أراء حرة: فيلم - Identity Thief - 2013

سرق الأمل الوحيد ليا

الأفلام الكوميدية دلوقتي بنشوف إن أغلبها بيعتمد على الأفيهات الكوميدية أكتر ما بتعتمد على شخصيات فنية معروف عنها بتقديم أعمال كوميدية ناجحة، واعتقد إن زمان كان الواحد ممكن يتفرج على فيلم مصري لإسماعيل يس بغض النظر عن إيه اللي بيقوله لمجرد إنه شخصية فكاهية مرحة ممكن تخليك تضحك لأسبوع كمان بعد مشاهدتك لفيلمه، ويمكن ممثل زي (جيم كاري) نضمله نفس الوتيرة الخاصة بإسماعيل يس كممثل أجنبي، ولكن لما الفيلم متلاقيش فيه ولا شخصية كوميدية ولا حتى إفياه واحد يخليك تضحك وفي الأخر تلاقيه مضنف ضمن الأفلام...اقرأ المزيد الكوميدية يبقى ده اللي يتقال عليه (هم يضحك)؛ واللي اقصده بكلامي ع التحديد فيلم (Identity Thief) فمع أول مشهد حسيت إن الفيلم يميل أكثر للدراما الاجتماعية السريعة اللي بتحكي عن موظف يدع ساندي تسرق محفظته ويفاجأ بامرأة تستخدم بطاقته الائتمانية فيحاول الوصول لها وتسليمها للشرطة.... ومن هنا هتلاحظ إنه بعيد كل البعد عن الكوميديا ولا يمت لها بصلة خاصة إن أغلب المشاهد اللي بتقدمها ديانا (ميلسا مكارثي) سخيفة للغاية وبتحاول بطريقة مستميتة إنها تعتمد على جسمها لإثارة الضحك وتقديم مشاهد خفيفة لكن للاسف كان العكس تماما. كمان الزج بمشاهد أفراد العصابة اللي بتفضل طول الفيلم تطارد ديانا وتحاول الإمساك بها لقيامها بالاحتيال والنصب عليهم كانت مقحمة بشكل مستفز وغير منطقي، ويمكن اتعاطفت شوية مع شخصية ساندي اللي قدمها الممثل (جاسون باتمان) وده اللي خلاني أكمل الفيلم للأخر بالرغم من إني كنت متنبئة بكل مشهد وإيه اللي هيحصل فيه. فيلم Identity Thief سرق الأمل الوحيد ليا في إني اشاهد فيلم أجنبي كوميدي في الفترة اللي كنت محتاجة أشوف فيلم كوميدي بجد.

2 مفيد
0 غير مفيد