جيهان فاضل تكتب : عسكر حتى الثمالة

جيهان فاضل

إلى المجلس العسكرى الموقر ...من مواطنة كان كل معلوماتها عن الجيش فيلمين أبيض و أسود وأغانى عبد الحليم.دلوقتى و بفضل الشو الرائع اللى تكرر كذا مرة فى ميدان التحرير,أتعرفنا على التلت سبعات و المظلات و المدرعات و غنى عن التعريف طبعا الشرطة العسكرية.و رغم عجزى عن فهم أشمعنى بتبعتلنا أحسن رجالة عندك و بتستخسرهم فى البلطجية المنتشرين فى أنحاء الجمهورية.يعنى مثلا عندك أحداث أمبابة...فين بقه قواتك الخاصة ؟ ولا دول مصروفين لينا أحنا بس؟

إلى المجلس العسكرى الموقر...مش حقولك رفقا بالمدنيين,لأننا نحسنا من عشرة الشرطة,لكن رفقا برجالتك...متتكش عليهم قوى...معظمهم لسه بخيره ومش حيستحملوا كتير.صدرتهم لينا فى ميدان التحرير و فضلنا أول عشر أيام نبص لبعض ومحدش فينا فاهم أحنا أيه ,أصحاب و لا أعداء؟ (تمام زى الكلبة بتاعتى أول مرة قابلت فيها ضفدعة).دلعناهم وبقينا نبعتلهم أكل و شرب و كنا مستعدين حتى نغسلهم خلجاتهم لو لزم الأمر.ده حتى لما هجم البلطجية و قالولنا أحنا على الحياد علشان العقيدة القتالية العسكرية,قلنا كله إلا العقيدة العسكرية...سيبولنا المعركة دى و شايلينكم للتقيلة.طب أيه اللى أتغير...راح فين الحياد لما بعتولنا قوات النينجا ترتلز الخاصة بتاعتكم يفضوا الأعتصام والشرطة العسكرية تلم و تسحل ع المتحف و حتى الحرم الجامعى مسلمش.كل ده و زعلانين أن شوية ضباط خدتهم الجلالة و قالوا لروحهم هوا أحنا بقينا بنشتغل أيه بالضبط.و فى يوم ما طلعتلوش شمس نزل الجيش على كل شكل و لون يلم أخواته م الشارع.طب بالمنطق كده لما أبعت الضباط يرفعوا السلاح على أخواتهم اللى أنضموا للثوار يبقى أنا بعمل فيهم أيه؟ بلبسهم طرح.و المدنيين اللى ف النص دول أيه؟صراصير؟سبعين مصاب و عشر قتلى...دى أسمها خساير حرب.لا المعتصمين ولا الضباط كانوا مسلحين...يعنى واحد تلات سبعات كان يقوم باليلة و من غير الفضايح دى كلها.

إلى المجلس العسكرى الموقر...الناس بقت مخنوقة ع الأخروحاسسين أن الثورة أتسرقت منهم والناس مش هابلة وفاهمة كل حاجة و مش مصدقة أى حاجة م اللى بتتقال فى الأعلام وبيتريقوا ع الأغانى بتاعتكم و خصوصا "جيشنا يا جيشنا يا أحسن جيش" و الحقيقة أنها وحشة قوى وأوحش حتى من "شهداء 25 يناير ماتوا فى 25 يناير".أحنا تعبنا قوى وصوتنا أتنبح ولا حياة لمن تنادى,مافيش حد بيتحكم عليه اليومين دول غير الثوار...الباقى كله مؤجل مؤجل مؤجل.

علشان مطولش عليكم أنا كنت جايبة لولادى بدلة شرطة و بدلة جيش يلبسوها ف العيد ... أخدها من أصيرها و أجيبلهم بدلتين زرق أحسن؟؟؟