المحرك الخفي للأحداث او كان الترس الصغير اللي من غيره المكنة (مبطلعش قماش) مجرد إختفاء خط أحداثه في الفيلم علي حساب ظهور خط أحداث جديد "لشريف مراد" الإعلامي الملوث السمعه إثر بالسلب علي الفيلم بشكل عام و علي خط أحداث "ساره" بشكل خاص و اللي نجحت الجميلة "منه شلبي" في تجسيد الشخصية و إبداعها في تصوير أنقلابات الشخصية علي مدار الأحداث ف أدئها كان الأفضل في الفيلم و من بعدها البطل " آثر ياسين" اللي جسد شخصية "طه الزهار" وصورها بإتقان شديد مستخدم برعته في ادء دور المضطرب.

مفيش شك ان "ماجد الكدواني" هو واحد من أحسن و أبرع الممثلين الموجودين في مصر دلوقتي, بس مفيش شك بردو ان شخصية "وليد سلطان" مكتوبه علي أنها تكون شخصية ظابط جاد و عنيف جدا كلب لمصالحة و شهاواته, لكن اللي قدّمه "الكدواني" هو شخصية ظابط ذكي جدًا لكن كوميدي و كوميدي حتي في أدق التصرفات و التفاصيل و ده مكنش مناسب او علي الأقل مقبول في رأيي .

بعد ١٦٥دقيقة من السرد الخيالي الغير ممل للأحداث أخيرًا ظهرت حبكة الفيلم العظيمة جدًا و المختلفة تمامًا عن الرواية و أظهرها "مروان" ببراعة شديدة في النهاية و تم مزجها مع موسيقي تصويرية متقلش عظمة عن النهاية و الحبكة لكن غاب عنه في رأيي أقتباس بعض مشاهد النهاية من الرواية و اللي كانت هتزود نهاية الفيلم بأدرينالين و ترقب أعلي.

وفي النهاية يبقي السؤال الأزلي ..! (هل السينما أعظم أم القراءة أفضل..؟)

((مش انا حلمت بيك امبارح))

• 5 مفيد
• 1 غير مفيد