• Fady Baha'i Seleem
• 12:00 صباحًا - 28 يناير 2010
• نقد آخر لنفس المستخدم

حسن و مرقص

يحسب لعادل إمام ادراكه لمستجدات (السوق)..و تكاليف حسبانه على تيار المثقفين..

و فهمه لمسئولية الفنان و دوره فى المجتمع..

و من اجل كل الكلام "الانشائى" اللى (حدانا) ده..كان (فرمانه) بتمثيله فيلم يناقش قضية المواطنة..يلا..اديله! آمن عادل إمام منذ خمس سنوات تقريبا بعدم قدرته منفردا، لقيادة تيار الايرادات وحده..متزعما منفردا..و عدم جدوى كل محاولاته فى جرجرة الممثلين الموهوبين معه و (صعوده عليهم) فنيا فى الفيلم، لتزعمه الايرادات السينمائية السنوية..

فتعاون تارة مع نور الشريف..و تارة مع عمر الشريف..(و لكن على اساس كتابة

اسمه اولا..و هى عقدة غريبة جدا عنده..اعتقد انه لو مثل مع "روبرت دى نيرو "سوف يتمسك بها جدا..و يصر..لاء..يلح عليها !  و لن يدقق فيها "روبرت"

نفسه!..لانها لا تعنى عندهم ما تمثله عندنا..و هى السبيل لتسمية الفيلم بإسم عادل إمام..و ربما هى كانت السبب فى عدم وقوفه امام يوسف شاهين..و هو

الآخر عند نفس العقدة..رحمه الله..عقدة عظمة غريبة!) فهذا هو السبيل الوحيد لتخطى ايرادات محمد سعد و احمد حلمى او حتى احمد مكى!

يوسف معاطى..صاحب رصيد مخجل من المسرحيات الشديدة السخافة (حب فى التخشيبة – الجميلة و الوحشين – روحية اتخطفت – عسل البنات)..كما فشلت مسلسلاته الكوميدية كثيرا (قديما) بالضربة القاضية!

و لكن..فجاة..منذ حوالى خمس سنوات او ستة..فجأنا يوسف معاطى بتقديم مستوى درامى و قصصى جميل..(هل تتذكرون فترة العقم التهديفى لفلافيو مثلا فى بدايته؟)

و ظهرت بصماته بوضوح مع عادل امام و يحيى الفخرانى..فدانت زعامة الكتابة الكوميدية ليوسف معاطى تلقائيا (اذ انه يكتب لأكبر نجم سينمائى و اكبر نجم تلفزيونى فى مصر).

القصة..

جميلة..

بسيطة..و لكن جميلة..ليس فيها عبقرية جديدة او غير مسبوقة..بالعكس..بها الكثير من المبالغات المسرحية..من جانب عادل إمام (لا يكف ابدا عن "تلعيب" حواجبه..لزمة عمرها 35 سنة..و برضه لسة!).

كشف عادل و يوسف النقاب عن اننا فى الكنائس يوجد لدينا من الكهنة و القسس من يشعل الفتن و الحرائق!!! (فين؟؟؟..كهنة؟ قسس؟ اساقفة؟ فين دول؟ معلهش!)

كما اظهر زوج من الكهنة جهلاء و موتورين و حقودين و منافقين برضه! (ردا على مثلهم من الشيوخ!..قسمة العدل يعنى!..و.."عااااش الهلال مع الصليب!").

طبعا..المسيحين كالعادة و بكل سعادة لا يقولون "الله" او "ربنا" و انما دائما يرددون "الرب"..مسيحيين بتوع عهد قديم و بس يظهر!)

كان الحصان الاسود لهذا العمل هو محمد عادل امام..كما كان احمد مكى فى "مرجان"..

اداء مميز..حضور جذاب..تمثيل متقن..جميل..ليس فيه تصنع او تكلف عادل امام المعروف عنه قديما..

الحقيقة..لقد نجح عادل امام فى امساك نفسه فى هذا الفيلم عن "عبثه" الصبيانى..المعتاد منذ اكثر من 30 سنة..مع جميع "ممثلات" و "فتيات مودلينج" افلامه..

برافو!

شاب الفيلم الكثير من المبالغات المسرحية..التى لا تتناسب مع اجواء السينما..

كلهفة لبلبة (الاوفر طحن).."بإسم الصليب!!!!"..و فقدان وعى (جرجس) المتكرر..قبح (انجيل ويليام شحاتة) العنيف..عسكرى المراسلة الخاص بعزت ابو عوف..يا سعادة الباشا..يا سعادة الباشا..يا سعادة الباشا..

جميع المسلمين الذين فى الفيلم "مغلولون" من المسيحيين..جميع المسيحيين "محرقون"

من المسلمين..

فيما عدا نبيل و بدوى!

ما الذى تفعله هالة فاخر فى الفيلم؟

هل يتحدث المسيحيون بهذه الطريقة علنا فى شبرا؟

هل يهيج الكهنة الشعب بهذه الطريقة؟ نعم يفعلها المشايخ..و لكن هل يفعلها مثلهم رجال الدين المسيحى؟

هل يخرج الشعب بهذه البساطة ليشتبك مع المسلمين؟

هل يبدأ القداس فى الخامسة فجرا مع صلاة الفجر؟

هل يصلح ان يحلق القس ذقنه؟ هل يصلح ان يكذب؟ هل هو مقتنع بالهروب خوفا على حياته؟ هل يرفض السفر و يفضل التنكر و "الحلاقة" و الهروب و الكذب؟ هل تقطع الكنيسة مرتبه؟

هل يحفظ الكاهن او القس ابنه ايات الانجيل بهذه الطريقة "الازهرية"؟

هل يقطع الكاهن صلاته و يحولها عن شكلها إلى شكل مختلف طحن عند رؤيته لجاره؟

هل يذهب 4 كهنة (مرة واحدة) لإفتقاد احد الرعية..الذى يوجد مثلهم كثيرين جدا؟ و فى القاهرة كمان؟

فيما عدا كل هذه "الديفوهات" و "الثقوب" و "الرقع" الدرامية (التى سنغفرها للكاتب لانه من الصعب عليه جدا جدا ادراكها و هو ليس بمسيحى مصرى (قبطى) يعنى)..فلا يصلح تماما استيقاء المعلومات دى من الافلام الاميريكية..بصراحة!).

لا بأس..

عمر الشريف..دوره سهل و بسيط..بس مقنع جدا جدا..شيخ مسلم فعلا..مسيحى قبطى جدا..مصرى..مصرى يعنى..

عادل امام اجاد احيانا و اخفق احيانا..

محمد عادل امام كان موفقا جدا..

لبلبة..

و النبى عيب!

شيرى..برافو..

هناء الشوربجى..اجادت فى مساحتها..

عزت ابو عوف..عيب يا عم..ده انت رئيس مهرجان..!

ادوارد..ماشى انت فى السكة دى مش عايز تتطلع منها..انت حر!..كُل فى نفسك!..هاتتحول لمظهر ابو النجا فى الاخر!..بس برضه...مش بطال..

المخرج بقى..

ده مخرج دارس..فاهم شغله..

خصوصا مشاهد تحريك المجاميع فى فيلم (الناصر صلاح الدين)..و لكن ..بصراحة..هل تتحرك مجاميع يوسف شاهين كدة؟ بلاش جو..خالد يوسف..شريف عرفة..

على الرغم من إخراج رامى امام الجيد لهذا الفيلم..الا ان شريف عرفه كان سيحوله لفيلم اسطورى!

رامى جيد او جيد جدا..بس لا يمكن نقول عليه امتياز..على الاقل دلوقتى..المسألة مش تطبيق عملى لمحاضرات الاكاديمية..فين انت؟ ده تقليد نمطى فى اخراج المشاهد من كذا فيلم..مافيش ابداع جديد يحسب لك..بس على الرغم من كدة..ما اقدرش اقول وحش او حتى مقبول..هو جيد..بس جيد و بس..

الموسيقى..ممتازة..رائعة..جميلة..متميزة..ياسر عبد الرحمن يا اخوانا!

الديكور.."بيوتيفول" (على طريقة هيثم دبور)..

التصوير..برافو بجد..

اول مرة فى حياتى اسقف للماكسير..مكساج متطور و حساس و جرئ و له طعم..برافو فعلا..الانشاد الاسلامى مع التسبحة القبطى مع خلفية موسيقية لياسر عبد الرحمن..كانت محركة للمشاعر..مثيرة للخيال..شديدة الايحاء..

الاشادة مطلوبة..

عادل امام..اداءه تطور جدا..و قادر على المزيد..خفة دم مصرية طبيعية اصلية جميلة..الا انه ما يقع كثيرا فى (فخ) التكرار و (القولبة) السهلة للضحك..

اول فيلم كوميدى له بدون اى ايحاءات او تلميحات مسفة او رخيصة او مبتذلة من عادل إمام..(سينما نظيفة زى ما المحجبات ما بتقول!)

يحسب لهذا العمل..رسالته و هدفه و مضمونه و قيمته..كما ان نجما بحجم و تاريخ اضاف عمر الشريف الكثير..

كما حمل الفيلم متعة بصرية و فكرية بسيطة و جميلة..

اجتهد صناعه فيه و هذا واضح و جلى..و اعتقد انه قدر له ان يكون افضل من هذا كثيرا..و لكن ما هو متاح مرضى و مقنع..حتى و ان لم يشبع طموحاتنا السينمائية!

النتيجة الاجمالية 8 من 10..

• 7 مفيد
• 5 غير مفيد