أراء حرة: فيلم - شمس الزناتي - 1991

---

ملحوظاتى عن شمس الزناتى ..

• Mostafa Elsafty
• 12:00 صباحًا - 19 يناير 2014
• نقد آخر لنفس المستخدم

احد كلاسيكيات السينما المصرية (إنتاج 1991 ) و أحد أكثر أفلام النجم عادل امام شعبية و جماهيرية فى قائمة تضم (سلام يا صاحبى و واحدة بواحدة و باب الوزير ) .. لا يهمنى بالطبع ان فكرة الفيلم مقتبسه من فيلم Seven Samurai (انتاج 1954) فالفكرة ملحمية و يقال انها مقتبسه من تراث الاساطير الشعبية فى ثقافات الشرق الأدنى . لا مجال هنا لسرد القصة فالكل يحفظها عن ظهر قلب و لكن نسرد بعض الملاحظات فى السطور القادمة التى ستكون بالعامية المصرية هذة المرة حتى تلائم أحد اكثر الافلام جماهيرية و شعبية فى المجتمع...اقرأ المزيد المصرى - لو بصينا على سى فى سوسن بدر هنلاقى ان عادل امام هو تقريبا البطل الوحيد فى السينما المصرية اللى اقتنع ان سوسن بدر ممكن تكون البنت الجميلة و فتاة أحلام البطل برغم ان ملامحها لا تقترب من المواصفات التقليدية لمن تقوم بهذة الأدوار و عملها قبل الفيلم ده فى فيلم سلام يا صاحبى (انتاج 1986) – لأ و كان بيتنافس عليها هو و سعيد صالح كمان – و سكت الجمهور فساق فيها و كررها فى شمس الزناتى - على عبدالرحيم اللى عمل دور "سامبو" أدى اول مشهد ليه فى الفيلم بأداء يتصنف كاكتر المشاهد الـ (over act ) فى تاريخ السينما المصرية (من الدقيقة 28 ) - المفروض ان الفريق اللى كونه شمس عشان يقوم بالمهمة كل واحد فيهم شاطر و موهوب فى حاجة معينة سلامة الطفشان فى الضرب بالنبلة ، سيد سبرتو فى التنشين بالسكاكين ، جعيدى فى القوة البدنية الهائلة ، اللى محدش فاهم شمس خده معاه راح له و عرض عليه ينضم ليه عبده قرانص (قام بدوره أحمد ماهر) البعض هيقول انه بيمتاز بالدهاء و الذكاء لكنه فى مشهد قتله جه فى وسط ما الحرب دايره و الرصاص بيطير فى كل حته و جرى بالحصان بتاعه و هو بيقول بعلو صوته "أنا معاك يا شااااااااااااااامس " !! - لما تجمعوا فى الخرابه و شمس شرح لهم المهمة و سألوه على المقابل قالهم فى نبرة عتاب " و انا عمرى كلت حق حد فيكو" !! و كلهم برغم انهم مرتزقه وافقوا و اشتركوا معاه و هما مش عارفين هياخدوا ايه !! - لما شمس راح لسلامة الطفشان يتفق معاه و هو بيسأله على احوالة و بيطمن على النبله قاله ان هى دى اللى بيلقط بيها رزقة قائلا (دكر بطان تايه ألمه .. جدى زهقان من عيشته أريحه) مش فاهم يعنى هو بيموت الحيوانات بالنبله و ياكلها ميته و لا بيعورهم و يبيعهم و مين اللى بيشترى حيوانات و طيور مضروبة بالنبل لو كان بيبعها - تفوق هائل فى القدرات التمثيلية لمحمود حميدة (برعى) على أداء عادل امام بطل الفيلم - المبالغة الشديدة فى صنع مواقف بطولية لموت أبطال المسلسل برغم انهم بلطجية فى الأصل

• 9 مفيد
• 7 غير مفيد