• Nada Elhariri
• 12:00 صباحًا - 2 يناير 2014
• نقد آخر لنفس المستخدم

في التليفزيون بالصدفة، شفت اسم حسين فهمي بجانب بعض الشباب..قلت في نفسي هو ايه الفيلم ده انا مش عارفاه؟ وبعدين حسين فهمي امتى عمل فيلم جديد كده؟ قد يكون ده لضعف متابعاتي السينمائية او لضعف الفيلم نفسه المهم قررت اني اتفرج عليه...

مشاهد البداية والحبكة الدرامية للكره الغير مبرر والتنافس بين الشابين على البنات عجيبة بمعنى الكلمة وغير مقنعة.. الى قراراهم المفاجئ انهم "يتجوزوا" البنت اللي مشافوهاش من سنين واستعدادهم انهم يعملوا اي حاجه عشانها مع انهم ميعرفوش عنها حاجة من 13 سنة! جواز كدة مرة واحدة؟!! وهي هتوافق عادي؟ زي بنت السلطان في القصص الخيالية القديمة اللي بتتجوز اللي باباها يقرر انه يجيبلها وردة المش عارف مين من فوق جبل المش عارف ايه!!

بداية ظهور حسين فهمي في المطعم واستخدام اسم "جابر" فكرني بمسلسل "للعدالة وجوه كثيرة" ليحيى الفخراني اللي كان عايش بشخصية غير شخصيته وكشف الفيلم بالنسبالي. الا اني قلت في نفسي مش معقول تكون الفصة بالسذاجة دي رغم ان كل الشواهد بتقول كده.

اضحكني جدا احساس المخرج والممثلين انهم بيفاجئونا ان حسين فهمي هو رجل الاعمال عبد الرحمن والد الفتاة اللي محدش من الشابين شافه ولا يعرفه بالرغم من ان ده باين من اول تاني ظهور لحسين فهمي في الفيلم.

ندمت على الساعة ونص اللي ضيعتهم الحقيقة وقلت لنفسي ايه يعني لما يبقى حسين فهمي في فيلم للشباب هل ده مبرر يعني انه يكون فيلم حلو او مميز؟!!

الفيلم لا يستحق اكتر من 2 من عشرة والاتنين دول عشان خاطر الناس اللي كلفت نفسها ونزلت صورت الفيلم يعني.

• 4 مفيد
• 4 غير مفيد