Defending Jacob (Verschwiegen)  (2020)  الدفاع عن جاكوب

أراء حرة

 [1 نقد]

Defending Jacob… حين تتحول الجريمة إلى مرآة للصراع الإنساني

• دعاء أبو الضياء
• 09:55 مساءً - 14 اغسطس 2025
• نقد آخر لنفس المستخدم

بصراحة، أنا كنت متعودة أشوف كريس إيفانز في أدوار زي كابتن أمريكا أو الحبيب الرومانسي، وبعض من الأكشن في أفلام مش كتيرة، لكن هنا فاجأني تمامًا. قدر يقدم شخصية الأب "آندي" ببراعة شديدة، وفي كل مشهد كان بيبان خوفه العميق ومحاولته المستميتة للدفاع عن ابنه، وتمسكه بتصديقه وعدم الانسياق وراء فكرة إنه ممكن يكون القاتل. على الجانب الآخر، ميشيل دوكري في دور "لاوري" فضلت طول المسلسل في حالة من القلق والتوتر، حطتني معاها في نفس الحالة. شكها الدائم في تورط ابنها كان بيعمل توازن درامي عكس موقف الأب. أداؤها...اقرأ المزيد كان مليان تفاصيل صغيرة—النظرات، التردد، والارتباك—اللي خلت الشخصية حقيقية جدًا. أما جايدن مارتيل في دور "جاكوب"، فده كان مستوى مختلف. عمري ما كنت أتخيل إنه نفس الممثل اللي شفته في فيلم IT. هنا كان غامض، بارد أحيانًا، لكن دايمًا بيخليك مش متأكد إذا كان بريء أو لأ، وده نجاح تمثيلي كبير. **القصة والحبكة** السيناريو المقتبس عن رواية ويليام لانداي اللي اختار يركز على الصراع الإنساني أكتر من الجريمة نفسها. صحيح إن القصة شبه بعض أعمال (أبل تي في) زي Presumed Innocent، فكرة شخص في القضاء أو النائب العام يتورط هو أو أسرته في جريمة قتل، لكن Defending Jacob كان أعمق في تناول المشاعر، والعائلة وهي بتتفكك تحت ضغط الشكوك. أما الإخراج فاعتمد على الإيقاع البطيء المقصود، اللي سمح للتوتر يتصاعد طبيعي. الألوان الباردة والكادرات الضيقة خلت المشاهد يحس بالعزلة والخوف زي الشخصيات. التصوير كان أكثر من رائع، والموسيقى التصويرية خدمت الجو العام بدون ما تطغى عليه. في النهاية المسلسل بيطرح أسئلة صعبة عن الحب غير المشروط، وعن حدود الإيمان بالآخرين، وهل تقدر تتحمل الحقيقة لو كسرت الصورة اللي في بالك. هو عمل بطيء لكنه مليان طبقات، ونجح يخليني أفكر فيه بعد ما خلصته، مش بس بسبب الجريمة، لكن عشان الصراع النفسي اللي جوه البيت.

• 0 مفيد
• 0 غير مفيد

أضف نقد جديد