مي عز الدين تعتبر عرض"وعد"على"2 مصر MBC" اختبار لها ولقدرها عند جمهورها

مي عز الدين

طالبت النجمة مي عز الدين إدارة قنوات "MBC"، بزيادة عرض مسلسلها "وعد" على "MBC مصر2" وعرضه ايضًا على قناة "MBC مصر"، لأنه يعرض فقط على "MBC مصر 2"، خاصة أنها قناة جديدة لا يعلم عنها وعن ترددها الكثير من الجمهور.

وكتبت مي عبر حسابها الشخصي بموقع إنستجرام: "أنا قضيت اليومين اللي فاتو بحاول أطالب إدارة قنوات Mbc مصر بزيادة إعادة المسلسل، وعرضه على قناة Mbc مصر كمان، لأنه بيتعرض على Mbc مصر 2 فقط ودى ناس كتير مكانتش تعرفها ولا منزلاها".

وأضافت مي "أن المسلسل الوحيد اللي من إنتاج شركة تابعة ليهم، وبالتالي كان من المنتظر الاهتمام بعرضه على قنواتهم الاثنين، ومع ذلك مش راضيين يخلوه بيتعرض على القناتين بتوع Mbc مصر، وسايبينه على Mbc مصر 2 بس".

وتابعت: "فى الآخر الرسالة الوحيدة اللي وصلتنى، إن ده مقصود علشان دي الفرصة إن القناة تتعرف، يعني أنا كده مطلوب مني أقوم قناة لوحدى تمامًا وأنا بقول لــmbc قبلت المسؤولية وبإذن الله ربنا يكرم، والقناة والمسلسل يتشافوا، والحمد لله فيه علامات باينة من كم الإعلانات اللي جه من بعد أول حلقة للمسلسل".

وأوضحت مي قائلة: "أنا هعتبره امتحان ليا، يعرفنى قدري عند الناس، وهل فعلا بيحبوا مسلسلاتي أو لا، ونسبة الجماهيرية اللي وصلت لها أيه، مع أني مهما كان ليا جمهور، أكيد كنت أتمنى أني أتشاف من الناس اللي مش من جمهوري، لأن ساعات بتكون كمشاهد ملكش في ممثل، لكن لو قابلت حلقة لمسلسله بالصدفة وعجبتك، بتقرر تتابعه وده فى الآخر بيبقى خلاني كسبت مشاهد جديد بقى بيحب يتفرج على أعمالي، وده طبعًا مش هيحصل السنة دي، لأن مفيش حد بيبقي معدى وبيشوف القناة دى بالصدفة. الناس لسه أصلًا بتتعرف على طريقها من خلالنا وبينزلوها".

واختتمت مي :" لكن قدر الله وما شاء فعل، و بالتالي عندي طلبين أولًا بطلب من جمهوري وروابط الفانز بتاعتي تساعدني في نشر تردد القناة لكل الناس اللي مش عارفة تجيبها، وبطلب من صحافتنا تشهد إن أنا بدأت رمضان بقناة كم الناس اللي عارفها قد أيه و صفحتها حتى على الفيسبوك فيها كام، و بعد رمضان تقولولي بأمانة هل قدرت فعلًا في ظل الظروف دي أنجح ولا لأ. و متابعة نسبة مشاهدة القناة على آخر رمضان هتكون وصلت لأيه، ومشاهدة المسلسل على موقع شاهد دوت نت وصلت لأيه، لأنه المكان الوحيد اللي الناس تقدر تشوف الحلقة فيه لو موصلوش للقناة. شهادة الصحافة و الجمهور ساعتها تعويض يكفيني".