• دعاء أبو الضياء
• 12:00 صباحًا - 9 ابريل 2013
• نقد آخر لنفس المستخدم

اتفرجت على فيلم (G.I. Joe: Retaliation ) من أربع أو خمس أيام تقريبا، وفضلت فترة طويلة أفكر اكتب عن إيه بالظبط في الفيلم هل أخد إتجاه النقد السلبي واتكلم عن اللي معجبنيش في الفيلم وإزاي كان في أخطاء كبيرة وكتيرة سقطت من حسابات مخرج الفيلم (جون إم. تشو)، ولا اتكلم عن الإيجابيات إللي خلتني أقييم الفيلم 6/10 ويمكن كمان تزيد وتصل إلى 8/10 لو بصيت فقط للتقنية العالية المستخدمة في تنفيذ العمل،

واظن إن ذكر إيجابيات العمل أفضل بكتير أو من إني أحصي مجموعة من الغلطات اللي ممكن تبقى في رأي حد تاني محاسن خاصة إني مش ناقدة فنية بالمعنى الحرفي وإني بكتب رأي كمشاهدة عادية، وأيضا الفيلم ليه عشاق جمة وفي ناس كتير أوي كانت في انتظار عرضه،

فمثلا الصراعات في الفيلم نفذت بشكل حرفي وعالي وبالرغم من إن بعضها كان بيقوم على المهارات القتالية إلا إن في جزء كبير من تنفيذها تم باستخدام التقنية الفنية زي المشاهد اللي تألق فيها (زارتان) ، (رودبلوك) ونقدر نقول إن اللقطات السريعة زادت من براعة مشاهد الحركة والمعارك بالفيلم وبالنسبة للأداء التمثيلي لأبطال العمل فكان مقبول بالرغم من إن أداء الممثل بروس ويلز كان مفتعل في بعض الأحيان، ومع إني مشوفتش أي روح للتجديد والمغامرة عن الجزء الأول للفيلم واللي قدم عام 2009 إلا إن المغامرات اللي قدمها المؤلفان (ريت ريز)، و(بول ويرنيك) كانت جيدة.

الفيلم بصفة عامة اقدم شكل مقبول شكلا ومضمونا واعتقد غنه هينول إعجاب كتير من جمهور نوعية هذه الأفلام اللي بتعتمد في الأغلب على التكنولوجيا والتقنية العالية.

• 3 مفيد
• 0 غير مفيد