المنبر  (2025)  Al Menbar

أراء حرة

 [1 نقد]

المنبر... بين التشتت وفقدان المعنى

• دعاء أبو الضياء
• 01:24 صباحًا - 9 اكتوبر 2025
• نقد آخر لنفس المستخدم

أحيانًا لما بشوف فيلم بيبقى عندي فضول أعرف هو عايز يقول إيه فقط دون الدخول في أي حاجة تانية… بس "المنبر" خلاني مش بس مش فاهمة هو عايز يقول إيه، ده أنا مش عارفة كان بيتكلم عن إيه أصلاً! الفيلم من بطولة أحمد حاتم، وإخراج أحمد عبدالعال، ومدته كانت مناسبة للي بيحصل فيه، بس رغم كده حسيت كأني بتفرج على كذا فيلم جوا بعض: مرة بيتكلم عن الأزهر ودوره في السياسة والاحتلال، ومرة عن شيوخ من الأزهر كأنهم نطوا كده فجأة في السرد، ومرة عن علاقة المسلمين والمسيحيين من خلال قصة سطحية شوية عن شاب أزهري بيساعد سائق...اقرأ المزيد مسيحي، ومرة عن شخصية سطحية زي "أمجد" اللي وجوده كان فعلاً بلا أي لازمة. أنا كمُشاهدة، ضعت، مش عارفة الفيلم كان عايز يوجهني لفين ولأ لفين، ولو الرسالة عن التعايش، فالموضوع اتقدم بشكل تقليدي جدًا، وتحس إنه بيكرر شعارات قديمة زي "تحيا الهلال مع الصليب" من غير ما يضيف أي منظور جديد أو معالجة مختلفة. والمشكلة مش بس في الرسالة، لكن كمان في تنفيذ المشاهد، في حاجات صعبة تتعدي من غير ما الواحد يضحك أو يستغرب، زي مشهد الفلاحة اللي ماشية في الغيط شايلة زلعة! بجد؟ لسه في حد بيشيل الزلعة كده؟ ولا شكل شيخ الأزهر اللي قدمه (أشرف زكي) كضيف شرف، واللي أول ما طلع حسيت إنه بابا نويل داخل الفيلم بالغلط! وطبعا لازم تزج بشخصية شامية في الفيلم عشان تقول فيلم عالمي، وإن طلاب الأزهر من كل مكان، رغم الأحرى كان الشخص ده يكون من دول شرق آسيا لأن فعلا هما اللي بيدرسوا ف الأزهر مش السوريين ولا الشوام. أما أحمد حاتم، فكان بعيد كل البعد عن أي إحساس بالشخصية، أداؤه حسته كأنه بيقرأ نص مش بيمثل، وده شيء غريب على ممثل عنده خبرة زيه. في النهاية، الفيلم بالنسبالي لا يستحق أكتر من 4 من 10، ويمكن أقل، لا رسالة، ولا معالجة، ولا حتى تمثيل ممكن أتكلم عنه بإيجابية.

• 0 مفيد
• 0 غير مفيد

أضف نقد جديد