• وليد زكي
• 12:00 صباحًا - 23 ابريل 2013
• نقد آخر لنفس المستخدم

فيلم "النيابه تطلب البراءة" من الافلام القليله اللي انت بتقف عاجز وانت بتكتب اي حاجه عن الفيلم ده .. ماتبقاش عارف هو الفيلم ده هابط ولا قصته حلوه والاخراج هو اللي هابط ولا هو فيلم حلو بس انت مش فاهم هو في ايه .. بس الاكيد انه كان من نوعية الافلام اللي بتتعمل عشان يتحط بسرعه "يتعبى" في شريط ويتبعت على دول الخليج

الفيلم قصته بتحكي عن وكيل نيابه صاحب عمره يضحك عليه ويتجوز خطيبته ويحصله صدمه نفسيه تتحول الى انفصام في الشخصيه يبقى الصبح شخصية "احمد" وكيل النيابه الذي يقف في ساحات القضاء ... وبالليل تلاقيه بقى "البرنس" البلطجي اللي بياخود كل حاجه بدراعه والناس كلها بتخاف منه "وبلاش حد يقولي وهي الناس ليه ممكن تخاف من سمير صبري اصلاً حتى لو عمل بلطجي وازاي ناس تخاف من بلطجي ظهر فجاءة ومالوش اي تاريخ ... مش مهم بقى "ياراجل كبر دماغك"

طبعا شخصية البلطجي لازم يكون ليها عشيقه ومين احسن من فيفي عبده تعمل عشيقة لبلطجي .. بصراحه مافيش "اختيار موفق من المخرج" المهم ان الاحداث تمر وانت مش فاهم لغاية لما ضميره يصحى ويكتشف انه عنده انفصام في الشخصيه ويروح مقدم نفسه بنفسه للعداله

فيلم يمثل حال السينما المصريه في فترة الثمانينات لما كانت الافلام بتتعبى في شرايط بسرعه عشان تروح الخليج بشرطه الفيلم يكون في رقاصه + 3 رقصات + 4 خناقات ضرب

• 5 مفيد
• 0 غير مفيد