Ice Road: Vengeance (Ice Road 2: Road to the Sky)  (2025)  الطريق الجليدي: الانتقام

أراء حرة

 [1 نقد]

Ice Road: Vengeance أكشن متجمد... ومنطق بيذوب!

• دعاء أبو الضياء
• 09:14 صباحًا - 4 يوليو 2025
• نقد آخر لنفس المستخدم

في البداية وللتذكير فيلم Ice Road: Vengeance جاء كتكملة للحكاية الأصلية لفيلم The Ice Road عام 2021، واحتفظ بطابعه الأكشني المليان تحديات ومطاردات خطيرة على الطرق، بس المرة دي مش المتجمدة، طرق واعرة وجبال. مبدائيا التنفيذ في الفيلم مش بطال، كاميرات محكمة، لقطات طيران مُتقنة، وإخراج فيه حرفية واضحة تدي المُشاهد إحساس بالاندماج وسط البيئات الجبلية. لكن…رغم كل الحرفية دي، المنطق أحيانا كان مسافر بعيد جدا، فمثلا، مشهد إصلاح الأتوبيس بعد حادث ضخم وكبير، في وقت لا يُصدق: كأنهم بس عدلوا حاجة بسيطة في...اقرأ المزيد الكراسي، وشغلوا المحرك وانطلقوا! في الحقيقة، إصلاح حادث كبير زي ده ممكن ياخد أيام، أو حتى أسابيع، مش دقايق معدودة، واعتقد ده خلى المشهد، رغم التشويق، يفقد بريقه وكأننا في لعبة فيديو بتاعت “restart” سريعة. كمان مشاهد القتال والرصاص كانت… أوفر بكتير من اللازم. اللي بيضربوا بالرصاص بالألي – سواء أعداء أو أبطال – أحيانا شكلهم كأنهم مش مهتمين بالحياة ولا بالذخيرة، كأن الموضوع مش أكشن دقيق، لكن حفلة ألوان وزخارف صوتية. ولو اتكلمنا في السريع عن الأداء التمثيلي فليام نيسون: البطل الذي لم يتعب من البطولة، واللي تعودنا عليه في أفلام الأكشن لفترة طويلة، ممكن نشوفه في Ice Road: Vengeance بطل لا يُقهر، يتحمل ضربات لا تُحصى، يقاتل، ويهرب… وكل ده في سن مش قليلة خالص. افتكر أن نيسون منذ فترة مش بعيدة أشار إنه حابب يبتعد عن أفلام الأكشن دي، وأنه عارف حدود جسمه، وأنه مش منطقي إنه يعمل كل ده في السن ده، وفي كل مرة بننتظر أن تكون آخر محاولة منه يُثبت إنه لسه قدها، أو مجرد محاولة يحافظ على قاعدة معجبينه القدامى، نلاقيه رجع تاني بفيلم أكشن وحركات وقتال غير منطقي بالمرة ولا يتناسب مع لياقته في الوقت الحالي. لو عايزين نكون واقعيين، الأداء التمثيلي كان جيد على قد ما الحدث محتاج، بس طبعا مش ممكن نسيب القصة والسيناريو يحكوا أكتر عن المنطق والتوازن في الأكشن، نيسون، رغم تعب السن، قدر يدي الفيلم جاذبية وقوة شخصية، لكن كنا محتاجين توازن أكبر بين الواقعية والخيال. في النهاية Ice Road: Vengeance فيلم فيه تنفيذ جيد وخلفية تصويرية واقعية بتخلي الجو مكهرب ومشحون؛ لكن الأخطاء المنطقية، والسيناريو اللي بيقرب أكتر للخيال منه للواقع، بتخلي الفيلم كده زي قفزة كبيرة في الهواء من غير شبكة أمان. فلو كنت من عشاق الأكشن والمتعة السريعة، هتلاقي الفيلم ممتع رغم عيوبه، لكن لو بتدور على تماسك واقعي وسيناريو مدروس، هتطلع شوية محبط.

• 0 مفيد
• 0 غير مفيد

أضف نقد جديد