أشرف عبدالباقي يوضح السبب وراء اعتذاره لجماهير نادي الزمالك مرتين!

أشرف عبد الباقى

دافع الفنان أشرف عبدالباقي عن نفسه بعد الهجوم عليه بسبب اعتذاره مرتين لجماهير نادي الزمالك، معتبرين أن ذلك قد قلل من شأنه كثيرًا لدى محبيه وجمهوره.

وكتب عبدالباقي عبر صفحته الرسمية بموقع "فيس بوك" موضحًا كافة التفاصيل والسبب وراء اعتذاره أكثر من مرة: "أتمنى يكون تعليقي على موضوع الاعتذار هو الأخير وبعدين نروح كلنا نشتغل، أنا قريت تقريبًا كل التعليقات اليومين اللي فاتوا، وشفت رد فعل الناس. أنا هحاول أوضح الموضوع ببساطة، في الموسم الأول والتاني لما كنا تياترو مصر، اتقال إفيهات عن الأهلي والزمالك ممكن ناس يشوفوا أن ده إيفيه كوميدي وخلاص لكن فيه ناس كتير من جمهور الزمالك زعل، كان أول رد فعل ساعتها ليا أنا والفرقة أن ما ينفعش نزعل جمهور كبير مننا وكنت ساعتها بقدم برنامج (مصر البيت الكبير)، واستضفت الشباب في البرنامج واعتذرنا لجمهور الزمالك ووعدناهم أن مش هايحصل هزار تاني يضايقهم، ما ينفعش نرجع في كلامنا لأننا هنظهر صغيرين في نظر الناس كلها مش بس الناس اللي اتضايقوا من جمهور الزمالك".

وأضاف عبدالباقي: "بعد الموسم التاني حصل خلاف بيني وبين الشركة المنتجة وانفصلنا أنا والفرقة كلها وعملنا مسرح مصر فكان طبيعي نستعين بمحامي، وكان أول مرة التقي بأمير مرتضى وكان بيربطه صداقة بمعظم الشباب من الفرقة واتفقنا أنه يبقي المسئول عن القضايا نتيجة الانفصال عن المنتج، طلب مننا وقتها أن ما نزعلش الجمهور مننا، وردينا أن الموضوع ده انتهى، الكلام ده كان من شهور قليلة وكان أول مرة ألتقي بالمستشار مرتضى منصور وقال لنا أنه مبسوط من المسرحيات اللي في التوقيت الصعب حاجة تضحك الناس بس ما تزعلوش الزملكاوية منكم وكان ساعتها ربيع مقلده في مسرحية قاله أنا مزعلتش بالعكس قعدت أضحك بس بلاش الزمالك".

وتابع عبد الباقي: "وده كان تاني وعد مننا ما ينفعش نخل بيه، المسرحية اللي اتعرضت اتصورت اليوم اللي فاز فيه الزمالك بالدوري، المشهد ده أنا مش معاهم على المسرح، وهما بقي عندهم خبرة كبيرة للارتجال ومتفقين من قبل كده على حاجات ما ينفعش نهزر فيها منها حساسية الكورة، اتصورت المسرحية ولسرعة بداية العرض ماحضرتش مرحلة المونتاج اللي أكيد هاطلب من المخرج مونتاج الإيفيه، مش خوفًا ولكن احترام وعدنا لجمهور الزمالك ورئيسه وأمير مرتضى، اللي وقفوا معانا موقف قوي عشان نقوم بالمشروع، يارب أكون رديت على الكومنتات اللي هاجموا أو دافعوا".

وكانت الحلقة الأولى من عروض "مسرح مصر" التي عرضت تلفزيونيًا قد أثارت جدلًا كبيرًا بين جمهور نادي الزمالك، بعدما ألقى أبطال العرض جُملًا حوارية تسخر من نادي الزمالك وفوزه اﻷخير بدرع الدوري.