Garden State  (2004)  جاردن ستيت

أراء حرة

 [1 نقد]

مُــحــبِــط . .

• Hossam Waleed
• 09:44 صباحًا - 10 مايو 2018
• نقد آخر لنفس المستخدم

مُحبط للأسف.. من أكتر الأفلام اللي كان نفسي تكون صادقة في رؤيتها لأنه بدأ بشكل جذاب وخاطف ومثير جداً، وحسيت إني فعلاً محتاج فيلم من النوع ده أشوفه، انطباع لحظي قوي جالي في الدقايق الأولى من العمل.. لكن مكمّلش.. للأسف. مشكلته الرئيسية إنه مُشتت لأقصى ما تتخيل، عايز يبقى كذا حاجة وبيفشل يكون أياً منها، بيبدأ بتون مُعيّن، ويكمّل بتون، وينتهي بتون.. السيناريو فـ الضياع، والهارموني غايب تماماً. يعني أتوقع لو حد قرأ كلامي ده بعد ما كان شاف أول نُص ساعة بس من الفيلم مثلاً كان هيندهش...اقرأ المزيد أشد اندهاش، لأنه فعلاً فيلم مش وحش أبداً بالمجمَل وفيه نقطتين محددتين تميُّزه بشدة عن أفلام صنفه، بس المؤسف إنه زي ما قُلت مُشتت، ورؤية مخرجه (اللي هوّا نفس بطل الفيلم الأول، والمؤلف) مكانتش موفقة إطلاقاً. بمرور الأحداث، بتكتشف إن فيه حاجات حصلت فـ الأول مكانش ليها أي داعي.. لو جيت تغير شخصية البطل -اللي بادئ الفيلم بنبرة كئيبة فعالة جداً- لشخصية شخص اجتماعي، أو رومانسي.. مافيش أي حاجة كانت هتتغير في الفيلم، ضيف على كده إن الشخصية ذاتها بتتغير بمرور الأحداث بدون مبرر، والأوحش من ده كله، إن الراجل يديلك انطباع في الجزء الأخير إنه "عارف إن هوّا بيمثل".. آسف إني هقولها بس ميتهيأليش إنها مهمة تستخبى أصلاً: المشهد الأخير معمول بشكل تقليدي وسئ للغاية، مشهد وحش فعلاً بيلفُظَك! ** بس ده ميمنعش إني استمتعت بالفيلم في أجزاء كتير منه.. النقطتين المميزتين في الفيلم هما إن (الأغاني) المستخدمة "خرافيّة" ومش أقل من كده، وانتا لو شخص ليك فـ مزيكا البوب الأمريكية هتعشق موود الفيلم، لأن كمّ أغانيه النوستالجيّة رهيبة هنا (الفيلم اتعمل عام ۲۰۰٤). تاني حاجة، هيّا إن "ناتالي بورتمان" بعيد عن قصة الفيلم، عاملة شخصية جميلة جداً.. فتاة مرحة، عشوائية، فوضوية، وبسهولة شديدة بتعشقها وتقع في غرامها. ** بإختصار : الفيلم فارغ تماماً في مضمونه، مش بيقول أي حاجة.. مع إن أجوائه جميلة فعلاً (شبه أجواء "Frances Ha" حبتين)، على الأقل في أول نص ساعة أو أربعين دقيقة منه. صَدَقْ اللي قال : من الصعب صناعة فيلم جيد، ملموسة أوي هنا. معلومة ملهاش لازمة: اللي خلاني أشوف الفيلم أصلاً، هوّا إني امبارح بليل كنت بشوف ڤيديو عظيم جداً لـ WatchMojo بعنوان (Top 10 Hipster Movies) والفيلم ده بمجرد ما جه، خطفني.. ولقيت نفسي بأجري عالـ لاب توب حطيت الفيلم عالـ تورنت أحمله، ورجعت أكمّل الڤيديو . . . تقييمي لو هأدّي تقييم لـ(Garden State) : ٦,٥/۱۰ ** تريلر الفيلم : https://bit.ly/2HZQDze ڤيديو واتش موجو، لازم يتشاف.. من أحسن ڤيديوهات القناة : https://bit.ly/1ILwP6y ساوندتراك الفيلم : https://bit.ly/2rv0sLf

• 0 مفيد
• 0 غير مفيد

أضف نقد جديد