• Abdelrahman Mohammed
• 03:34 مساءً - 21 اغسطس 2016
• نقد آخر لنفس المستخدم

مراجعة و مناقشة فيلم اشتباك .. بدون حرق .

واحد من افضل افلام العام اللي شوفتها بدون شك

اهم رسالة تلخص اسم العمل .. ان الاشتباك ليس اشتباك مظاهرات او دموي .. بل هو اشتباك الفكر .. اشتباك الانسانية عندما تبدأ في الاختفاء تدريجيا بداخلنا ..

السيناريو : جيد جدا و محكم جدا و تقريبا لان الفيلم من افلام المكان الواحد ده ساعده .. لكن ارجع و اقول ان الموضوع صعب لان في اكتر من 20 شخصية في الفيلم .. العشوائية المنظمة .. تشابك احداث و مشاعر واخد حقة من كل الشخصيات و ترك بصمة لكل شخصية حتى و ان كان ظهورها مشهد واحد لان كل شخصية لها دوافع واضحة و صريحة و اسلوب مستقل .

الحوار : حوار جيد .. مفيهوش الجمل التعجيزية او الفارقة .. لكن في جُمل في الردود كانت عبقرية .. و عبقريتها في موقعها من الرد .

الاخراج : جيد جدا .. محمد دياب صانع افلام متميز سواء كمخرج او سيناريست .. في الفيلم ده دياب بين اخلاصة و تعبه في العمل بشكل كبير و ده يديني جزء مبرر من (الزيطة ) اللي حصلت قبل الفيلم ما يتعرض اي حد اجتهد و تعب كده لازم يحارب عشان يجني ثمار عمله .. على الجانب الاخراجي مشاهد ال Long Shot داخل عربية الترحيلات ممتازة .. الاهتمام باظهار ادق التفاصيل الصغيرة و لكنها مهمة جدا .. شئ يستحق التحية .

الاداء التمثيلي : ممتاز .. الفيلم فيه ممثلين كتير جدا .. لكن كلهم كويسين مفيش حد وحش .. العلاقة الافضل في الفيلم ككل هي علاقة احمد مالك (منص ) و حسني شتا ( فيشوا )و لازم اعترف ان احمد مالك نضج بشكل كبير جدا بشكل يخليني استنى اعمالة الجاية .. نيللي كريم مش محتاجة اشادة لان ده بقى الطبيعي بتاعها .. و لكن في ممثلة من وجهة نظري لها مستقبل رائع و هي مي الغيطي ( عائشة ) هي الوحيدة اللي قدرت تكسب تعاطفي بشكل كامل و ليس جزئي .. و وجبت الاشادة ب محمد قلبظ ( تامر ) لان قدر يجسد السخرية السوداء بشكل متقن جدا.

موسيقى تصويرية تقريبا مش موجودة .. و حتى ان وجدت ضعيفة .. فيلم بهذا الكم من المشاعر و الاحداث اعتقد انه كان لازم يكون له موسيقى تصويرية على نفس المستوى .

تركيز على الجانب الانساني بشكل كبير جدا كان في الاول ساذج و بعديه بمشهد واحد اجبرني على الاعتذار في واحد من افضل المشاهد الانسانية اللي شوفتها في حياتي .. بافضل اداء من جميع الممثلين في الفيلم ...

كان فيه شبه لغز في الفيلم كان واضح و مش محتاج تفكير لكن تم الكشف عنه بدري و اعتقد انه لو كان فضل لاخر الفيلم كان هيبقى افضل .

الكوميديا كانت جيدة جدا و متوظفة صح و قللت من حدة و قسوة الفيلم .. لان فعلا الفيلم قاسي و كئيب .. لكن الكوميديا كانت هدفها و هي بتضحكك متنسيش المشاهد الازمة اللي بيمر بيها الشخصيات .

التقييم النهائي : 9/10

• 1 مفيد
• 0 غير مفيد