أراء حرة: فيلم - Mama - 2013

مش لازم دم !!

Khaled Mahmoud
12:00 صباحًا - 2 مارس 2013
نقد آخر لنفس المستخدم

واحد من افضل افلام الرعب الى ممكن تشوفها فى حياتك . وعنوان النقد انا قصدت انى اكتبه لان كتير مننا بالنسبة لهم الدم هو المادة الاساسية الى بيقوم عليها اى فيلم رعب زى افلام كتتير منها على سبيل المثال فيلم Saw الى كان الدم والقتل مادة اساسية فى الفيلم وببشكل مبالغ فيه على الرغم ان الفيلم حقق ايرادات كبيرة ولكن انا بالنسبة لى وممكن كتير يبقى موافقنى او معارضنى انا مش مقتنع نهائيا بالافلام الى بتكون من النوعية دى كأفلام رعب وفيلم MAMA هو اكبر دليل على كلامى ده فنجح المخرج Andrés Muschietti على...اقرأ المزيد تقديم فيلم رائع يشمل كل عناصر الرعب ومن اهمها الاثارة والتشويق. وساعده ايضا فى ظهور الفيلم بشكل رائع الطفلتين Megan Charpentier و Isabelle Nélisse و أدائهم الرائع فى الفيلم حتى بنظراتهم وتعبيراتهم . وانا اعتقد انكم لو تشوفوه احسن بكتير من انى احرق مشهد واحد فيه ... انا تقييمى للفيلم 8\10 MAMA فيلم يستحق المشاهدة أكثر من مرة .. ولكن ليس لاصحاب القلوب الضعيفة او الاطفال.

1 مفيد
0 غير مفيد

فيلم رعب كامل الدسم

دعاء أبو الضياء
12:00 صباحًا - 10 فبراير 2013
نقد آخر لنفس المستخدم

دايما أغلب أفلام الرعب اللي بيتم تقديمها بنلاقي إنها بتعتمد على عناصر محددة زي اللون الأسود، الظلام، الخضة، والصراخ، الارتياب، وكليشيهات تانية كتير معروفة بتبقى أساس لتقديم اﻹثارة والتشويق اللي بيتبني عليهم أي فيلم رعب، وبتقدم روح خاصة في رسم لوحة ترسخ مفهوم الرعب النفسي لدى المشاهد، وفيلم (ماما) اللي كان اسمه والبوستر اللي تم تصميمه سبب أساسي في إنه اشاهده بيجتمع فيه كل العناصر دي؛ خاصة مع مشهد البداية اللي بتبدأ معاه الإثارة الحقيقة بوقوع حادث ﻷب وطفلتينه على الطريق فيضطر للتوجه إلى أحد...اقرأ المزيد الأكواخ بالغابة، وهناك يحدث شيء غريب بتبدأ معه الأحداث في التصاعد، وبمرور أول عشر دقايق من الفيلم بتشعر بالمعنى الحقيقي للفزع والتوتر. واعتقد إن السيناريو اللي قدمه الكاتب (نيل كروس) لقصة (أندريس موسشيتي) كان من ضمن العناصر اللي ساعدت على تقديم العمل بهذا الشكل، وكمان الخدع السينمائية اللي برع موسشيتي في إخراجها واستخدامه لفن خاص في المونتاج يجعلك تقفز مع كل مشهد دون سقطات، وده زاد معاه صعوبة إنك تتنبأ بالمشاهد والأحداث، كمان فكرة إنك تعتمد على اﻷطفال في تقديم فيلم رعب فكرة في حد ذاتها مشوقة جدا وده طبعا عشان بتضغط على عواطف كامنة لدى الجمهور وارتباط الخوف والقلق بيهم. وكانت من أفضل الحبكات الدرامية في الفيلم واعتقد إنها السبب الرئيسي في نجاحه هي فقد الشبح اﻷم لطفلها وبالتالي كان سبب قوي في تمسكها بالطفلتان ومحاولة قتل كل من يقترب لهما، وقدر موسشيتي إن يعكس الحالة الدرامية في العمل ويمزجها بحالة نفسية شديدة للأم. أما بالنسبة للأداء التمثيلي فاعتقد إن بطلتا العمل الحقيقين هما الطفلتان (إيزابيل نيليس)، و(ميجان تشاربينتي) واللي قدرت كلا منهما بالرغم من صغر سنهما وحداثة تمثلهم في تقديم تعبيرات وجه وسلوك غريب في تصرفاتهم تخليك طول الوقت مشدود ومتابع أفعالهم بكل جدية. اعتقد إن فيلم (ماما) من ضمن الأفلام اللي تستحق إني احطها ضمن قائمة أفلام الرعب اللي ممكن اشاهدها مرة تانية.

6 مفيد
0 غير مفيد

فبلم روعه

ايمى
12:00 صباحًا - 14 ابريل 2013
نقد آخر لنفس المستخدم

الفيلم روعه وجامد وقصه كتير حلوة لازم تتفرجو عليه وكمله للاخر علشان تفهم قصه الفيلم وهو من الافلام المفضله لى والصراحه بحثت كتير علشان اعرف اجيبه واشاهده وعرفت اشغله هو اخذ كتير من الوقت فى التحميل عندى بس يستاهل ذلك بجد ممكن للاطفال مشاهدته عادى بس هو حلو لما الاسرة تكون مجتمعه وتتفرج عليه مع بعض بس واللهى زعلت لانه فيه ناس قالت على الفيلم مش حلو بس دى وجهه نظرهم وكل واحد حر فى رايه طبعا وانا معنديش اى نقد على الفيلم لانه فى نظرى فيلم روعه بس هو كان ممكن يبقى ليه اسم تانى بس اسم...اقرأ المزيد ماما حلو والموسيقى الا فى الفيلم روعه وجامده والمؤاثرات فى قيمه الروعه وتاخد العقل و بس هو نزل مع كام فيلم فمخدش حقه فى المشاهدة والتقيم كانت الافلام الا نزله معه برضه فى قمه الروعه ولكن الترجمه للفيلم كانت ضغيرة بس واللهى يستاهل و اتمنى تشاهدوه وانا من محبى الافلام الرعب كتير اوى

0 مفيد
0 غير مفيد