أراء حرة: فيلم - ParaNorman - 2012

---

الرعب بمذاق الرسوم المتحركة

• دعاء أبو الضياء
• 12:00 صباحًا - 16 سبتمبر 2012
• نقد آخر لنفس المستخدم

شاهدت بارانورمان بكثير من التفاؤل والتطلع بالرغم من عدم ميلي لأفلام الرسوم المتحركة وكان السبب وراء ذلك اعجابي بقصة الفيلم اللي كنت بتمنى إني اعيشها وأمر بنفس التجربة واكون مكان الصبي نورمان وأكلم الموتى وأشوفهم، والقصة بتبدأ بحكاية الصبي نورمان اللي بيشوف جدته المتوفية كل يوم وبيكلمها وبيحاول يخبر والده بده لكن بيلاقي دايما رده بعصبية وصرامة، حتى في المدرسة كل أصدقائه بيسخروا منه ومش مصدقين كلامه، وفي يوم بتهجم على قريته مجموعة من الأشباح وهنا بيصدق كلامه الناس خاصة لما يحاول تخليص القرية من...اقرأ المزيد الأشباح وإنقاذهم. فكرة تقديم فيلم رسوم متحركة عن الأشباح والعفريت فكرة ممكن يشوفها البعض قديمة شوية أو قدمت قبل كدا في اكتر من عمل فني كان أشهرها (شركة المرعوبين المحدودة)، و(كورالاين) وغيرها ولكن اعتقد أن بارانورمان مختلف كليا، وبعيدا عن الأحداث المشوقة والمتلاحقة اللي غلبت على الفيلم بنشوف تفاصيل صغيرة أوي بتخلي أحداث الفيلم مميزة عن أي فيلم تاني زي تعبيرات وحركات الصبي نورمان ونظرات عينه اللي كانت بتوصل خوفه بشكل طبيعي وبيثير تعاطفك معاه وفكرني بفيلم (الحاسة السادسة) لبروس ويلز. واعتقد أن التقنية العالية في تنفيذ المشاهد كان الأساس الأول والأخير في خروجه بشكل يغلب عليه الواقعية، كمان اختلاط الأحداث المرعبة بالكوميديا كانت من أكتر الأشياء المؤثرة واللي مقدرتش أحكم على الفيلم بيميل لأي نوع أكتر. وبالرغم من أن الفيلم لا يصلح للأطفال أقل من عشر سنوات إلا إنه قدم مجموعة من النصائح المهمة جدا عن طريق جدة نورمان اللي كانت بتظهر وأكدت ليه أنها ستظل ترعاه وإن دي مسئوليتها. وبالإضافة إلى ذلك البراعة في تأدية الأصوات واللي تميز بها الممثلين وكان أكثرهم براعة تاكر ألبريزي اللي أدى شخصية نيل وكنت شايفاه فعلا في كلامه وحديثه للشبه الكبير بين تاكر ونيل في الحقيقة. الفيلم ممكن يشاهده الأطفال لكن بمباشرة شخص بالغ

• 1 مفيد
• 0 غير مفيد