هنا شيحة ترد على تصريحات ماجدة خير الله: "خليكي في حالك وتحرّي الصدق"

هنا شيحة ومحمد خان

ردّت الفنانة هنا شيحة على تصريحات الناقدة ماجدة خير الله والتي قالت فيها إن "هنا" طلبت الحصول على مبلغ مالي مقابل الظهور بفيلم وثائقي عن المخرج الراحل محمد خان.

وكتبت "هنا" عبر حسابها الشخصي بموقع "فيس بوك": "كل واحد عايز يعمل نفسه العالم بحقيقة الأمور تمام الأستاذة المبجلة ماجدة خير الله.. تبرعت بنشر بوست علي الفيس بوك يخصني ويخص علاقتي بأستاذي محمد خان عن فيلم تسجيلي اتعمل من إنتاج Ontv.. وعن قد إيه هي مستغربة إن بطلات خان مش موجودين في الفيلم!! وأعتقد إن أ ب صحافة إن حضرتك قبل ما تنشري حاجة لازم تتحري من المصدر ولا إيه؟ والرد اللي قالهولها المعد والمخرج المغمور أحمد فوزي.. أني طلبت ١٠٠ ألف جنيه لتصوير ١٠ دقائق عن تجربتي مع الأستاذ خان.. تمام".

وأضافت "هنا" قائلة: "أحب أقولك يا ماجدة.. خليكي في حالك وقبل ما تنشري حاجة تحري الصدق..ثانيًا.. المعد والمخرج أحمد فوزي.. أعتقد أن مدير أعمالي فهّم حضرتك إن حالتي النفسية في وقت تصوير فيلمك كانت لا تسمح.. وما طلبش فلوس أصلا من حضرتك".

وتابعت : "ثالثًا.. طلب فلوس أو لا دي حاجة مسئول عنها مدير أعمالي وتخص ظهوري الإعلامي في القنوات والأعمال الفنية وماليش علاقة بيها وده دوره و متخصش حضرتك يا أستاذة من الأساس.. رابعًا والأهم ..محمد خان..أكبر وأهم من فيلم تسجيلي يتجاب فيه ناس يتكلموا عنه وهما أصلا كانوا مزعلينه في حياته ومش مهتمين بشغلهم معاه من الأساس ..أنا مش محتاجة أشرح وما كنتش ناوية أرد أصلاً".

واختتمت: "بس في فرق كبير لما يكلمني الأستاذ الناقد أحمد شوقي ويطلب مني أكتب عن أستاذ خان في عز وجعي وصدمتي وأعملها من قلبي وأعبر عن إحساسي بالفقد والألم ولما يكلمني معد برامج زنان عايز يتشهر والنَّاس تتكلم عن قد إيه هو بيحب خان.. علي فكرة خان مش محتاج حاجة، خان عارف مين بيحبه ومين كان بيتملقه.. مش محتاج فيلم تسجيلي يتكلم عنه.. هري علي الفاضي."