الفنانة الفلسطينية ريم بنا تكتب : حوار عن الثورة في تونس ومصر .. حسب منطق ثلاثة أطفال فلسطينيّين

أفقتُ هذا الصباح .. على نقاش حاد وجدّي بين ثلاثة أطفال .. (الأطفال فلسطينية \ نصراويّة طبعاً) .. وهم يجلسون على مائدة الطعام عندي في البيت .. يشربون الكاكاو بالحليب ويأكلون البسكوت ..
يافا إبنة أخي فراس (5 سنوات) .. أورسالم وقُمران أولادي (توأم صبي وبنت .. 8 سنوات) .. كنت أسترق السمع إليهم وأنقل بالضبط ما دار من حوار أعتقد أنّه لا يقلّ أهميّة عن نقاشاتنا نحن الكبار ...
إليكم هذا الحوار الصباحي في أحوال المنطقة:
:)

يافا : يعني راح مبارك .. مش آه؟

أورسالم : آه راح خَلَص

يافا : يعني إسّا بمصر مْكَيْفين (فرحانين بالفلسطيني)

قُمران : وإحنا كمان مْكَيْفين (فرحانين بالفلسطيني)

أورسالم : كمان تونس ربحت 1 .. يعني فلسطين ربحت

(ملاحظة: أورسالم يعشق كرة القدم)

قُمران : لأ ولا .. تونس مش فلسطين(لأ ولَك)

أورسالم : ولِك بعرف بس تونس معانا ومش مع إسرائيل .. مش زعبع الكلب راح ؟(اختصار زين العابدين بن علي)

يافا : أنا مبسوطة عشان طلع مبارك من مصر

هنا تدخّلت لأنهم أرادوا أن ينتقلوا لموضوع آخر .. وأحببت أن أعرف فعلاً ما يدور برأس هؤلاء الأطفال.

ريم : ليش مبسوطة يافا عشان طلع؟

أورسالم وقُمران قاطعوها : لأنّو كان يسرق مصاري من الناس وصاروا فُقرا

يافا : لأنو ما كانِش يعطي مصاري للمُرضى وكان يخلّيهن فُقرا عشان هيك طَحوه (أي طردوه بالفلسطيني) بعدين راحوا عساحة كبيرة كبيرة وما ناموش لحد ما يروح حُسني مبارك ويِنْطَحى (أي يُطرد)

ريم : أورسالم وإنت ليش مبسوط عشان حسني مبارك طلع؟

أورسالم : عشان ما خلّالهن مصاري ولا يشتروا خبز ويضلهن فُقرا

قُمران مُقاطعة : وصاروا .. اللي بعثهن مبارك .. هدول اللي كانوا على الجْمَال .. يضربوا الناس اللي بالساحة

ريم : شو رايكو الوضع بمصر بدو يصير منيح؟

قُمران : مبلا .. لأنو بس ينطحى (يتم طرْده) ببطّل (لن يكون) في رئيس وبصيروا يطلعوا (أي يخرجوا) الناس وين بدهن

أورسالم : عشان راح وتخلّصوا منّو

يافا : عشان راح حسني مبارك .. روّح خَلَص

ريم : طيب يافا شو يعني اذا راح؟

يافا : لأنو راح بصير الوضع منيح

قُمران : لأنّو لما كان هو .. كان يبعث من عندو ناس شرّيرين يضربوا ويحرقوا وفي كثير تجرّحوا وماتوا .. وبعد ما هو يروح بصير كلشي منيح

ريم: بتحبّوا مصر؟

الكل بصوت واحد: آه

ريم : ليش بتحبّوها؟

يافا وقُمران وأورسالم : عشان طَحَتو وربحوا ..(أي مصر طردته والهاء تعود لحسني مبارك)

أورسالم : وإحنا منحبها من زمان .. حتى لو ما طحاطوش (أي حتّى لو لم تطرده مصر)

قُمران : ولأنهن قوايا كمان .. منحبهن

يافا : عشان تخلّصوا منّو

ريم : ليش لازم يتخلّصوا منّو؟

يافا : لأنّو كان يضايق (يُسبب الضيق ويزعج بالفلسطيني) ويوخد مصاري من الناس

قُمران : عشان كان يمنعهن يشمّوا الهوا وينبسطوا .. ولا يخلّي الولاد الصغار يروحوا عالمدارس

أورسالم : عشان ما كان يخلّي المصريين يناموا ويرتاحوا شيلي (بالمرة) .. وعشان صارلهن 30 سنة بلا أكل وبلا مَي وبلا نوم

والثلاثة أجمعوا بالرأي : لو ما شالوهوش (أي لو لم يخلعوه بالفلسطيني) كان صاروا فُقرا أكثر ومش راح يعيشوا .. وكان ببطّل في إشي إسمو مصر .. بس إحنا منضل نحب مصر كثير

ريم : طيب آخر سؤال .. مين عمل الثورة؟

أورسالم وقمران ويافا بصوت واحد : مـــصـــــــــــــــر

تركوا الطاولة بعد أن شربوا الكاكاو بالحليب وأكلوا البسكوت .. وخرجوا ليلعبوا مع أولاد حارة السوق

13-2-2011

الحوار دار في بيتي الجديد في الناصرة - فلسطين