Project Hail Mary  (2026)  مشروع الفرصة الأخيرة

أراء حرة

 [1 نقد]

رحلة في الفضاء… لكن قلبها إنساني جدا

• دعاء أبو الضياء
• 03:42 مساءً - 26 مارس 2026
• نقد آخر لنفس المستخدم

لما يجتمع الثنائي فيل لورد وكريستوفر ميلر اللي قدموا أعمال ممتعة زي 22 Jump Street وThe Lego Movie وCloudy with a Chance of Meatballsمع نجم بحجم رايان جوسلينج، فأنت قدام تجربة مش عادية. Project Hail Mary مش مجرد فيلم خيال علمي عن الفضاء، لكنه رحلة إنسانية عميقة عن التواصل، الوحدة، وإزاي ممكن كائنين من عالمين مختلفين يلاقوا نقطة مشتركة. الفيلم بيدور حوالين فكرة النجاة في الفضاء، وده يخليه يفتكرنا شوية بـ The Martian بطولة مات ديمون، فعلا في تشابه واضح من حيث العزلة ومحاولة البقاء، لكن Project...اقرأ المزيد Hail Mary بيضيف بعد أهم: فكرة التواصل. العلاقة اللي بتتكون بين شخصيتين من عالمين مختلفين كانت قلب الفيلم الحقيقي، ودي حاجة خلته مميز رغم إن الفكرة الأساسية مش جديدة 100%. بالعكس، الفيلم عرف يقدمها بشكل إنساني ومؤثر يخليك متعلق بالتفاصيل الصغيرة قبل الكبيرة. ورغم إن مدة الفيلم بتقرب من ساعتين ونص، إلا إن السيناريو كان متماسك بشكل كبير، ف مفيش إحساس بالحشو، وكل تفصيلة ليها لازمة وأنا شخصيا شايفة إن أفلام الفضاء دايما فيها مساحة كبيرة للمشاعر، وده اللي السيناريو استغله صح جدا هنا، الفيلم مش بس علم ونجاة… ده إحساس بالوحدة، خوف، وأمل. الإخراج هنا من فيل لورد وكريستوفر ميلر كان مفاجأة حلوة، هما معروفين بأعمالهم الخفيفة والمليانة طاقة، لكن هنا قدروا يقدموا فيلم فيه عمق بصري ودرامي واضح. التصوير، المونتاج، والموسيقى كلهم شغالين مع بعض بتناغم كبير، تحس إن كل عنصر بيخدم التاني. أما المؤثرات البصرية فكانت خلابة فعلا مش بس حلوة بصريا، لكن كمان مقنعة وبتخدم القصة مش مجرد استعراض. وطبعا رايان جوسلينج هنا بيقدم واحد من أقوى أدواره، كونه البطل شبه الأوحد للفيلم مش حاجة سهلة، خصوصا في عمل بيعتمد بشكل كبير على العزلة. هو نجح إنه يشيل الفيلم بالكامل تقريبا من غير ما تحس بملل أو تكرار،وقدر يوصل مشاعر الخوف، الذكاء، الهزار الخفيف، وحتى الانهيار… وكل ده بشكل طبيعي جدا. بصراحة، الدور ده يستحق تقدير كبير لأنه معتمد عليه بنسبة ضخمة من نجاح الفيلم. في النهاية Project Hail Mary فيلم خيال علمي، آه… لكنه في الأساس فيلم عن الإنسانيةن عن إن حتى في أقصى نقطة في الكون، ممكن تلاقي حد تفهمه ويفهمك. يمكن قصته مش جديدة تماما، لكن طريقته في الحكي، ودفء مشاعره، وقوة تنفيذه خلوه تجربة مميزة جدا.

• 0 مفيد
• 0 غير مفيد

أضف نقد جديد