كازابلانكا .. الطريق الى هوليوود

ملحوظة : هذا النقد مكتوب باللغة العامية حتى تسهل قراءته

كازابلانكا من بطولة أمير كرارة وغادة عادل وإياد نصار وعمرو عبد الجليل وأحمد داش ولبلبة ومحمود البزاوى وهاليت إرجنتش اللى هو السلطان سليمان بطل مسلسل حريم السلطان. الفيلم من تأليف هشام هلال مؤلف مسلسل حوارى بوخاريست والطبال لأمير كرارة وإخراج بيتر ميمي مخرج مسلسل كلبش ال3 أجزاء وكاتب سيناريو ومخرج فيلم حرب كرموز السنة اللى فاتت بردو لأمير كرارة. القصة : بتتكلم عن 4 هجامين بحر بيعملوا عملية مع بعض وفى واحد منهم بيموت غرقان فى البحر فا بيرجعوا من غيره وبعدين ال3 الباقيين بيتفركشوا وبعديها بفترة بيتجمعوا تانى علشان يعملوا عملية أخيرة وبعد كدة البوليس بيطب عليهم فا بيهربوا فا فى واحد فيهم بيتمسك وبيتحكم عليه بالسجن لمدة 3 سنين وبعد ما بيخرج بيبتدى يدور هو وصاحبه التانى على صاحبهم التالت اللى خد حقهم من العملية وكمان اخد اخو المسجون عنده لوى دراع وبيخليه يمشى فى سكة مش تمام وبيبتدى بطلنا هو وصاحبه يدوروا على صاحبهم اللى خد نصيبهم بعد ما عرفوا انه فى المغرب وبتبتدى الاحداث. انا شخصيا اول مرة اشوف عمل لهشام هلال بس واضح ان دماغه حلوة وانا ماعتقدش انى شوفت القصة دى قبل كده وبالنسبة للاخراج والتصوير فكانوا حلوين جدا ومشاهد الاكشن والمطاردات كانت متنفذة حلو وكان فى توازن بين الكوميديا والاكشن. وكمان احلى حاجة فى القصة ان النهاية مفتوحة وده كويس عشان لو عملوا جزء تانى. المونتاج ماكانش قطعات صريحة زى فيلم حرب كرموز وده طبعا شىء كويس انى احس ان الفيلم كله متصور 1 شوت. الاغنية اللى اشتغلت فى الفيلم لايقة على كانت لايقة على ستايل الفيلم. بالنسبة للتمثيل بقا .. أمير كرارة انا حاسه بيعرف يأدى وياخد راحته فى الكلام كده فى الادوار الشعبية اكتر من دور الظابط زى ما كان فى فيلم حرب كرموز مثلا اداؤه كان عادى جدا بس اداؤه هنا فى الفيلم ده ظبط جدا. إياد نصار كان برنس فى مشيته وطريقة كلامه واخر مشهد ليه فى الفيلم كان حلو جدا. عمرو عبدالجليل كان حلو جدا وكوميدى جدا وكذلك لبلبة اللى فاقت توقعاتى بكتير اوى وأدت كويس وماتضايقتش منها خالص. غادة عادل كانت تمام ودمها بردو كان خفيف وادائها احسن من فيلم هروب اضطرارى بكتير. هاليت إرجنتش انفعالاته كانت مظبوطه مش زعيق ونرفزه على الفاضى. أما بقا احمد داش فكان حلو جدا وانا شخصيا بحبه من ساعة فيلم لامؤاخذة. ضيوف الشرف كانوا تمام بس انا بصراحة مش فاهم ايه لازمة مشهد مصطفى شعبان. طبعا فى شوية حاجات سقطت منهم وكانت فصيلة سنة زى ان كرارة لما كان بيتخانق مع السلطان سليمان مانزلش دم والسلطان سليمان اتعور عادى مع انه المفروض كان بيضرب امير جامد فا انا مش عارف ازاى وليه هما مصرين ان امير كرارة يبقى سوبر هيرو وزى بردو ان كان فى لقطة كان واضح فيها اوى انهم بيضربوا بعض على الهوا وده يعيب المصور والمخرج بس الحمدلله احنا كنا فين وبقينا فين. فيلم كازابلانكا تجربة حلوة جدا وبتبين ان السينما فى مصر بتتطور جدا وفى طريقها للعالمية لان الافلام مؤخرا ابتدت تاخد سكة هوليوود حتى فى التريلرز بتاعتها وده تمام مش وحش. فيلم كازابلانكا فيلم حلو ياخد 8 من 10 لان بغض النظر عن ان امير كرارة ماتعورش فى المشهد اياه وان التلويش على الفاضى كان واضح الا ان كل الابطال كانوا بيمثلوا حلو جدا وعناصر الفيلم كانت متكاملة فا عوضت التسقيطات التافهة دى وانا بالنسبالى ان كازابلانكا احسن من فيلم حرب كرموز.

نقد آخر لفيلم كازابلانكا

عنوان النقد اسم المستخدم هل النقد مفيد؟ تاريخ النشر
كازابلانكا .. الطريق الى هوليوود Omar Sherif Omar Sherif 0/0 25 يونيو 2019
عبث محبب Saad M. S. A. Saad M. S. A. 0/0 16 يوليو 2019