رحلة في عالم الصياد

  • مسلسل الصياد من أول حلقه هيجذبك حتى لو مكنتش بتحب يوسف الشريف وبتابع أعماله لأنه مثير للفضول، عاوز تعرف إزاي الأعمى بيتصرف وكل ما هتشوف لقطه منه بالصدفه هتتعاطف معاه بشكل غريب خاصة انهم عملوا كام موقف ف البدايه له علاقة بالموضوع ده ومواقف محرجه لشخص أعمى فبيزيد التعاطف معاه.
  • بعدين لما تتفرج هتلاقي ان الموضوع واحده واحده بيبقى أكبر من كده بكتير، ويتحول عامل الجذب للصياد نفسه مين هوا أصلا وليه بيقتل الناس ومشاهد القتل اللي معموله بحرفية شديدة بتدخل المشاهد ف حالة من التوتر الرهيب وهنا المشاهد ف حالة تعاطف مع الضحايا وضد الصياد.
  • تبدأ المرحلة الثالثة لما سيف بيحكي ملاحقته للصياد وإنها السبب انه يكون أعمى وحلقات منتهى الإثاره والخوف والعبقرية ف جذب المشاهد وتضخيم كيان كبير اسمه الصياد والصراع بينه وبين سيف، ثم يستقر المشاهد ف النهايه ان الصياد مات فيظن ان الموضوع هدي شويه وان اللي بيقتل دلوقت هوا مجرد واحد بيقلدوا وطالما الصياد مش موجود هيبقى مفيش خطر كبير.
  • ولسه المشاهد بياخد نفسه بيتفاجئ ان سيف مش أعمى أصلا وبيتصاعد دور المحاميه مشيرة ( دينا فؤاد ) اللي عملت توتر رهيب ف علاقاتها بالظباط ومع سيف برده وأيضا الظابط طارق ( أحمد صفوت ) اللي من ناحيتة مش مصدق موضوع الصياد اللي سيف حكاه وتستمر بقيت الحلقات ف اننا بنكتشف ان سيف هوا الصياد وانه بيحاول يقتل الناس اللي قتلوا مراته وانه عنده ليست باسمائهم واحمد صفوت واحده واحده بيفهم ويجمع المعلومات.
  • ف نفس الوقت ان الدكتور رفيق ( محمد العمروسي ) اللي كان بيحب اخت سيف علياء ( ايناس كامل ) قلب الحوار تماما باكتشافه ان سيف مش اعمى وهكذا بقى الصراع بيستمر بين سيف والمحاميه من ناحية وبين الظابط طارق من ناحية أخرى ف حلقات أقل ما يقال عنها انها استثنائيه .
  • نيجي بقى لعوامل تميز المسلسل: أولا: المخرج أحمد مدحت عظيم بجد من كل النواحي الصوره والكادرات وزوايا التصوير وقفلات الحلقات ورتم المسلسل اللي تقريبا مبيهداش حاجه عظيمه بجد وإدارة الممثليين بشكل رائع جدا واختيار أماكن التصوير والألوان الغامقة اللي بتزود توتر المشاهد وتكنيك تصوير مشاهد القتل عالمي بصراحه. ثانيا: الموسيقى التصويريه أقل ما يقال عنها انها عظيمه بتدخلك ف عالم تاني عالم المسلسل مجرد ما تسمع موسيقى التتر بتنسى نفسك اصلا والتوتر اللي بتساعد ف خلقه ف اغلب المشاهد بجد الموسيقى ف المسلسل ده من أكتر الموسيقى التصويريه اللي ممكن تكون مؤثره ف عمل ف تاريخ المسلسلات عامة . ثالثا: طبعا السيناريو والحوار الرائع جدا جدا من عمرو سمير عاطف سيناريو متكامل حرفيا وبيرفع ليفل الذكاء بتاع السيناريو لمنطقه عاليه جدا جدا وتويستات مبنيه صح وشخصيات عميقة لدرجة انه ممكن يكون المسلسل الوحيد اللي هتتفرج عليه وتتعاطف مع كل الاطراف، هتتعاطف مع سيف اللي قتلوا مراته وبيحاول يجيب حقها وهتتعاطف مع الظابط طارق المنافس بتاعه لانك عارف انه ظابط محترم وشاطر وف اغلب الوقت هتبقى خايف عليه من ذكائه وف نفس الوقت متعاطف مع عليا اخت سيف اللي اكتشفت ان أخوها مش أعمى والصراع اللي بداخلها هل تعترف عليه ولا لاء وف كلا الحالتين مش هتقدر تلومها ومتعاطف مع حلا ( مي سليم ) اللي هيا بتحبه وبرده اكتشفت انه مش اعمى وهكذا بقى المسلسل عمل حاجه صعب تتعمل انك طول الوقت متعاطف مع الضحية والقاتل . رابعا: اداء الممثلين أولا يوسف الشريف دور رائع واستثنائي له وتعامل مع الدور بحرفية شديده جدا خلاك تتعاطف معاه ف البدايه علشان أعمى ومتشكش للحظه انه مش أعمى وطريقة مشيته والوقفه والنظرات وحركة دماغة حاجه جميله جدا ثم أقنعك انك تصدق انه ذكي وشاطر جدا لدرجة ان الصياد اللي محدش عارف يقبض عليه هوا الوحيد اللي يقدر يمسكه، ثم رجع تاني خلاك تتعاطف معاه لما اكتشفنا انه مش اعمى وانه بيجيب حق مراته والصراعات القويه جدا بينه وبين احمد صفوت مشاهد عاليه جدا جدا ومشاهد القتل ومشهد التحقيق ف العمليه مشهد عظيم اوي واحترافي لدرجه بعيده ومشاهده مع الدكتوره النفسيه جامده وقدر يقنعك خلالها انه رغم كل ده لسه جزء من ضميره صاحي ودي كانت اكتر حاجه مخلية المشاهد متعاطف معاه جدا واخيرا المشهد الاخير عظيم جدا جدا وهوا بيقتل الظابط الكبير وابتسامته اللي من خلالها تقدر تشوف فرحته انه تخلص منهم كلهم وف نفس الوقت لزته ف القتل. ثانيا احمد صفوت يا اخي ايه العظمه دي ايه الكاريزما دي واستايل لبسه مختلف عن الباقي وطريقة تفكيره وتحولات شخصيته بين شخص هادي وذكي وعارف هوا عاوز ايه لشخص تاني عصبي جدا وبيدافع عن الحق بضراوه بجد ممثل تقيل جدا ومن اهم عوامل نجاح المسلسل وحواراته سواء مع قاداته ف العمل او مع سيف كان رائع جدا والمشهد الاخير بصراحه ممثل خطير مش واخد حقه خالص. ثالثا دينا فؤاد رهيبه برده وشخصيتها المختلفة بين بداية المسلسل ونهايته تعرفك انها ممثله شاطره جدا . رابعا اسماعيل شرف ممثل تقيل اوي اوي ظهر كده خلق نوع من الارتباك للمشاهد كل مشاهده تقريبا عظيمه وكان من اكتر الشخصيات المثيره للجدل والفضول ف المسلسل . خامسا امير صلاح الدين وشخصيته المنفضه واللي مش فارق معاها الدنيا وطريقته ف رمي الايفيهات بجد عمل شخصيه مرحه ميزته ف المسلسل جدا . سادسا تامر ضيائي ممثل تقيل جدا وتحولات شخصيته عظيمه بين حبه لسيف وعلاقته بيه وبين انه ف وقت من الاوقات مبقاش مصدق كل اللي قاله ومنظره ف المشهد الاخير وهوا بيبكي وهوا بيقتل سيف مشهد رائع جدا . وباقي الكاست كله كان كويس برده لدرجه كبيره جدا . خامسا: الاستايلست والملابس كلها مختلفه تخليك تحس انك بتتفرج على عمل اجنبي ومتناسقه بطريقه رائعه مع الديكور والصوره بجد شغل عالي .
  • ف النهايه تقيمي للمسلسل 9.5 حابب اشكر كل القائمين على العمل ده عمل سيظل ف التاريخ حرفيا شكرا يوسف الشريف شكرا عمرو سمير عاطف شكرا جدا جدا أحمد مدحت واتمنى تتعاونوا تاني انتوا التلاته.

نقد آخر لمسلسل الصياد

عنوان النقد اسم المستخدم هل النقد مفيد؟ تاريخ النشر
مسلسل الصياد من وجهة نظر تقنية Mikel Simo Mikel Simo 14/15 16 يوليو 2014
افضل مسلسل في رمضان julian julian 2/2 10 اغسطس 2014
وجهة نظر .. Ahmed IssA Ahmed IssA 1/1 30 يوليو 2014
رحلة في عالم الصياد moaaz_anbar moaaz_anbar 1/1 11 يونيو 2020
حقوق الطبع محفوظة © 2024, شركة دملج (ش.م.م) ®
ملك وإدارة دملج ش.م.م: