The Gorge  (2025)  المضيق

أراء حرة

 [1 نقد]

The Gorge: قصة حب تولدت وسط الرصاص والغموض

• دعاء أبو الضياء
• 07:39 مساءً - 10 سبتمبر 2025
• نقد آخر لنفس المستخدم

أحيانًا بييجي فيلم من غير ضجة، ويفاجئك من أول مشهد لآخر لحظة. وفيلم The Gorge واحد من الأفلام دي… حكاية رومانسية ناعمة وسط عالم قاسي ومليان غموض، دخلت أتفرج على الفيلم من غير أي توقعات… لا شوفت إعلان، ولا حتى البوستر شدني، كل اللي خلاني أشغله إني اشتركت في Apple TV وخلاص. لكن اللي حصل كان مفاجأة جميلة. في البداية، قصة الفيلم تبدو عادية: اتنين من أفضل القناصين بيتولوا مهمة حراسة جانبي مضيق استراتيجي، وبيبدأوا يتعرفوا على بعض ويقعوا في الحب، قبل ما يكتشفوا سر خطير متعلق بالمكان نفسه. لكن البساطة...اقرأ المزيد دي كانت مدخل لحاجة أعمق. وهنا هنلاقي إن القصة مش مجرد إطار لأحداث أكشن أو خيال علمي، لكنها كانت قصة حب بتتبني ببطء وواقعية وسط عالم منعزل بالكامل. فالعلاقة بين أنيا تايلور-جوي ومايلز تيلر كانت عنصر القوة الأهم في الفيلم. في مشاهد كتير بتحس فعلاً إنهم اتنين بيحبوا بعض، مش بيمثلوا. الحوارات بينهم كانت طبيعية وجديدة، فيها حس فكاهي خفيف، ودفء، وده خلى الرومانسية ما تحسش إنها مفتعلة أو هوليوودية زيادة عن اللزوم. حتى مع طول بعض المشاهد، مافيش ملل… لأن البناء كان ناعم ومتدرج، وده ساعد إنك تتعلق بالشخصيات فعلاً. الجميل كمان إن الرومانسية كانت نظيفة، بلا مشاهد خارجة أو استغلال لذلك، ومع ذلك وصلت الإحساس، وكان فيه مشهد واحد فقط بيلمح لعلاقة جسدية، لكن بذكاء وبعيد عن الابتذال، وده خلى العلاقة تحسها عذرية ورومانسية حقيقية وسط عالم بيغلي من الخطر والعنف. اللي يميز "The Gorge" فعلاً هو مزج الرومانسية بالخيال العلمي والأكشن بشكل متوازن. المخرج سكوت ديركسون عرف يخلق عالم له طابع خاص، وفيه غموض من أول لحظة. المشاهد الأخيرة خلتك تعيد التفكير في كل حاجة كنت فاهمها، وده بيخلي الفيلم قريب لفكرة الـ"Mind-Bending Romance"، مش مجرد فيلم حركة. ورغم إن الديكورات كانت محدودة، إلا إن المؤثرات البصرية كانت قوية وكافية لخلق عالم غريب ومقنع. فكرة المخلوقات الجوفية كانت مرعبة رغم إنها ما ظهرتش بشكل مباشر. ده في حد ذاته أسلوب ذكي في الإخراج، إنك تخلق الرعب من غير ما توريه بشكل واضح، وده خلاك تحس بخطر حقيقي من غير اعتماد على "CGI" زيادة. ورغم إن دور سيجورني ويفر كان هامشي إلى حد كبير، إلا إن وجودها أضاف ثقل للفيلم، خصوصاً لمحبي أفلام الخيال العلمي. هي أشبه ما تكون بـ"المرشد" أو "صوت الحكمة"، ووجودها أضاف لمسة كلاسيكية للفيلم. الخلاصة: فيلم The Gorge هو مفاجأة غير متوقعة وسط زحمة الإنتاجات التجارية. مش بس لأنه بيقدم قصة حب واقعية وجميلة، لكن لأنه كمان بيغلفها في عالم من الغموض والخيال والإثارة. هو مش فيلم ضخم إنتاجياً، لكنه صادق في مشاعره، وده نادراً ما تلاقيه دلوقتي. لو داخل تتفرج على فيلم أكشن، هتتبسط… لو داخل تشوف قصة حب، هتتعلق… ولو بتحب القصص اللي تخليك تفكر، فهتلاقي ده كمان.

• 0 مفيد
• 0 غير مفيد

أضف نقد جديد