أراء حرة: فيلم - لص بغداد - 2020

أنا شوفتك فين قبل كدة؟

"الأربع تماثيل اللي خبى فيهم الإسكندر مفاتيحه ألاقيهم فين؟"؛ من هنا أبدأ كلامي، الفيلم جيد جداً و فكرة جديدة على السينما المصرية ، سيناريو مشوق و حوار ممتع لكن طوال مشاهدتي للفيلم كان يراودني سؤال واحد هو: أنا شوفت الكلام ده امتى و فين؟ يمكن لأن الأحداث مشابهة جدا للأفلام الأمريكية زي إنديانا جونز لكن بإضافة بعض النكهات المصرية. ثم نأتي إلى أبطال العمل،. محمد امام ممثل شاطر في إنه بينوع في أفلامه و في أدواره لكن هو مش مقنع في طريقة أدائه فأنا مش شايف فرق بين يوسف الراوي و آدم صبري في جحيم في...اقرأ المزيد الهند أو سرور أبو الدهب في ليلة هنا و سرور ؛ فأنا شايف إنه لو صلح الحتة دي عنده هيكون نجم صف أول. فتحي عبد الوهاب ممثل ذكي لإنه بيقدر يقنع المشاهد بالشخصية اللي بيأديها و أنا أتوقع إن إحنا هنشوفه قريباً في أعمال بطولة مطلقة ليه. أمينة خليل مش عارف أقول عنها إيه لكن نصيحة للبنت دي هي لازم تغير طريقة تمثيلها لأن أنا كواحد من المشاهدين كل ما أشوف تمثيلها أحس إنها قاعدة مع صحابها في كاڤيتريا مش واقفة أمام كاميرا و بتأدي شخصية في عمل معين، فأنا رأيي إنها لو غيرت طريقة تمثيلها هتبقى نجمة كبيرة في الصف الأول. أنا طول وقت مشاهدتي للفيلم كنت حاسس إنها روبوت متبرمج على الحوار من غير أي أداء. ياسمين رئيس تنفع في الأكشن و الدراما و الرومانسي لكن الكوميدي مش هتنجح فيه قد كدة أينعم هي دمها خفيف شوية لكن مش بالقدر الكافي و المطلوب لكن أنا شايف إن كان فيه إنسجام بينها وبين محمد امام. وأخيراً محمد عبد الرحمن الذي تفوق على نفسه في هذا الفيلم واستطاع أنه يعمل روح جميلة جدا للفيلم فأنا رأيي إن دوره في هذا الفيلم هو أفضل أدواره. الفيلم كان ممكن يبقى أحسن لو كانو بطلو يقلدو الأفلام الأجنبية مش بس في الأحداث لأ كمان في لوك الممثلين كمان زي شعر محمد امام الطويل و لوك أمينة خليل و شعر ياسمين رئيس الأحمر ، كان هينجح جدا لو كانو طبقو الفكرة بالطريقة المصرية وليس تقليد أعمى. الإخراج كان أكثر من رائع وكذلك الموسيقى التصويرية و الجرافيك ناهيك عن الفكرة المميزة والأحداث المشوقة وللمرة الثانية أحب أقول إننا لازم نبطل نقلد الأجانب حتى يكف المشاهدين عن ترديد سؤال واحد عند مشاهدة أي عمل جديد وهو: "أنا شوفتك فين قبل كدة؟" تقي

2 مفيد
0 غير مفيد