• دعاء أبو الضياء
• 12:00 صباحًا - 17 مايو 2013
• نقد آخر لنفس المستخدم

أول ماشوفت بوستر الفيلم ده ماكنتش مصدقة إن مارك ويلبرج هيبقى عنده عضلات وحاجات زي كدا، وافتكرت ان أفيش الفيلم فوتوشوب مش اكتر،،، يمكن اصدق ده على دواين جونسون لكن ويلبرج !!

الاندهاش والاستغراب اللي بدأ معايا استمر لأخر دقيقة في الفيلم وأنا مش مصدقة اللي بيحصل، في أول مشاهد الفيلم تم الإعلان عن إنه مأخوذ عن قصة حقيقية واستنيت بصراحة كتير أوي عشان اشوف القصة الحقيقية أو أي قصة أصلا اللي تقريبا المؤلف (كريسنوفير ماركوس) أتحفنا بيها... الغريب اكتر إن تصنيف الفيلم كوميدي وده بقى من اكتر الحاجات اللي فعلا ضحكتني بالرغم من أن مارك ويلبرج حاول كتير إنه يقوم بالدور ده لكن بصراحة أنا كنت في كل مرة بقول كلمة واحدة (بجد!!!)

الفيلم بقى بيدور عن صديقان يعملان في نادي رياضي بيقرران إنهم يخطفوا رجل أعمال ثري ويجبروه على التوقيع والتنازل عن كل ممتلكاته وبيحاولوا يقتلوه، لكنه بيقدر يتغلب عليهم ويستعيد أمواله... مش هتكلم عن القصة هنا لان مافيش أي كلام عليها يتقال غير إنها عادية جدا ويمكن تحس معها بالملل، لكن تقدر تقول إن السرعة في الانتقال بين المشاهد والأحداث هيساعدك في إنك تخرج من حالة السأمة والملل دي. كمان فكرة عرض الحلم الأمريكي والإشارة للفرصة التانية اللي بتقدمها أمريكا دايما كانت حسنة تذكر للفيلم يمكن عشان كنت عايزة اشوف الفرصة التانية اللي بيتكلموا عنها واللي أمريكا بتمنحها .... بالإضافة إلى فكرة الأصرار على تحقيق الحلم والمصابرة عليه بغض النظر عن الوسيلة اللي هتحقق الغاية.

ولو اتكلمت عن الأداء التمثيلي فاعتقد إن كلامي الأول هيبقى عن الممثل دواين اللي قدر لوحده يخلني استكمل مشاهدة الفيلم لإنه باختصار شديد كان بعيد كل البعد عن اي افتعال أو صنعة في أفعاله وتمثيله/ أما بالنسبة لمارك فاعتقد إن ادائه لم يختلف كثيرا عن الأفلام السابقة غير حكاية العضلات دي.

الفيلم بغض النظر عن إن تقييمي ليه كان مقبول ممكن تشاهده من باب التعرف على قصة حقيقة ده لو كانت بالفعل.

• 0 مفيد
• 0 غير مفيد