- الرئيسية
- فيلم - The Batman - 2022
- أراء حرة
- English
أراء حرة: فيلم - The Batman - 2022
ناجح تجارياً ليس بالجيد فنياً
![ahmed hammam]()
ahmed hammam- 11:55 مساءً - 5 مارس 2022
- نقد آخر لنفس المستخدم
ahmed hammam📌 الفيلم بشكل عام ممتع واحداثه كتير رغم انه مدته 3 ساعات تقريباً بس انا محستش بده لأنه ممتع . 📌 الcasting او اختيار الممثلين سيء جداً بالنسبالي في كذا شخصية ظهرت في الفيلم سواء رئيسية او فرعية يمكن محدش عجبني غير جون تورتورو اللي قام بدور فالكون و كولين فاريل اللي عمل دور أوز او The Penguin .. غير كدا الباقي بالنسبالي مجرد جم بوظو شكل الشخصية اللي كنت رسمها في خيالي من الافلام السابقة . 📌عجبني جداً في الفيلم انه اغلبه واغلب المشاهد بتبقا في الضلمة واضاءة خافتة وده الحقيقي اللي المفروض يحصل في كل...اقرأ المزيد افلام باتمان لان هي ديه شخصيته وهو ده باتمان حتى معظم الاماكن في الفيلم تحس انك كنت في وكر خفافيش زي المكان بتاعه تحت والملهى السري او الاساسي اللي كان مستخبي والسجن الضيق . 📌 مشهد التحضير لظهور باتمان كانت في الحقيقة احسن حاجة حصلت في الفيلم بالنسبالي سواء بيوريك ازاي بيبث الرعب في قلوب الساعيين للخراب في مدينة جوثوم او لحظة ظهوره من الshadows على اللاين اللي قاله روبرت باتينسون i am the shadow في الحقيقة مشهد حيفضل في ذهني لباتمان تحفة . 📌ال sound mixing في الفيلم اكثر من سيء بالذات صوت باتمان بالنسبالي ضيع الهيبة اللي متعود عليها في the dark knight انا مش بقارن فيلم بفيلم بس بقارن اللي المفروض يحصل واللي حصل اعتقد اي حد شاف the dark knight حيفتكر صوت باتمان اللي يرعب ويعمل هيبة كدا في مخيلتك لحد دلؤتي لما يتذكر اسم باتمان انما اللي حصل ده وان صوت روبرت باتينسون يطلع زي ما هو او بتعديل بسيط غير ملحوظ الموضوع معجبنيش نهائي وضيع هيبة اكتر شخصية كنت بحبها في dc بالنسبالي . 📌* اللي جاي حرق شوية * انا مقريتش الكوميكس بس السيناريو فيه حاجات ساذجة جداً جداً وديه اكتر حاجة بكرهها في الافلام الحقيقة بحس ان السيناريست والمخرج بيستخفو بعقولنا كمشاهدين بدرجة مستفزة ومثال على كدا مشهد فرقعة القنبلة في وش الفريد في بيت بروس واين وجابلك كذا دليل انها كانت قنبلة كبيرة حتى اللقطة اللي بعدها جابلك ان النار خارجة من الاوضة يعني القنبلة استولت على الاوضة كلها وخرجت كمان برا وألفريد جوا الاوضة وبعد كدا يجبهولك في المستشفى وهو مفهوش غير كام نقطة على وشه ؟؟! ويفوق بعديها بشوية كمان دنا كنت خلاص زعلت عشان حسبته مات 100% والاقي السذاجة ديه ومشهد فرقعة القنبلة في وش باتمان بردو لما كانت في رقبة النائب العام لما جبلك وش باتمان عالارض حرفياً مفهوش اي تغيير ومشهد في الاخر لما اخد طلق الدنيا كلها ومحصلوش اي حاجة وفي الاخر طلقة شوتجان في الsuit تخليه بالحالة ديه وطبعاً المشاهد الsuspense الساذجة جداً اللي متوقعة من اول الحدث لاخره الراجل فضل باصص عليه وقعد ساعتين يعمر السلاح وقعد ساعتين ينشن عليه ونزلت catwoman تلحقه حاجات يعني مكنش فيه منها داعي من رأيي 📌 فيه فرق مبين السايكوباث او المختل اللي رغم جنونه ممكن يخليك تتعاطف معاه وتحبه وتاخد كلامه كحكم وتفكر فيها بعمق وتوصل لحاجات فعلاً متصدقش انها خارجة من دماغ مجنون .. وبين الvillian المستفز اللي تمثيله over اللي مبتخدش منه حاجة غير انه بيستفز ال main character بتاع الفيلم ريدلر كان ذكي وكل حاجة لدرجة انهم معرفوش يمسكو بيه لحد ما سلم نفسه بنفسه في مشهد محروق في التريلر بس مشهد لقائه مع باتمان في المصحة كنت مستنيه يبقا بروعة مشهد الاستجواب بتاع الجوكر وباتمان في the dark knight بس كل اللي شوفته كان مجرد استفزاز وتمثيل over وحرق دم الصراحة 📌 في الاول والاخر انا شفت افلام كتير جداً فانا بقيم الفيلم كدا على اساس ما العامة والنقاد بيقولو انه المفروض يتصنف كفيلم جريمة دراما مش فيلم سوبر هيرو فده تقيمي ونقدي له كفيلم دراما وجريمة مش كسوبر هيرو لان لو كسوبر هيرو كنت حعدي الغلطات ديه لانه حيبقا موجه لفئة معينة ممكن يتضحك عليها عادي 📌 وبس في الاخر تقيمي للفيلم 6/10⭐ وانصح كله انه يخشه سينما عشان يشوف الكام نقطة اللي اتكلمت فيها ويناقشني فيها وبردو الفيلم بشكل عام ممتع فحتبقا تجربة حلوة يعني وبس ..
الإنتقام أم الأمل ؟، صراع النسخة الجديدة من باتمان
![احمد رميح]()
احمد رميح- 06:44 صباحًا - 7 مايو 2022
- نقد آخر لنفس المستخدم
احمد رميحواضح إننا تاثرنا جدًا بثلاثية باتمان اللى عملها المخرج العبقري نولان، تأثرنا بكم التقنية العالية والبهرجة اللى بتحيط بفارس جوثام، كل أداواتة المبهرة سواء من حيث الشكل الأخاذ أو الإمكانيات المهولة لهذة الأدوات، كمان صورة الفيلم شديدة اللمعان في كل أجزاء ثلاثية نولان. وضح هذا التأثر لما حسيت بإحباط نوعًا ما وأنا بشوف نسخة باتمان 2022 للمخرج مات ريفيز، وده لأن المقارنة نشاط بديهي لما تتعرض لفيلمين بيتناولوا نفس الموضوع، أو بمعنى أدق نفس البطل. الحقيقة الإحباط – بالنسبة لي – مستمرش كتير وأنا بتفرج...اقرأ المزيد ومع الوقت تحول إلى إستمتاع بعد ما تأملت كم الإختلاف بين النسختين وهو إختلاف في ظاهره "فقير" مقارنة بنسخ باتمان النولانية، لكن الحقيقة أنه إختلاف ثري جدًا من وجهة نظري. صحيح إحنا مشفناش باتمان هنا بأدواتة الجبارة، إللى كانت في نسخ نولان، سواء السيارة اللى كان فاضلها إتنين فولت وتطير، وتواضعًا منه صمم طيارة لوحدها، وأكتفى بإنها مدرعة وبتحتوي على موتوسيكل فيه قاذفات قنابل وكاوتشاته بتمشي في كل الإتجاهات، بالعكس شوفنا في نسخة ريفيز سيارة أعظم مميزاتها وجود جهاز " النيتروس " إللى بيدي سرعة مهولة للسيارات وموجود في الحقيقة مش شئ شبه خيالي زي مدرعة باتمان نولان. في نسخة باتمان 2022 شفنا باتمان وهو قريب نوعًا ما من أقرب مدني بيحمل السلاح من حيث الإمكانيات، مشفناش البطل الخارق اللى فيه فجوة بينه وبين سلطات جوثام، مش بس مواطني جوثام العاديين، من حيث الإمكانيات، وممكن دي تبقى ثغرة بكل تأكيد لأنك في النهاية بتقدملنا واحد من السوبر هيروز مش مواطن إنسان طبيعي، وأشكر أحد أصدقائي إلل نبهني لنقطة السوبر هيرو دي. نسخه 2022 ملتزمه جدًا بواقع جوثام السوداوي وظهر ده من خلال ألوان الفيلم الباهته وشكل جوثام القبيح والمُهمل وطبعا بشكل لا إرادي هتتذكر نسخة الجوكر 2019 والسببب مش بس الألوان والأقنعة إللى كانت في المشاهد الإفتتاحية، لا ده كمان إيقاع الفيلم المتروي جدًا، الفيلمين مساحة دراما الجريمة فيهم أكتر، وكانت قربت شوية من دراما الجريمة المرعبة. كمان باتمان هنا نظراته مش نظرات ثقة وشموخ زي باتمان نولان، بالعكس كانت كلها إرهاق وإكتئاب، وتشكك طول الوقت، ما هو كائن ليلي ما بيخرجش من بيته بقاله سنين وزعلان على مدينتة. كمان كان عايش دور المنتقم وكان دايمًا بيواجه المجرمين بكلمة " أنا الإنتقام " ولكن بماذا إستفادت جوثام من إنتقام باتمان ؟ لقد تفرغ فارس جوثام لمحاربة الجريمة ليلًا والإنتقام من المجرمين حتى سيطرت عليه كل سكرات الليل وكآبته، فاهمل مشاريع والده – مستر وين - الخيرية وبات صندوق أموال تجديد المدينة مرتع لكل الفاسدين. وبدلًا من تحسين أحوال مواطني جوثام سيطر البؤس واليأس على مواطنيها وباتت المدينة مدينة قاتمة وقابضة، تمامًا كما انهزم والده من قبل بخديعة " فالكوني ". إنشغل باتمان بمحاربة الجريمة بدلًا من المساهمة في بيئة أفضل لمواطنيها، وده عبر عنه مشهد الشعلة في إيد باتمان والناس ماشيه وراه بعد غرق المسرح بمياه الفيضان – المصطنع - قبل ما باتمان يقول ده بشكل مباشرة في نهاية الفيلم لما قال، " بدأت أدرك الآن أن الإنتقام لن يغير الماضي، يحتاج الناس إلى الأمل ". كان جسد باتمان أو بروس وين يحاول أن يخبره دومًا أن الإنتقام ليس ما تحتاجه جوثام ، ولكنها تحتاج الأمل أكثر من الإنتقام، وده ظهر من وجهة نظري في شحوب وجه "بروس وين"، وظهورة بمظهر من ثقُـل عليه الحمل، مهموم بحال مدينتة، أرهقه الإنتقام. وهنا لابد أن تتذكر بطل ذا ريفينانت “ Hugh Glass “ إللى قام بدوره ليوناردو دي كابريو، بعد رحلة طويلة للبحث عن من قام بخيانته وسعيه للإنتقام منه، ليكتشف في النهاية أن الإنتقام لن يفيده في شئ. نسخة باتمان نولان مكنتش مرهقة نفسيًا بعكس نسخة "مات ريفيز"، وإن كان في الجزء الثالث " نهوض فارس الظلام " كان "بروس وين " مكتئب ومريض وهزيل ولكنه كان معتزل الناس ومعتزل كل شئ بعكس باتمان ريفيز اللى كان وسط كآبته مستمر في مكافحة الجريمة ومهموم بحال مدينة جوثام، لكن الأتنين بيتحملوا جزء من الذنب فيما وصلت إليه أحوال هذه المدينة، بعدما أهملوا المشاريع الخيرية، سواء مشروح تجديد المدينة في نسخة مات ريفيز، أو تمويل مؤسسات وين الخيرية التي تهتم برعاية أيتام المدينة وتركهم فريسة للمجرمين أمثال المقنع، " بين " أو للحقد والضغينة والإنتقام كما حدث مع " ريدلر " طريد باتمان في هذه الجزء. تفصيلة الكروت المتروكة مع جثة كل قتيل وبها رسالة إلى باتمان مكتوبة بصيغة " شعرية " من "ريدلر" القتل المتسلسل - المنتقم أيضًا ولكن بدوافع مختلفة - ذكرتني بتفصيلة بفيلم " Righteous kill " بطولة دي نيرو والباتشينو وهي تفصيلة متناسقة مع جو القتلة المتسلسلين ذوي الأنماط المختلفة. ملاحظة أخيرة على إختيار كولن فاريل لتجسيد شخصية البطريق، قبل الفرجة على الفيلم توسمت خير في وجود إسم كولين فاريل على بوستر الفيلم، وليس من عادتي القراءة عن الفيلم قبل مشاهدتة - أعشق المفاجآت - بعد نهاية الفيلم تفاجئت بوجود إسم كولين فاريل في التترات الأولى للنهاية، ومن شدة المفاجأة – المضحكة – ما إنتظرتش للتترات الطويلة وروحت موقع IMDB عشان أشوف أنهي شخصية قام بأداها الممثل ده، وتفاجئت أنه البطريق، كان مكياج أخفى كل ملامح كولن فاريل.. حرفيًا وأكتشفت قد إيه أنا اتسحلت في الفيلم وإندمجت لدرجة نستني اسأل هو فين كولن فاريل إللي شفت أسمه على البوستر قبل المشاهدة ؟ One day you’re on top, the next you’re a clown لو خاتمة الفيلم زي ما فهمت، فـ إحنا على موعد مع جزء تاني، ونسخة جديدة من " جوكر " جوثام، كمان المشهد المحذوف أكدت لي وجود أجزاء ثانية، وبطلها هيكون نسخة جوكر جديدة في نسخة باتمان الجديدة "مات ريفيز "، وأعتقد ده سر من أسرار حذف المشهد دي، لأنها بتكشف بنسبة 80 % من شكلة، لكن السبب الوجيه لحذفها إنه ليس لها أي ضرورة دراميًا بعد ما أقتصرت على مجرد كلام مباشر جدًا بيحرق بعض مشاهد النهاية خاصة في المعركة الأخيرة. ( المشهد موجود على اليوتيوب وصفحة الفيلم على الـ IMDB)
