محمد دياب يكتب: كلام يحببك في البلد تاني

اقري المقاله لآخرها و أوعدك هتتبسط

أي حد منصف لازم هيبقي عارف إن الناس اللي ظروفها صعبه زادت جداً بعد الثوره. من العاملين في مجال السياحه لعمال اليوميه لحتي المرضي اللي عايشين علي التبرعات ... ده بنوك الدم فيها نقص حاد... للأسف حاله المتابعه الدائمه للأخبار و القلق اللي مسيطر علي الشارع المصري من المستقبل المجهول خلانا كلنا نبقي مقصريين في حق اللي محتاجيينا قوي

المشكله التانيه ان خوف معظمنا من المستقبل بيخليه فوراً يمسك في القرشين اللي معاه ... فإتعقدت الأمور ما بين ظروف اقتصاديه صعبه و مانع نفسي مخلي الناس متساعدش زي الأول ... و بالتأكيد ده ليه علاقه بنسب الجرائم اللي بتزيد

محستش ان للآيه دي توقيت افضل من دلوقتي ”لن تنالوا البر حتي تنفقوا مما تحبون" ..... المصريين كرما و طبيعي تلاقي كل واحد بيطلع من العشره جنيه الزياده ... بس للأسف في ثقافتنا ما بنشوفش تشجيع ان الواحد يطلع من العشره جنيه اللي معاه ... من تحوشه العمر ... من الهدوم اللي بتحب تلبسها مش القديمه ... انك تقسم رزقك، او تقلل ماللي بتاكله او تصرفه او تلبسه عشان اللي أقل منك ... مع إن الآيه واضحه و في احد التفسيرات "البر" هو الجنه

طب الي يعوزه البيت يحرم علي الجامع ... طبعاً ده كلام أناني لأقصي درجه و ملوش دعوه لا بإسلام ولا مسيحيه ... و الإنجيل هو كمان بيقول "ابسط يدك للفقير لكي تكمل بركتك" (سفر يشوع بن سيراخ 7: 36 "تَصَدَّق مِن مالَك، ولا تُحَوِّل وجهك عن فقير؛ وحينئذٍ فوجه الرب لا يُحَوَّل عنك" (سفر طوبيا 4: 7)

المهم نيجي للأفعال عشان الإيام دي معظمها كلام و مفيش فعل: مبدئياً انا بفكر نفسي زيكوا و شايف نفسي أكتر واحد مقصر خاصه ان ظروفي ميسوره الحمد لله... بس فجأه انا إفتكرت "بل جيتس" و حسيت انه ممكن يساعدنا!!! بل جيتس هو أغني انسان علي الارض لمده تقارب العشرين سنه ... و بالتأكيد مش قصدي انه يساعدنا بفلوسه

بل جيتس قرر مؤخراً انه يتبرع بتسعين في الميه من فلوسه للأعمال الخيريه... قيمه اللي عمله مش بس في الفلوس اللي اتبرع بيها ... بل في المثال اللي إداه للبيليونيرات في العالم كله

قصدك ايه يعني؟؟؟؟

محتاجين أمثله لأعمال خير تبقي علنيه عشان الناس تتحمس و تقلدها

يا سلام .. امال ايه الكلام عن ان الخير اللي بتعمله لازم يبقي سري وإن ايدك اليميين متعرفش ايدك الشمال طلعت ايه؟؟

الرد بالآيه دي "الذين ينفقون أموالهم بالليل والنهار سرا وعلانية" الإنفاق في العلن حاجه مطلوبه زيه زي الانفاق في السر و كانت بتحصل ايام الرسول بالتوازي مع الانفاق في السر ... و الدليل كميه القصص عن الصحابه اللي انفقوا مالهم كلوا علي الدعوه .. كنا هنعرفها ازاي لو مكانتش في العلن ... و افتكر تأثيرها الإيجابي عليك لما تسمع عن بشر زيك عمل حاجه خير بتبقي عاوز تقلده ...أما اللي بيقول في العلن عشان الفشخره و التباهي حسابه عند ربنا و احنا مش شغلتنا التفتيش في النوايا

يعني انت عاوزني اجري ازعق في الشوارع و اقول انا جدع انا طلعت ١٠٠ جنيه امبارح؟

أكيد لأ. بس امبارح بمجرد ما طلبت من ناس علي تويتر و فيس بوك يقولوا حاجات ايجابيه عملوها و بدأوا يشاركوها علي إستحياء ... رد الفعل كل مذهل. كميه رهيبه من الناس تأثرت و حست انها مكسوفه و وعدت تعمل خير تاني يوم، بل ان معظم الناس كتبت انها مش هتنام إلا لما تفضي نص دولابها و تطلعه لله

ايه رأيكوا نشارك مع بعض قصص ايجابيه انت عملتها أو حد تعرفه ... و الله اعظيم تأثيرها الإيجابي لا تتخيله علينا كلنا .. انا شخصياً محتاج تشجيع منكوا عشان متخدعش في نفسي و افتكر اني عامل اللي عليا

متكتبش اقتراحات .. اكتب حاجه انت عملتها او خدت علي نفسك وعد تعملها .. اكتبها في التعليق تحت .. أو لو انت علي تويتر استخدم الهاشتاج ده#Kheer2Share

اسمحولي هبقي اختار كل شويه بعضها و اشاركه معاكوا ... و ممكن تبقي بدايه لإرجاع روح الثوره الحقيقيه

---

و دي امثله من كلام الناس كتبته امبارح ... كلام يحببك في البلد تاني

نفسي اعمل حاجه بجد اكبر من البس! انا كل ما يجيلي فلوس بتبرع بنصها نفسي اشوف الناس دي مبسوطه و مرتاحه

أكتر حاجة أثرت فيا لما الشغالة اللى عندى سمعتنى بكلم حد عن حملة كساء لقيتها تانى يوم جايبالى شنطة سفر فيها هدوم عيليتها

القرضاوي افتى بالتبرع بتكلفة الحج والعمرة السنة دي وربنا يحسبها حجة او عمرة، انا عملت كده

اعرف واحدة قررت مجبتش العربية الجديدة اللي كانت بقالها سنة بتخطط تيجبها وقررت تتبرع بتمنها اللي حوشته

انا ماماكانت بتخلينا كلنا كل شهر نطلع مبلغ منقولش عليه من مصروفنا ونحطه في حصالة للبيت كله واما نزلنا مصر اتبرعنا بالمبلغ ده

قررت بعد الثوره و لمده سنه اني اطلع ٢٠٪ من اي مليم يدخللي للفقرا

مكنتش ناوي اقول بس بعد الثوره مكسوف اجيب عربيه غاليه و اشتريت عربيه مستعمله وطلعت الفرق لله

أنا كنت ناوية أجيب موبايل بأربع تلاف جنية بس بعد اللي قريته أنا مكسوفة من نفسي هجيب موبايل أقل وأستخدم الفلوس في شئ خير

انا اتأثرت .. هفتح الدولاب و هطلع من الهدوم اللي بحبها

انهارده خدت ولادي و ونزلنا جبنالهم هدوم مع ولاد اللي بيشتغلوا عندنا ... مفرقتش بشتري ايه لمين

في الجامع كانوا بيلموا فلوس للصومال فالشحاتة قالتلهم ساعدوني فقاللولها دي فلوس علشان هما بيموتوا من الجوع راحت أدتهوم كل الي الفلوس الى معاها...حصل بجد

في شركتنا لمينا تقريبا 175 الف جنيه للصومال من اول رمضان غير 500 شنطه رمضان اتوزعو هنا

انا و صحابى بنجمع اللبس اللى الناس مش بتلبسة بس حالتة حلوة و بنبيعوا باسعار قليلة و بناخد الفلوس دى نحطها فى حاجة خير تانية

اعرف واحد مش عاوز يقول اسمه بيفكر يتبرع بنصف ما يملك عشان اللي ظروفهم تأثرت بعد الثوره

بكره كنت نازله اعمل شوبينج، بس ضميري وجعني فهستعمل القديم و هطلع اللي هشتريه جديد

وقت ١٨ يوم بتوع الثوره كان معايا ٧٠ الف جنيه فقط لاغير. طلعت ٣٥ الف تبرعات

رجل الاعمال المصري حسن عباس حلمي بمبلغ 250 مليون جنيه لصالح مدينة زويل للعلوم

أنا النهاردة لما جبت لبس العيد جبت تيشيرتين.....هالبس واحد و اتبرع بالتانى ان شاء الله

أنا وعائلتي اتبرعنا أول رمضان بشطنة سفر كبيرة فيها هدوم، وكرتونين لعب كتير كانت عندي ومالحقتش ألعب بيها، كنت فرحانة أوي

اخواتي كانوا جمعوا هدومهم انهارده عشان يتبرعوا بيها و انا كنت مكسل، هقوم دلوقتي الم هدومي

اعرف واحد كان قرر يبيع فيلته و يسكن في شقه و يتبرع بالفرق للي ظروفهم اقل منه

و الله العظيم دة حصل معايا أول رمضان.. طلعت زكاتي المتواضعة بعدها بخمس أيام جالي أكتر منها من حيث لا أدري

انا كنت محتفظه بهدوم امي المتوفيه عشان افتكرها، لكن من الواضح ان تبرعي بيها لشخص آخر هيكون افضل

اهو بالكام تويتة دول فتحت الدولاب وطلعت نصه ومعظم اللى طلعته مستخدمتوش من اكتر من سنة

يمكن مرضي منعني لكن كلامكم عرفني ان حكاية تعبي دي زي حجة البليد.هعمل زيكم وفي ألف طريقه اعمل بيها خير من مكاني شكرا ليكم