فيلموجرافيا 🎬 عيار ناري ( مراجعة الفيلم )

  • فيلم عيار ناري هو فيلم جريمة و غموض بيقدم من وراها رساله و بيشرح من خلالها وجهة نظر و بيجاوب علي سؤال هل للحقيقة وشين !؟ ...
  • صناع الفيلم كانوا مخلصين جدا للفكرة اللي بيقدمها الفيلم و ده ظهر في الموسيقى التصويرية و آداء الممثلين و عدم اهتمام الفيلم انه يقدم مفاجأة و ده خلى الفيلم أقرب للشكل الفني و النتيجة انه حط علي صناعه تحديات أكبر منهم و للأسف فشلوا في أغلبها ....
  • إخراج الفيلم لكريم الشناوي و اللي دي تعتبر اول تجاربه في الإخراج و كعادة أي مخرج في أول أعماله بيبقي عايز يثبت قدراته و النتيجة كانت تكلف فني واضح و خصوصاً في اختيار زوايا التصوير و الكادرات بس يحسبله اهتمامه بالتفاصيل و اختيار مواقع تصوير جديدة و ملاءمة للأحداث بس في الآخر دي شغلة مخرج منفذ ..
  • سيناريو الفيلم لهيثم دبور اللي كان فيه مشاكل كبيرة في الركائز الأساسية اللي بيقوم عليها الفيلم و اعتماده علي الصدفة كأداة لتحريك أغلب الأحداث و غير كده مبررات الشخصيات في أغلب تصرفاتها كانت ضعيفه جدا لكنه حافظ علي قدر معقول من الإثارة في الأحداث اما الحوار فكان مخلص لرساله الفيلم و بشكل عام كان كويس ماعدا شوية جمل عميقة مكنتش في محلها ...
  • فريق البطوله كان كويس جدا و قدم أداء يحترم بس ضيوف الشرف في الفيلم ده هما الأبطال الحقيقين زي مثلا أحمد مالك اللي برغم من كونه مركز كل الأحداث إلا أنه مظهرش غير في مشهد واحد أو أحمد كمال اللي برغم من دوره الصغير و ظهوره في مشهد إلا أنه من أفضل المشاهد اللي في الفيلم ...
  • الموسيقي التصويرية لأمين بوجافة كانت مناسبه جدا للأحداث و الديكورات كانت كويسة و فيها تفاصيل حلوة ...
  • بغض النظر عن العيوب اللي موجودة في الفيلم بس معاد عرضه جرأة كبيرة من صناعه و بيفتح الباب أننا يبقي عندنا سينما طول السنه و دي حاجة لازم ندعمها ... عليــ الجعفراويـ

Copyright © Damlag S.A.E
Owned by DAMLAG S.A.E: