• Hossam Waleed
• 09:14 صباحًا - 7 فبراير 2019
• نقد آخر لنفس المستخدم

شفت الفيلم بعد ما لقيته على كذا قايمة لأهم اﻷفلام اللي اتكلمت عن الـ"إنترنت"، وبمُشاهدة تريلر الفيلم كنت بتسآئل جوايا هل الفيلم فعلًا على اﻹنترنت ولا عن تقديم شخصية بشكل بيوجرافي؟

الصراحة الفيلم راح أكتر في طريق البيوجرافي على عكس ما كنت في اﻷول بأتمناه، بس القصة رائعة فعلًا في جانبها اﻹنترنتي. القصة ملهمة أوي عن واحد عايز يغيّر العالَم ومؤمن إن تغيير العالَم ممكن ييجي من غير احتيال ولا لف ودوران.

الحكاية عن "آرون سوارتز" أو "ولد اﻹنترنت" كما أطلق عليه، الشاب العبقري اللي آمن بضرورة إن اﻹنترنت لازم يكون وسيلة غير ربحية في نشر المعلومات والمقالات العلمية، وكان في صراع مباشر ودائم مع الكونجرس والحكومة اﻷمريكية، وقام بتوعية الناس بخطورة السياسة السلطوية اﻷمريكية، قبل ما يقرر الانتحار في عامه السادس والعشرون بسبب إنه اكتفى ولم يعد يحتمل آني موور.

الشخصيات في الفيلم كانت بتقول إن المشكلة اﻷساسية اللي في قصة "آرون" اللي تخليه يتختلف عن علماء ومخترعين عباقرة زيّه، أمثال زي "بيل جايتس" و"ستيف جوبز".. إنه كان رافض بشدة وحاطط مبدأ بـ(عدم الكسب المادي من أعماله)، ودي زي ما كانت نقطة قوّته وشهرته وإيمانه بحقوق الناس وما شابه، هيّا -كمان- اللي كانت نقطة هدمه/ضعفهُ، ومصدر المشكلات والاضطرابات كلها مع السلطة اﻷمريكية. ولو "آرون" كان شخص متسامح شوية مع فكرة إن مش كل حاجة تبقى للعام، وإنّ "الكسب المادي" من أي مشروع -ولو مشروع ﻹفادة البشر- حاجة مهمة.. لو حصل، حياة "آرون" كانت سلكت منعطف آخر تمامًا غير نهايته المأساوية هذه.

--

فيلم مميز ومهم، وفيلم قوي أوي عن الصحافة والصحافة الحرة. اﻹحساس اللي أصابني بعد ما انتهى إننا مينفعش نكون عايشين في العصر ده -بالذات الأشخاص المهتمة بقضايا الحقوق والمساواة والقانون- ومنكونش عارفين قصة الشاب الجميل ده.

الفيلم صدر للسينما بعد حوالي سنة ونُص من وفاة "آرون" في بداية ۲۰۱۳، وواضح إن الشغل وتجميع الماتيريـال وعمل اﻹنترڤيوز كان من وقت مبكر أوي قبل موته بمدة.

لمُشاهدة التريلر: https://youtu.be/RvsxnOg0bJY . . .

• 0 مفيد
• 0 غير مفيد