• دعاء أبو الضياء
• 12:00 صباحًا - 10 اكتوبر 2013
• نقد آخر لنفس المستخدم

كل علاقتي بالسينما الهندية أو بوليوود هو النجم (أميتاب باتشان)؛ يمكن السبب يرجع في ده للأفلام الهندية الغير عقلانية اللي اتفرجت عليها من أكتر من 25 سنة تقريباً، واللي كان أغلبها بطلها أميتاب، خاصة الأفلام اللي كل ماالبطل يتقتل فيها يصحى تاني، أو إنه (تتقطع رجله وإيديه ورأسه كمان ويفضل عايش)!! وده اللي خلاني قفلت منها وقررت إني ماشاهدش أي فيلم هندي خالص، أو السبب يرجع لعدم ميلي للأفلام الاستعراضية والغنائية بشكل كبير وخاصة الهندية بالرغم من الموسيقى الجميلة اللي بتقدمها،، ولكن أول ما عرفت أن في فيلم هندي جديد هيتعرض في السينمات المصرية من بطولة النجم (شارو خان) النور الأحمر نور عندي تاني،،،، ياااااااااا ربع قرن تقريبا على عرض أخر فيلم هندي في مصر، فمن المعروف أنه تم إيقاف عرض تلك الأفلام لأسباب خاصة بغرفة صناعة السينما وقتها، وكان المتفق عليه عرض 5 أفلام هندية فقط طول السنة.

Chennai Express) بطولة شارو خان والجميلة ديبيكا بادوكان بتدور أحداثه حول أحد الشباب اللي بيتوفى جده ويجد نفسه مضطر لإلقاء رماد جثته بأحد الأنهار الهندية تنفيذا لوصية جده، وأثناء رحلته إلى هناك يتعرف على فتاة جميلة ابنة زعيم عصابة ويقع في حبها...من هنا نقدر نقول إن الفيلم عبارة عن توليفة من الدراما الهندية الرومانسية الممزوجة ببعض الإثارة والمغامرات، وإن كان هناك بعض الكوميديا البسيطة اللي زُج بها واقحمت على الأحداث.

ولو بدأنا بالحديث عن القصة والسيناريو المكتوب فاعتقد أنه شبيه بقصص كتيرة أخرى من حيث التيمة الرئيسية للعمل وهي قصة الحب اللي بتجمع بين أي بطلين، مع اختلاف بسيط في الخيوط الفرعية، زي إن البطل بعيش حياة مملة، والمغامرات اللي هيقوم بيها مع أصدقاؤه، والمشاكل اللي هيقع فيها بعد تعرفه على حببيته، أما لو اتكلمنا عن تنفيذ العمل وقدرة المخرج (روهيت شيتي) على تقديم عمل فني جيد، والحبكات الدرامية اللي وضعها مؤلفي العمل، فنقدر نقول إنها كانت ضعيفة أو مقبولة على اﻷكثر خاصة المشاهد اللي تعرض فيها راهول لمخاطر بعد تعرفه على حببيته مينا وتغلبه عليها كلها. أما عن ايجابيات الفيلم فاعتقد إن من أفضل الأشياء اللي قدمها المخرج كان أماكن التصوير والطبيعة الجميلة اللي بتتميز بيها الهند وده أكد على الانتاج الضخم للفيلم واللي دايما بتتميز به الأفلام الهندية، أيضا الاستعراضات الجميلة اللي قٌدمت، والموسيقى التصويرية اللي كانت مناسبة لأحداث الفيلم.

شاروخان أكد على موهبته ومنافسته لنجوم هوليود، وإنه يستحق الشهرة العالمية واختياره ضمن أكثر الشخصيات نفوذا وتأثيرا في العالم.

الفيلم يستحق المشاهدة واعتقد أن جمهوره من الكبار والصغار وإنه هيحقق إيرادات عالية جدا.

• 1 مفيد
• 0 غير مفيد