الحشاشين  (2024)  Al Hashshashin

أراء حرة

 [1 نقد]

أصحاب أنا وأنت ولا .. (ولا = طيور الظلام)

• احمد رميح
• 10:24 مساءً - 17 ابريل 2024
• نقد آخر لنفس المستخدم

" الفنان قد تكون له أغراض متعددة من قيامه بخلق عمل فني ما، فقد يبحث عن مال أو شهرة او إصلاح اجتماعي، إلا إن ما يميز المشتغلين بالفنون هو أنهم يسعون إلى تكوين شئ يكون من الرائع إدراكه " لويس مورو جوتشوك من سنه بالظبط الدحيح عمل حلقة عن " الحشاشين " واستعرض فيها تلات رويات أساسية في كتب المؤرخين منهم المستشرق الغربي ومنهم المؤرخ العربي. في الرويات التلاته حسن الصباح ثائر سواء كان على حق او على باطل، لكن اللى رجح كفة الرواية الحالية، وهي رواية المستشرق الأوربي، إنها الأنسب لعمل فني غني دراميًا...اقرأ المزيد بالإثارة والتشويق . أسطورة بقى. رواية المستشرق بإختصار إن الحشاشين فرقة ثورية إسلاميه أسسها حسن بن الصباح استعملت الإغتيالات إللى في كثير من الأحيان كانت عمليات انتحارية، بهدف التخلص من أعدائها بالسلطة، وحسن الصباح كان بيستعمل نبات القِنب أو الحشيش في تخدير أتباعه بعد حديثه المستفيض عن الجنة وما ينتظره المقاتل بعد الإستشهاد من نعيم الجنة بأنهارها من الخمرة والبن والعسل وأكيد الحور العين. أسس حسن الصباح نموذج للجنة في قلعة آلموت (آل-موت)، كان المقاتل يغيب عن الوعي بعد " إصطباحة " الصباح ويفوقوه في قلعة آلموت إللي تم إعدادها لتكون مكان شبيه بالجنة، والمثل بيقول: إللي شاف بعينه مش زي اللى سمع. بعدها يكون المقاتل مستعد تمامًا لتنفيذ كل ما يطلب منه حتى لو وصل الأمر ان تكون المهمة إنتحارية يفقد فيها حياته الدنيا في سبيل حياته بالآخرة .. الجنة .. جنة حسن الصباح إبن الضلمه. النهاردة بنهاية الحلقة العاشرة من المسلسل، أكتمل الفصل الأول اللي تم فيه تقديم الشخصيات والأماكن وتحديد الصراعات الرئيسية والفرعية. من تاني وتالت حلقة وبدأت اشوف الثلاثي حسن الصباح والطوسي " نظام الملك " والشاعر الحالم عمر الخيام هم نسخة من الشخصيات الثلاثة الرئيسية للفيلم الخالد " طيور الظلام " ( فتحي نوفل وعلى الزناتي ومحسن ) عادل إمام ورياض الخولي واحمد راتب. وبما أن أسطورة الحشاشين هي الأقدم فربما طيور الظلام هي اللى كانت نسخة ومستوحاه من أسطورة الحشاشين! " لو لم تكن الأشياء متشابهة فيما بينها في نواح معينه لما أمكننا التعرف عليها أو تصنيفها" جيروم ستولينتز ثلاث أصدقاء مختلفون في إهتمامتهم وأهدافهم : الطوسي أو نظام الملك عبد للسلطة (فتحي نوفل)، وحسن الصباح عبد لنفسه (على الزناتي)، وأخيرًا عمر الخيام عبد لمخاوفه وشكوكه (محسن). أسطورة الحشاشين أسطورة غنية، بـ لغة الدراميين قماشه واسعه يقدر اي كاتب يفصل منها الحدوتة اللي هتحتوي فكرته. في طيور الظلام كانوا الأصدقاء الثلاثة معبرين عن الإتجاهات السياسية الثلاثة الموجودة داخل الدولة ( اليمين الديني ويمين السلطة المحافظ واليسار ). التلاته تعاهدوا على إن اللى يوصل يشد التاني معاه، ووصل نظام الملك أولًا ووفى بعهده وسحبهم معاه، إرتضى عمر الخيام بعلومه وفلسفته وأنشغل بالبحث عن نفسه وعن الحقيقة، بس حسن الصباح إنشغل بما هو أكبر، بطموحه اللي ميسمحلوش يكون مجرد تابع حتى لو كانت أهميته ستفوق الرجل الثاني في الدولة، وزير الدولة نظام الملك، وقرر إن مكانته لازم تكون كمتبوع. الحقيقة إن أسطورة الحشاشين زي ما قلت قماشه واسعه جدًا لأي مبدع يقدر يغلف بيها أي فكرة عايز يتكلم عنها أو يقدمها للمشاهدين، وده اللى خلاني اشوف مسلسل الحشاشين عمل بيتكلم عن المرض التاريخي اللي بتمرض بيه مصر كل فترة منذ عام 1928 وهو عام إنشاء جماعة الاخوان المسلمين، ولكن بدون حديث مباشر زي مسلسل الجماعة اللي تم تقديمه عام 2010 وكتبه المرحوم المبدع وحيد حامد، والصراع التاريخي اللى بيتكرر كل خمسين سنه تقريبًا، مرة عام 1954 وصدام مجلس قيادة الثورة مع جماعة الإخوان وفي 2013 وصدام الجماعة مع الدولة المصرية أيضًا. " التاريخ يعيد نفسه في المرة الأولى كمأساة، وفي المرة الثانية كمهزلة " ماركس مشاهد إعداد جيش حسن الصباح فكرتني بعبدالرحمن السندي قائد التنظيم الخاص بجماعة الإخوان اللي انحرف دوره من محاربة الإنجليز، لإغتيال الإعداء السياسيين والغير سياسيين كالقاضي الخازندار وغيره. حتى شخصية حسن الصباح مش بس مشتركة مع شخصية حسن البنا في الأسم الأول، لا حتى في بعض السمات الشخصية من الدهاء والفطنة وسرعة البديهة في استغلال المواقف وقلبها لصالحه، ناهيك عن اللي بيظهره من لين الشخصية والكلام المعسول. كمان استخدام اسم الباطنية على فرقة الحشاشين، ككناية عن أنهم يظهرون عكس ما يعلنون وما يخفون، دي برضه نقطة متطابقة مع الإخوان المسلمين وفكرة التُقية المأخوذة من طائفة الشيعة وهي جواز اظهار عكس ما يؤمن به الشخص عشان يكسب شئ او يدفع عنه ضرر ما .. في السياسة. كمان تشابهمم في فكرة المظلومية .. حسن الصباح في القصة المقدمة في مسلسل الحشاشين عبر اكتر من مرة عن ان سلاحه الأقوى هو استعطاف الناس بفكرة الظلم ولعب اكتر من مرة على اتباعه على فكرة المظلومية وانحيازة دايما للفتنة زي لما راح لأم المستنصر وقالها عايز اطمن ان الخلافة هتكون من نصيب ابنه نزار مش للأبن التاني اللي بيفضله بدر الدين الجمالي وزير الدولة الفاطمي، ودايمًا خصوم الصبح هم من في السلطة وزير الدولة " الطوسي في دولة السلاجقة او بدر الدين الجمالي وزير الدولة الفاطمية. ولو كان المقصود هو توعية الناس وتذكيرهم بجماعة الأخوان المسلمين من جديد، أو دعوة إلى فتح موضوع " الفتنة الكبرى " وإلي قسمت العالم الإسلامي ما بين سنه وشيعة، من خلال عمل فني غير مباشر في رسالته، هو شئ كويس ومحمود لأن الفن مش معمول عشان نسقي من خلاله الناس بالمعلقة ايه الصح وايه الغلط، ولكنه دعوه للتفكير وطرح الأسئلة. " إن الناس يرون ويشعرون بأشياء مختلفة إلى حد لا نهائي في العمل الفني الواحد، وهذا مثل للحقيقة المألوفة القائلة : إن الناس ليسوا سواء، وميزة الأعمال الفنية هي أنها تتيح للناس مجالًا فسيحًا يمارسون فيه خيالهم وينطلقون بمشاعرهم". جيروم ستولينتز حاول كتير من المشاهدين تصدير مشكلة فيما يخص اللغة العامية والفصحى في مسلسل الحشاشين،لكن في الحقيقة مش مشكلة تمامًا، الأعمال الفنية بيتحدد عنصر اللغة فيها على حسب الهدف منها، طبعًا بما لا يخالف الهدف الأسمى من أي عمل فني وهو جلب المتعة وتسلية المشاهد، الحشاشين مش مسلسل تاريخي بالمعنى الحرفي عشان نفرض على صانعيه لغة محددة تتكلم بيها الشخصيات، لأنه بيتناول أسطورة في الأساس. حتى لو كان عمل تاريخي وبيتناول احداث حقيقية من الممكن ان تخلي الحوار بالعامية طالما ده اللى هيضمن وصول العمل لأكبر شريحة ممكنة من المشاهدين، كمان اللغة دايما متطورة ولكن ناحية التبسيط والاختصار مش العكس. ولو هنمشيها بالقاف والنون يبقى حسن الصباح يتكلم تركي بما أنه إبن الدولة السلجوقية التركية او فارسي بما أنه نشأ في اصفهان! " من الضروري التفرقة بين ما أستقر لأنه صحيح، وما هو صحيح لكونه قد إستقر " جيروم ستولينتز الوقوف عند اشياء ثاتوية زي دي بيحجم العملية الإبداعية وساعات كتير بيقتلها زي ما حصل مع مسلسل " الملك أحمس " اللي تم الهجوم عليه بسبب دقن عمرو يوسف والنتيجة إن التجربة إتقتلت من قبل ما تحيا. التفاهات دي ممكن تحرمنا من أعمال جديدة وثرية محتاجينها تكون موجودة لو مش كبديل عن التيمات الحمضانه إللي بتتفرض علينا كل رمضان، فـ على الأقل تكون موجودة كإختيار تاني بعيدًا عن حنجرة العوضي ومظلومية رمضان التي لا تنتهي وفتونة ماجد المصري.

• 2 مفيد
• 1 غير مفيد

أضف نقد جديد