Echo 3  (2022)  صدى 3

أراء حرة

 [1 نقد]

Echo 3": إثارة بلا توقف، ولكن بأي ثمن؟

• دعاء أبو الضياء
• 07:24 صباحًا - 7 اكتوبر 2025
• نقد آخر لنفس المستخدم

مسلسل **Echo 3** من بطولة لوك إيفانز وميشيل هيوزمان، وإخراج بابلو ترابيرو، يعتبر من أكثر الأعمال اللي شدتني مؤخرًا، والسبب مش بس فكرته، لكن كمان طريقته في السرد والإيقاع السريع اللي خلى العشر حلقات يمروا كأنهم فيلم طويل مشوق. المسلسل مقتبس من رواية كتبها جيسون هورويتش، ورغم إن الرواية نفسها مش ضخمة جدًا، إلا إن المعالجة البصرية حولتها لعمل درامي مليان توتر، أكشن، ومشاعر متداخلة. فالقصة بتدور حوالين اختطاف الباحثة آمبر، واللي بيحاول زوجها وأخوها ينقذوها من وسط صراع معقد في أمريكا اللاتينية. اللي...اقرأ المزيد بيشد هنا إن مفيش خطوط درامية كتير مشتتة، إحنا بنتابع خط واحد بس، لكن تم تقديمه بشكل ذكي ومكثف يخليك مش قادر تشيل عينك عن الشاشة. منن أول مشهد، واضح إن المسلسل معتمد على إيقاع سريع جدًا. مفيش مط أو مشاهد محشورة، وكل حلقة بتكمل اللي قبلها من غير ما تحس إن في حاجة اتكررت، دي من أكتر الحاجات اللي عجبتني، لأن في وقت المسلسلات اللي بتحاول تمط كل مشهد، ولكن Echo 3 قرر يديك التجربة كاملة ومركزة. كمان التصوير والإخراج فعلاً في مستوى تاني، فالمشاهد العسكرية اتصورت بحرفية عالية جدًا، والمخرج استخدم زوايا تصوير ولقطات تخلي المشاهد يحس إنه جوا المعركة، ويمكن كان في لقطات ممكن تبان مألوفة لأي حد شاف أفلام إنقاذ أو مهمات عسكرية قبل كده، بس اللي يميز العمل ده هو إن بابلو ترابيرو قدر يستخدم القوالب دي من غير ما تقع في التكرار أو تبقى مبتذلة. اللي بهرني كمان هو اختيار أماكن التصوير، المشاهد اللي فيها الثوار مثلًا خلتني حسيت بجد إني في "دولة جوا دولة"، وسط توتر سياسي بين كولومبيا وفنزويلا. الأماكن، الإضاءة، حتى تفاصيل الصوت—كل حاجة ساعدت في نقل الإحساس ده للمُشاهد بشكل واقعي. وطبعا من ناحية التمثيل، فلوك إيفانز وميشيل هيوزمان كانوا ممتازين، قدروا يوصلوا مشاعرهم بصدق، وخاصة في المشاهد اللي كانت بتجمعهم بالحرب النفسية اللي بيخوضوها لإنقاذ شخص بيحبوه، أما جيسيكا كولينز، فبصراحة فاجئتني بدورها، شخصية العالمة اللي في الأصل بتشتغل مع المخابرات، ومقتنعة إنها بتأدي رسالة سامية، قدمتها بحس عالي جدًا وخليتني كمشاهدة أتساءل: هي فعلاً بتعمل الصح؟ ولا بتعيش في وهم نبيل؟ ولكن، رغم كل ده، حسيت إن في نقطة غريبة أو ناقصة في المسلسل: مفيش رسالة واضحة، ولا حتى تساؤل أخلاقي حقيقي، يعني آه، القصة عن إنقاذ أختهم، وكلنا أكيد بنتعاطف مع ده، بس هل من المنطقي إن شقيقها وزوجها يضحوا بأرواح ناس كتير، ويدخلوا دولتين(كولومبيا وفنزويلا) في حالة شبه حرب، بس علشان ينقذوا شخص واحد؟ المسلسل ماحاولش يجاوب على ده، ولا حتى لمح إن في تساؤل ممكن يتقال هنا، وكأن اللي بيعملوه مبرر تمامًا، حتى لو على حساب حياة أبرياء كتير، ده خلاني أحس إن العمل رغم قوته من ناحية الحبكة والتنفيذ، كان محتاج لمسة أعمق على المستوى الأخلاقي والسياسي، التساؤلات دي كانت ممكن تدي للقصة بُعد أكبر وتخليها مش بس مشوقة، لكن كمان محفزة للتفكير. ورغم إن النهاية بدت شبه مكتملة، إلا إنها سابت الباب مفتوح لاحتمال يكون في موسم تاني، خصوصًا لو حبوا يوسعوا العالم السياسي اللي اتبنى في الخلفية. ** في النهاية** مسلسل Echo 3 هو عمل مشوق جدًا، سهل المتابعة، ومناسب جدًا للي بيحبوا الأكشن السريع والقصة المباشرة. هو مش مسلسل معقد، لكنه بيشدك، وبينقلك لعالم مليان توتر ومخاطرة، بس، زي ما قلت، السؤال الحقيقي اللي فضلت أفكر فيه بعد ما خلصته: هل فعلاً تستاهل حياة شخص واحد كل ده؟

• 0 مفيد
• 0 غير مفيد

أضف نقد جديد