أراء حرة: فيلم - The Circle - 2000

---

التعامل مع غياب الحبكة ..

• Hossam Waleed
• 08:49 صباحًا - 4 مايو 2018
• نقد آخر لنفس المستخدم

المخرج : جعفر بناهي. تاريخ الإنتاج : ۲۰۰۰ فيلم من غير حبكة بيشمل حكايات خمس أو ست سيدات على أعمار متفاوتة في إيران، تجمعهم تيمة واحدة ومصير حياتي واحد؛ المعاناة اللامنتهيّة. ممكن تكون شفت أفلام كتيرة بالشكل ده، بس المميز هنا هوّا (طريقة) التنقُّل بين الحكايات، مش بطريقة المونتاج المتوازي (ناحيتين بيحصلوا في ذات الوقت)، لكن كل قصة بتسلّم مقاليدها للي بعديها بحيث الموضوع بقى أقرب إنه يكون ده شئ أبدي عام على الجميع، مبقتش فعلاً (قصة) روائية بتتحكي هنا.. أنا حبيت الفيلم جداً مع إنه...اقرأ المزيد مش عامل معادلة بين (قوة) القصص اللي بيحكيها ولا (وقت) كل قصة على الشاشة.. بس الوحدة هنا هيّا وحدة المكان، وفكرة المكان الواحد (طهران، عاصمة إيران) مُستغلة بشكل عبقري الحقيقة.. الفيلم اسمه "دايرة" وهوّا بيسلك السرد الدائري بطريقة أُستاذية في التقديم، مشفتش استغلال لتيمة الحدث وللمكان وللشخوص اللي فيه بالكيفيّة دي قبل كده. بإختصار : ممكن تقول إن الفيلم ميكس ما بين فيلم إيناريتو (Babel)، وفيلم السنة قبل الماضية (Paterson) لجيم جارموش.. الأول في حتة تداخل القصص، والتاني في السرد الدائري. بالمُناسبة، جعفر بناهي ليه فيلم مُنافس على سعفة "كان" فـ دورة السنادي اسمه (Three Faces).

• 0 مفيد
• 0 غير مفيد