Icarus  (2017)  إيكاروس

أراء حرة

 [1 نقد]

واحد من أفضل وأقوى وأصدم الأفلام التسجيلية على الإطلاق .. استثنائي!

• Hossam Waleed
• 07:44 صباحًا - 5 مايو 2018
• نقد آخر لنفس المستخدم

التسجيلي الفائز بالأوسكار السنادي.. فيلم أُسطــوري!، هوّا بالتأكيد من بين أفضل أفلام تسجيلية ممكن أي حد يشوفها على الإطلاق، وأنا مش ببالغ... عظمة السينما التسجيلية تتجلى في الفيلم ده. طيّب، سريعاً عشان أقول مكمن تفرُّد الفيلم وفـ نفس الوقت أشجعكم إنكم تشوفوه فـ أقرب فرصة قدامكم، هنا (القضيّة) بتقلب الطاولة رأساً على عقب، القصة عن واقعة أول مرة أسمع عنها حصلت من سنتين مُفادها هيّا إن فيه عالِم روسي أدلى بتقرير صادم قال فيه إن الرياضة الروسية كانت على مدار السنين اللي فاتت ومنذ...اقرأ المزيد الثمانينيات عاملة خطة محكمة عشان تجعل أبنائها من الرياضيين المُشاركين في الأولمبياد يتعاطوا المُنشطات (Doping) الغير قانونيّة من غير ما يتكشفوا، وإن الدولة الروسية برئاسة زعيمهم "بوتين" كانت هيّا الداعمة والمُخطِطة الأولى.. طبعاً ده مش شئ قليل أبداً، دي فضيحة بجلاجل... ومن هنا ييجي نقطة تفرُّد الفيلم. هوّا مش مجرد فيلم (بيحكي حدوتة) مثلاً، ده هوّا فيلم (أُسطوري) بحق وحقيقي؛ هذا النوع من الأفلام اللي لازم يكسب جوايز مهمة عشان العالَم يلتفت للقضايا اللي بتناقشها، الفيلم بيقوم بتعرية المجتمع/الفكر/الكوميونيتي الروسي، ومعاه بيكشف سر عظيم في عالمنا المُعاصر عن (المدى اللي بنذهب ليه عشان نغطي على حقائقنا المُخزية)، فيلم عظيم عن المصداقية اللي عندنا كبشر تجاه الغير، بيبدأ مع مقولة "جورج أورويل" في رواية (۱۹۸٤) واللي واخدة تطبيق جذاب جداً لموضوع الفيلم: "في زمن ينتشر فيه الخِداع على نطاق واسع، يغدو قول الحقيقة عملاً ثورياً". فيلم مفيش زيه إتنين في الكوكب، معجزة سينمائية عن قدرة وسيط السينما التسجيلية إنه يحكي ويقول حاجات عُمرها ما كانت تحصل من عشرة أو عشرين سنة.. *** نقاط تفرُّد أخرى للفيلم : - الحس الهيتشكوكي التشويقي المُتَّبع فيه، ولا أروع أفلام السينما الروائية إثارة ! - كمّ المشاعر العواطف اللي فيه -واللي بتتكشف عالـ شاشة- استثنائية. - نقطة التميُّز الكبرى: الفيلم فيه كل أشكال السرد المُتخيَّلة في الفيلم التسجيلي؛ من أول السرد اللايڤ، لمشاهد متاخدة بالموبايل، أنيميشن، إنترڤيوز، صور وڤيديوهات أرشيفية.. إلخ. - القضيّة مُصنفة إنها من أكبر فضائح العالم في الفترة الأخيرة، وفي التاريخ الروسي بشكل خاص. - لمست قد ايه هنا "الفيلم التسجيلي" ممكن يبقى أداة إدانة حقيقية في عالمنا المُعاصر، صناع الفيلم كانوا -حرفياً- في حرب مع الدولة الروسية، وفي إبراز خرافي لتيمة (حرية التعبير عن الرأي)، والله صعب الكلمات توصف اللي فـ الفيلم، بل لازم يتشاف. - السرد مميز؛ مقسوم لنصفين الأولاني فيه أحداثه تحتيّة وآمنة شويتين، والتاني داخل بوَسع صدره.. وفيه هارموني رهيب ما بينهم. - جزء تاني من أهمية مُشاهدة الفيلم في رأيي ييجي من إن (روسيا) هيّا المنظمة لـ كاس العالم بعد ٤۲ يوم من الآن!؛ فسلفة مختلفة تماماً ممكن تبص بيها للموضوع في حال شفت الفيلم، متهيألي صعب عليّا أوي دلوقت أشوف أي حاجة بتعملها روسيا بشكل مختلف عن إنهم أوغاد نصابين ! - الفيلم بينه وبين (Citizenfour) التسجيلي الحاصد لأوسكار أفضل تسجيلي بالعام هو الآخر منذ ثلاث سنوات.. بينهم مُشتركات كتيرة مميزة تبيّن مدى عظمة الفيلم ده عن التاني؛ أهم نقطتين هما النبرة التشويقية التابعة لتصوير القصة (الحقيقية بالطبع)، ومركز القضيّة المحكيّة عن العالَم اللي عايشين فيه الآن، قضية "سنودن" أُغلِقَت من زمان، بينما القضية هنا ما زالت مفتوحة، أيون!.. مُشاهدتك للفيلم السنادي مثلاً ممكن يختَلف في رد فعلك عن السنة الجاية، للي بعيدها.. وكله حسب المنظور اللي بتشوف بيه. تقييمي لـ(إيكاروس) : ۱۰/۱۰ *** إعلان الفيلم : https://www.youtube.com/watch?v=qXoRdSTrR-4 لينك التحميل من الـ YTS : https://yts.am/movie/icarus-2017

• 0 مفيد
• 0 غير مفيد

أضف نقد جديد