• احمد رميح
• 08:50 مساءً - 30 يوليو 2024
• نقد آخر لنفس المستخدم

مزيج أكثر رائع عملته ديزني لكل الشخصيات الكارتونية اللى ابتكرتها، رحلة داخل عالم ديزني بشكل ساخر من خلال قصة أشهر شخصيتين كارتون، السناجب إللى كانوا أكبر أسباب بهجتنا في التسعينات – بالنسبة لي كمواليد التمانينات – تشيب & ديل، الشخصيات اللى تم ابتكارها في الاربعينات.

الفيلم بيتكلم عن الثنائيات الفنية الناجحة والغيرة الفنية اللى ممكن تحصل بينهم وبالتالي تفشل أهم مشاريع فنية زي مسلسل rescue rangers اللى كان بيقدموه تشيب & ديل وبسبب إختلافهم وقفوا بعد أكثر من موسم ناجح كان سبب في شهرتهم.

الفيلم كمان تناول قصة القرصنة على الأفلام والخطر الناتج عنه على الشخصيات الكارتونية نفسها، وكمان كان في مزج لكل أنواع الرسوم المتحركة، الكارتون والانيميشن ثلاثي الأبعاد والسخرية من الفترة اللى كانت بين الكارتون والأنيميشن ثلاثي الأبعاد، الفترة اللى تم فيها انتاج " بولار اكسبريس ".

الفيلم جرعة فنية مبهجة وساخرة بشكل كوميدي ذكي جدًا، وبنشوف فيها تريقة على حاجات كتير بره عالم ديزني كمان، زي جيمس بوند، Ant-Man، باتمان، الفضائي ET، وكان في شخصية الحقيقة أنا مكنتش أعرفها في طفولتي، هي شخصية أعتقد بنسبة كبيرة تم إقتباسها وتقديمها في مصر في المسابقات – الساذجة – التلفزيونية وهي شخصية المفتش "كرومبو"، نفس الشكل تقريبًا والوظيفة لأنه بيظهر في الفيلم كمحقق. حقيقي الفيلم مبهج جدًا ورائع وفي حاجات كتير بتظهر خاطفة مش هقدر أتذكرها كلها بس أحب أطمنكم إن عم دهب مازال مشغول بدهبه وغرقان في حبه – حرفيًا -.

أسعدني جدًا في التتر وجود أسم " عمر مرسي " كـ انيميشن سوبرفايزور، أنا حاولت أوصل لجنسيته بس فشلت، بس كأسم عربي في عمل قوي وجميل زي ده، حاجه تفرح.

• 1 مفيد
• 0 غير مفيد