• Mido Rammstein
• 12:00 صباحًا - 17 ابريل 2013
• نقد آخر لنفس المستخدم

كبداية , كان بقالى كتير مشوفتش لتوم كروز فيلم كويس ، أقصد من حيث القصة و الحبكات الدرامية ، من أيام فيلم Vanilla sky و فيلم The last samurai , و ده خلانى ادخل الفيلم متحفز ، لأن توم كروز نجم كبير و بصراحة كنت شايف انه بقاله فترة شغال على الأفلام التجارية بتاعت الشباك و بس ، لكن الفيلم ده رجعلى ثقتى فى توم كروز تانى . الفيلم قصته كويسة جدا , و شغالة على تيمة ايه اللى هايحصل للأرض فى المستقبل زى ما شوفتوا أكيد فى تريلر الفيلم , قصة ممكن تشوفها بسيطة بس مع التعمق فى الفيلم هاتلاقى انها بتخفى اكتر مما تظهر ، و هاتلاقى مفاجآت هاتخليك قاعد مشدود للكرسى من بعد مرور نص ساعة من بداية الفيلم و هاتفضل تكتشف فى مفاجآت لحد نزول التترات . من حيث أداء الشخصيات ، ف توم كروز كان أدائه مقنع جدا و يشدك لشخصية جاك هاربر اللى بيمثلها , وقدر يوصل للمشاهدين أحساسه بالحزن على مصير الأرض و مشاعر الاضطراب اللى هاتسيطر عليه فى منتصف الفيلم لحد قبل الآخر بشوية و هاتعرف ليه حس بالمشاعر دى لما تشوف الفيلم مش عايز احرقه , أداء مقنع جدا لتوم كروز و ده المتوقع من نجم كبير زيه . بالنسبة لأندريا ريسبورغ اللى بتقوم بشخصية فيكتوريا , فأنا أول مرة أشوف ليها فيلم بصراحة , لكن أدائها أكتر من مذهل , و أستمتعت بيه جدا مع مرور الفيلم ، هاتحس ان هى و أولجا كوريلينكو ( اللى قايمة بدور جوليا ) هما اللى شايلين الفيلم فعلا بالرغم من ظهورهم القليل الى حد ما و كتر ظهور توم كروز نفسه . بالنسبة لأولجا كوريلينكو اللى بتقوم بشخصية جوليا فهى ممثلة موهوبة فعلا و أنا شخصيا بحب تمثيلها جدا و أدائها فى الفيلم كان من أفضل الأدوار اللى لعبتها بالرغم برضو من ظهورها القليل ، لكن هاتقدر تشدك ليها و تحسسك بالتعاطف معاها بمرور الوقت ، و هاتحسسك بكل أحساس هى مثلته فى الفيلم ! مورجان فريمان بالرغم من قلة ظهوره هو الآخر , فأدائه كالعادة أكتر من ممتاز و هايحسسك بأنك بتحب الشخصية اللى بيلعبها بالرغم من انه هايبان فى الأول أنه شرير لكن مهما كان هاتحبه برضو ! الفيلم فى العموم رائع ، و بيمثل عودة لأفلام الخيال العلمى المعتمدة على القصة مش على تأثيرات الكومبيوتر و الجرافيكس الضخمة ، و ده خلاه فى نظرى من أفضل الأفلام اللى توم كروز مثلها فى حياته .

• 2 مفيد
• 0 غير مفيد