خالد دياب يكتب : الضباط السنافر وفيلم ''احمي بيتك ''

خالد دياب

قمة الغباء في السينما ان تنتج فيلما فيسقط جماهيرا ويفشل فشلا ذريعا ثم تنتج له جزء تاني...طبعا الي يفكر بالطريقه دي يبقي ناقصله بردعه بس ويخش حكومة شفيق. تم انتاج فيلم "احمي بيتك" الجزء الاول يوم ٢٨ يناير بانتاج ضخم من كامل ابو علي السينما المصرية عمو حسني مع سيناريو وحوار حبوب العادلي والفيلم تدور احداثه حول الفوضي العقابيه التي أحدثها عمو حسني وحبوب بسحب رجال الشرطة وفتح السجون لاخراج البلطجيه لينتشرو ويرهبو الناس بل ونشر الآلاف من عساكر أمن الدولة بسيارات لاطلاق النار في الشارع لاخافة المواطنين حتي يلقي الجميع اللوم علي متظاهري التحرير بأنهم سبب الفوضي لتكون رسالة الفيلم هي الحرية أو الامان وفشل الفيلم ولم يدخله او يصدقه الا القليلين.
ذهب المنتج عمو حسني منتج الجزء الأول اللي طبعا مدفعش مليم في الفيلم بعد اخترع طريقة جديدة في الانتاج وهو الانتاج علي حساب المشاهدين وهي احنا( علي حساب الشعب) لنري الفيلم يعاد انتاج جزء آخر له باسم "احمي بيتك" الجزء التاني ...لكن من هو المنتج ؟؟ لا يوجد منتج يمكن انتاج الجزء الثاني سوي اصحاب السلطة العليا..ايه ده قصدك الجيش؟؟
لأ طبعا الجيش المصري الذي نحبه ونقدره مابينتجش الأفلام الهابطة دي. طب قصدك مين يا ريس؟؟ اصابع الاتهام تتوجه للسلطة الثانية .. يعني مين !! يعني سبكي السينما المصريه الجديد ... الفنان شفيق السبكي الذي استعان في كتابة هذا الفيلم بالسيناريست الذي شارك في الحوار في الجزء الاول من فيلم احمي بيتك وهو السيناريسيت الشاب محمود وجدي الذي شعرنا معه فعلا باختلاف عن الجزء الاول فالشرطة الان غير متواجدة في الشارع لكنهم يظهرون في التليفزيون يتحججون كما ان وجدي وجه بعض الكومبارس البلطجيه الي اتوبيسات المدارس ليخيفو اولياء الامور لتثور الناس ضد متظاهري التحرير. وكما قلت سابقا سقط الجزء الاول من الفيلم ويسقط الان الجزء الثاني بجدارة بالرغم من رغبه شفيق السبكي في ابقاء الفيلم اكبر فتره في السينمات.

لي اصدقاء واقارب ضباط شرطة وبحبهم والله العظيم ونفسي أول واحد يرجعو الشارع عشان نفسنا كلنا نعيش في أمان واستقرار و المفاجأة ان هم كمان نفسهم يرجعو....طب ايه الي مانعهم ؟؟ الي مانعهم هو الجزء التاني من فيلم احمي بيتك ..السيناريست مقالش للضباط ارجعو قالهم مثلو انكو عايزين ترجعو بس مش عارفين طب قامو سألوه ولما يسألونا مش عارفين ترجعو ليه نقول ايه يا حودة ؟؟....هنا حوده تقريبا جالو تليفون وقرر يكتب المشهد ده بعدين فالضباط معرفوش لما يسألوهم مش عارفين ترجعو تاني يقولو ايه وطبعا القصة ما انتهتش.

طلع ضابط مع خيري رمضان امبارح وانا لا أشكك فيه لكن دعونا نروي الاحداث...مصر النهارده عمل لقاء مع ضابط محترم وده اكيد..بس لقيت مصر النهاردة عامل تقرير فيه ناس عامله مظاهرة وشايله لافتات بتشيد بالضابط...طب ايه سبب المظاهرة قالك انه مواطن لقي العسكري بتاعه بيجيب في كيس بعض الاغراض الشخصية للضابط فعرف انه الضابط مقدم علي اجازة فعملو مظاهرة عشان مايطلعش اجازة سنة....عصرت علي نفسي ٢٥ لمونه لغاية ما حمضت طبعا مش قادر اصدق...لاني انا مثلا عمري ما عملت مظاهرة عشان ضابط القسم الكويس عندنا كان هايطلع اجازة ..المهم قولت يا واد طنش دي وكمل يمكن أهل المنطقة بتاعة الضابط كلهم خريجين اقتصاد وعلوم سياسية ...الضابط اتكلم وانا سمعت لغاية ما وصلنا لنقطة الفرقان..والسؤال بيقول للضابط - ليه انتو مش متواجدين في الشارع - فاكرين !! ده السؤال الي جه للسيناريست وجدي فيه تليفون فمردش فيه علي ابطال الفيلم لنسمع رد الضابط - الضباط خايفين من نظرة الناس ليهم - قولت نعمممممم؟؟ علي اساس ان الضباط دول مرهفي الحس والمشاعر وقلبهم قلب خساية ولا ايه مش فاهم؟؟ خايفين من ايه يا حبة عيني؟؟من نظرة الناس!!...يعني تسيبو الناس تموت عشان خايفين من نظرتهم ليكو..يا سلام علي المنطق !!
ده عذر اقبح من ذنب ... وبعدين ايه ؟؟ خايفين ؟؟عيب..عيب ده انتو ضباط شرطة ... ماشوفتوش رجالة مصر في اللجان الشعبية شباب مصر الي عمره ماشال سلاح نزل ومخافش من السنج والمطاوي وانت خايف من نظرة الناس!! ماشوفتوش الشباب في الزمالك لابسين شورتات وماسكين كلب لولو ويقولك معاك آي دي ومخافش من سنجه ومطوة؟؟ يعني الفرافير مخافوش انتو بأه ايه ؟؟. ضباط من السنافر؟؟ عايزينا نتحايل عليكو !! طب تعالو وهانديكو شكليته.... استرجلو شويه مترددوش جملة خايفين من نظرة الناس دي...وبعدين نظرة الناس دي انتو الي عملتوها ودوركو دلوقتي تغيروها بمعاملتكو مش بهروبكو...الي عنده رسالة فعلا عايز يأديها الناس كلها هاتديله تعظيم سلام وهاتبصله احسن نظره. وكلامي ده كله معناه انزلو وماتسمعوش كلام السيناريست الشاب حودة وجدي الي بيقولكو مثلو انكو عايزين تنزلو...حوده في طريقه للزوال لأنه خسر الناس لما كذب ونفي كل الجرائم عن الشرطة مع انه كان مفروض يقول هانحاسب المتورطين وكان مفروض يعتذر للشعب المصري الطيب الي بيسامح مهما حصل. بقول لكل ضابط شرطة اياك تمثل في الجزء التاني من فيلم احمي بيتك وبدل الحجج الواهية و جملة نظرات الناس والكلام الاهبل ده استرجل كده واستجدع...طبعا مش بقولك اشرب بيريل بقولك عيش لرسالة ...ورسالتك أمن الناس.. انزل يا ضابط انزل يا مصـــــــــــــري... بأعلي صوتي يا ضابط مصــــــــــــــــــــــــــــــــــــري سامعني ؟؟؟ انزل يا مصري احمي اهلك واختك وناسك واصحابك وبلدك...احمي مصر.