حسن الرداد يوجّه رسالة لعمرو يوسف والصحفيين بعد أزمة خبر المخدرات الكاذب

حسن الرداد

وجه الفنان حسن الرداد الشكر لكل الصحفيين الذين تحروا الدقة أثناء تناولهم شائعة القبض على صديقه الفنان عمرو يوسف، وزوجته الفنانة كندة علوش، بتهمة حيازة مخدرات.

وكتب "الرداد"، عبر حسابه الشخصي بموقع "إنستجرام": "عايز أشكر الصحفيين المحترمين اللي بيراعوا ضميرهم وبيحترموا شرف مهنتهم، ولم يتناولوا الخبر الكاذب الملفق اللي تداولته بعض المواقع عن الزميل والأخ والصاحب والنجم عمرو يوسف وزوجته".

وأضاف "الرداد": "طبعا الخبر اتنفى وكل حاجة، لكن هو بقى أي حد عايز يكتب أي حاجة يكتبها لمجرد إنه شغال في جريدة أو موقع إلكتروني؟ هل الفنان مباح إنه يتلفق له أي خبر لمجرد إنه مشهور علشان الجريدة أو الموقع يعمل فرقعة صحفية؟".

وتابع: "عمرو يوسف من أنقى وأطيب وأكثر الناس احتراما وأخلاقا هو وزوجته العزيزة، مش بقول الكلام ده عشان صاحبي، لكن الموضوع أكبر من مجرد خبر خايب نزل عن عمرو، كده بقى أي حد عايز يكتب عن أي فنان أي تهمة يكتب براحته ويحاول يشوه سمعته على مزاجه، علشان كده لازم محاسبة كاتب هذا الخبر حتى يكون عبرة لغيره، لأنه في البداية يسيئ لكل الصحفيين المحترمين الشرفاء اللي بنحترمهم جدا قبل أن يسيئ للفنان المنسوب إليه الخبر، وعايز أقول للمحترم الخلوق عمرو يوسف، معلش ضريبة الشهرة يا صاحبي".