• Hossam Waleed
• 09:16 صباحًا - 30 يوليو 2017
• نقد آخر لنفس المستخدم

نادراً ما بيحصل ان فيلم ياخد مكانة خاصة ويتفرد في الصنف بتاعه ويبقى أشبه بالـ(مرجع) لتيمة الأفلام المُشابهة.. خصوصاً لو كان الصنف ده صعب التجديد فيه وبيتطلب نوع خاص من المهارة عشان يتقدم فيه حاجة فعلاً مميزة أكثرهم يمكن تكون أفلام الـ(الغموض - الحرب - الميوزيكال - الرعب) .. .. وأي حد مُتمرّس في مُشاهدة أفلام الرعب لازم يكون شاف الفيلم الكلاسيكي السبعيني (Carrie) أكتر من مرة إن مكانش حاطه ضمن قايمة الأفلام المرعبة المفضلة ليه على الإطلاق.

الفيلم شفته من حوالي إسبوع ومش عارف من ساعتها أطلعه من تفكيري لأنه كان حاجة مختلفة أوي يمكن ماتذوقتهاش قبل كده أبداً.. تجربة كابوسية ومُرعبة حتى النُخاع .. يمكن أكتر حاجة عجبتني في الموضوع اني مش عارف أفضِّل بين كونه (فيلم سايكوكلوجي مُرعب) وممتاز في الحتة دي .. وبين كونه فيلم (سينما) في كتير من الفنيات واللغة الإخراجية والإبداع المونتاجي وحركة وزوايا الكاميرا.. الأمر اللي بالنسبة لشخص زيي مش متعمق في تيمة أفلام الرعب الكلاسيكية هي حاجة مميزة جداً وغير معهودة.

نقطة التميُّز في الفيلم انه بيحترم جداً مفهوم الفيلم المرعب اللي بيأثر عميقاً في نفسية مُشاهده ومش بيبتذل أو يستسهل أي حاجة للوصول لهذا الهدف.. قصته هيا قصة سايكولوجية (مُصدَّقة) تحتمل وقوعها في الحياة الواقعية رغم نبرة الفانتازيا اللي فيه.. النص مش بيحاول يُقمحك أو يستفز مشاعرك أبداً .. في نصفه الأول بيقدم شخصيته (كاري) بكل مراعاة منه ان انتا تشوف فيلم (سايكولوجي) قضيته ذاتها تحتمل الرعب.. مش فيلم (رعب) صريح ومُباشر زي ما كتير أفلام بتعمل وبيبقها فيها الكثير من التلقين والإقحام المُتعمَّد .. .. ومن صميم السايكولوجية دي بتنبع كل مشاعر الفزع والكابوسية اللي ممكن تتخيلها لحد ما ييجي الشوط التاني من الفيلم.. اللي فيه أحد أروع مشاهد الرعب (السينمائية) يمكن في تاريخ السينما.

من الأفلام اللي ماتتنسيش بسهولة واللي فيها معاني رمزية وأيدلوجية كتيرة .. غير الرسالة المهمة عن تقبل الذات والصراع الإنساني الدائم ضد الطبيعة الأم وضد القدر .. بجانب القصة البديعة والمُتقنة جداً اللي واخدة نهج مُغاير تماماً لتيمة أفلام المدارس الثانوية نتيجة الرسم الرائع للشخصيات ودوافعها في نوع فيلم زي ده.. والشاعرية الكبيرة في التعامل مع القضية الزاعقة دي والـ(مَشهديّة) العبقرية اللي وضع بيها المخرج الأمريكي (برايان دي بالما) درس من نوع خاص في كيفية تصميم المشهد المرعب النفسي وسط تتابعات القصة.

فيلم كابوسي بالمعنى الحرفي للكلمة وقريت بعد مُشاهدته انه الفيلم اللي سبب النجاح المُبهر لـ(ستيفين كينج) أشهر من كتب الروايات الأدبية في صنف السايكولوجيكال هوررور بكونه الفيلم الأول المُقتبس عن رواياته.. واللي جت بعدها تحف سينمائية في الصنف ده أمثال (The Shining) (Misery) والفيلم المُنتظر بشدة ليه اللي هاينزل بعد شهرين (It) الإقتباس الفعلي/الأول لرواية ستيفين كينج.. وأعمال تانية بعيد عن تيمة الرعب يمكن أشهرها (The Shawshank Redemption) و (The Green Mile) .. ..

ملحوظة: الفيلم اتعمله إعادة إنتاج سنة 2013 وطلع عمل سئ للغاية مانصحش أي حد انه يشوفه على حساب مُشاهدة الفيلم الأصلي..

• 0 مفيد
• 0 غير مفيد