وليد منصور لمحمد رمضان: "أنت رمز للإسفاف وبتفكرني بالمجانين"

أصدر المنتج وليد منصور منتج فيلم "البدلة" من بطولة النجم تامر حسني بيانًا صحافيًا عبر حسابه الشخصي على "فيس بوك" هاجم فيه محمد رمضان بضراوة جراء إرسال شقيقه محمود رسائل عبر تطبيق "واتس آب" لبعض الصحافيين اتهم فيها وليد منصور بتزوير الإيرادات.

وكتب منصور في بيانه، "رسالة موجهة من المنتج وليد منصور إلى محمد رمضان، وصلني إنك بتبعت رسائل من تليفونك الشخصي تتهمني فيها بتغيير أرقام الإيرادات، مكنش نفسي أرد على شخص زيك رمز للإسفاف علشان مخرج العمل ومنتجه أصدقاء محترمين، بس إنت زودتها قوي يا حمادة".

وأضاف منتج البدلة : "أولًا إنت إسمك لازم كل مصر تغيره لمحمد مرضان، لإنك بتفكرني بالمجانين اللي ماشين في الشارع ومش عايزين يصدقوا إنهم مجانين، فارتاح يا حمادة محدش عاقل هيصدقك، عمرك ما كنت رقم ١ في الإيراد، وعمرك ما كنت أحد نجوم الصف الأول وإنت عارف إن السبب إن فنك هابط يا مرضان وملامحك للأسف متعرفش تعمل غير دور المدمن أو البلطجي أو إرهابي أو حرامي، أنا كان نفسي متكلمش عنك لأنك أصلًا بالنسبالي وبالنسبة لكل الشعب الراقي المحترم أكذوبة، وإنت عارف كويس إن أفلامك طول عمرها بتفشل قدام النجوم المحترمة، زي السقا وعز وتامر وأستاذ عادل إمام، نصيحة يا مرضان روح إتمرن تمثيل بدل ما انت أداءك واحد في كل أدوارك".

وتابع وليد "يابني إنت طبعًا هتموت عشان مش عارف تشتري فيوز (مشاهدات) زي أغانيك الهابطة، فمفضوح قوي قدام الغلابة اللي مصدقينك اللي بينقرضوا واحد ورا التاني، يا ولا قسمًا بالله لو لقيتك بتهرتل على أي حد تاني هيكون ردي أعنف من كده، وأصلًا أنا لسه مخلصتش ردي، إنت هتموت من الغيظ عشان البدلة علّم عليك ولسه هنعلم أكتر وإنت عارف هتتمسخر إزاي الفترة اللي جاية، زي ما إتمسخرت في كل أفلامك اللي فاتت".