Heart of the Beast (2026) قلب الوحش

أراء حرة

 [1 نقد]

رحلة بقاء متوقعة لكن تستاهل المشاهدة

• دعاء أبو الضياء
• 06:53 صباحًا - 25 سبتمبر 2026
• نقد آخر لنفس المستخدم

أفلام الصراع من أجل البقاء من أكتر أنواع الأفلام اللي اتعملت بأشكال كتير جدا، ولسه ممكن تتقدم منها حكايات أكتر، خصوصا لما تكون المواجهة مش مع شخص شرير، لكن مع الطبيعة نفسها بكل قسوتها. Heart of the Beast من بطولة براد بيت وإخراج ديفيد آير، بيحكي عن ضابط قوات خاصة وكلبه العسكري اللي بيلاقوا نفسهم عالقين في براري ألاسكا بعد تحطم طائرتهم، وبيبدأ صراعهم مع الطبيعة والظروف القاسية من أجل البقاء. الفيلم بالنسبة لي جميل وجيد، ومش من الأفلام اللي هقول إنها قدمت حاجة جديدة تماما، لكن قدر يخليني مستمتعة...اقرأ المزيد وأنا بتفرج عليه. وأكتر حاجة عجبتني فيه إن الحوار قليل، أنا شخصيا بحب الأفلام اللي مش بتعتمد على الكلام الكتير عشان تحكي قصتها، وخصوصا أفلام البقاء اللي المفروض إن الصورة والحركة والبيئة يكونوا هم اللي بيتكلموا. وطبعا من أقوى عناصر الفيلم تصوير الطبيعة، ألاسكا هنا مش مجرد خلفية للأحداث، لكنها تقريبا شخصية أساسية في الفيلم. الثلج، الجبال، الغابات والبرودة القاسية كلها بتخليك حاسس فعلا بحجم المعاناة اللي الشخصيات بتواجهها. لكن أكيد الفيلم مش خالي من العيوب، فيه مشاهد حسيتها غير منطقية، وفي مواقف كنت عارفة إنها مش هتحصل بالشكل ده في الواقع، لكن بصراحة كنت بتغاضى عنها عشان أكمل استمتاعي بالعلاقة بين جيمس وكلبه. وده في رأيي كان قلب الفيلم الحقيقي، العلاقة بين الاتنين كانت بسيطة ومن غير مبالغة، وكل ما الأحداث بتزداد صعوبة، بتبدأ تحس قد إيه وجود الكلب بالنسبة لجيمس مش مجرد وسيلة للنجاة، لكنه شريكه وصديقه الوحيد في المكان ده. المشكلة الوحيدة إن الفيلم متوقع جدا. تقريبا كنت عارفة أغلب المشاهد قبل ما تحصل، وكنت أقدر أتوقع إيه اللي هييجي بعد كده. يمكن لأن الفيلم معتمد بشكل أساسي على الرحلة نفسها، وعلى العلاقة بين جيمس والكلب، أكتر من اعتماده على المفاجآت. كمان الموسيقى التصويرية خدمت الأحداث بشكل واضح جدا، خصوصا في المشاهد اللي كان مطلوب منها توصل إحساس بالخطر أو الوحدة أو التوتر، لكن في بعض اللحظات حسيت إنها اتكررت أكتر من اللازم، وكان ممكن الاستغناء عن بعضها من غير ما يتأثر الفيلم بشكل كبير. أنا شايفة أنه فيلم بسيط، جميل بصريا، وحكايته الأساسية هي الصداقة بين إنسان وكلب وسط ظروف مستحيل تقريبا يتحملها أي حد.

• 0 مفيد
• 0 غير مفيد

أضف نقد جديد